Inda koshikalimo

Inda koshikalimo

 ETUKULWA 56

Oshike naanaa hashi nyateke omunhu?

Oshike naanaa hashi nyateke omunhu?

MATEUS 15:1-20 MARKUS 7:1-23 JOHANNES 7:1

  • JESUS TA NYANEKE POMUTENYA EEENGHULUNGHEDI DOVANHU

Eshi Opaasa yomo 32 O.P. ya li pokufika, Jesus okwa li e lipyakidila nokuudifa muGalilea. Okwa li a ya kuJerusalem koshivilo shOpaasa, ngaashi Omhango yaKalunga ya ti. Ashike okwa li e shi ninga nelungi molwaashi Ovajuda ova li va hala oku mu dipaa. (Johannes 7:1) Eshi oshivilo sha pwa, okwa li a shuna kuGalilea.

Otashi dulika Jesus a li muKapernaum eshi Ovafarisai novahongimhango ve uya kuye va dja kuJerusalem. Omolwashike va li ve uya kuye? Ova li tava kongo omatomheno okulundila Jesus kutya ota sheke omalongelokalunga. Ove mu pula tava ti: “Omolwashike ovahongwa voye hava tauluka eenghulunghedi dovakulu vonale? Pashihopaenenwa, ngeenge tava li ihave likosho keenyala.” (Mateus 15:2) Kalunga ka li a lombwela oshiwana shaye shi kale hashi ‘likosho keenyala fiyo opeengolo domaoko.’ (Markus 7:3) Ndele Ovafarisai ova li ve shi tala ko shi li enyono la kwata moiti.

Ponhele Jesus e va nyamukule sha yukilila, okwa li a popya nghee hava nyonene owina Omhango yaKalunga. Okwe va pula a ti: “Omolwashike hamu tauluka oipango yaKalunga omolweenghulunghedi deni? Pashihopaenenwa, Kalunga okwa ti, ‘Fimaneka xo nanyoko,’ nosho yo kutya, ‘Keshe ou ta tuku xe ile ina na dipawe.’ Ndele nye otamu ti, ‘Ou ta ti kuxe ile kuina: “Ashishe osho ndi na handi dulu ngeno oku ku yambidida nasho, oshi li oshali ya yapulilwa Kalunga,” ita pumbwa okufimaneka xe nandenande.’” — Mateus 15:3-6; Exodus 20:12; 21:17.

Ovafarisai ova li tava ti kutya oimaliwa, oiniwe ile keshe osho sha yapulilwa Kalunga shi li oshali oshotembeli, onghee itashi dulu okulongifwa vali nelalakano limwe. Ndele paulelalela oinima oyo tava ti oya yapulilwa Kalunga ovo hava kala ve i kwete. Pashihopaenenwa, omonamati otashi dulika a tye kutya oimaliwa ile oiniwe yaye oi li “okorban,” kokutya oshali ya yapulilwa Kalunga ile otembeli, sha fa ngeno kutya otembeli oi na oufemba wokukufa ko oshali oyo. Omonamati oo ota dulu natango okulongifa oimaliwa ile oiniwe oyo, ashike ota ti ita dulu oku i longifa a kwafele ovadali vaye ovanamido ile ovadali ovo ve li momhumbwe. Kungaho, ota henuka oshinakuwanifwa shoku va kwafela. — Markus 7:11.

Jesus okwa li a handuka eshi tava pengifa Omhango yaKalunga, ndele te va lombwele ta ti: “Omwa hekula eendjovo daKalunga omolweenghulunghedi deni. Ovanaihelele nye, Jesaja okwa xunganeka sha yuka shi na sha nanye eshi a ti: ‘Ovanhu ava ohava fimaneke nge nomilungu davo, ndele omitima davo odi li kokule naame. Ohava longele nge oshimha, molwaashi omahongo avo okwa kanghamena koipango yovanhu.’” Ovafarisai kava li tava dulu okunyamukula Jesus molwaashi okwa li e va nyaneka pomutenya. Opo nee okwa ifana ongudu yovanhu i ehene popepi, ndele ta ti: “Pwilikineni nokuuda ko eendjovo edi: Osho hashi i mokanya komunhu hasho hashi mu nyateke, ndele oha nyatekwa kwaasho hashi di mokanya kaye.” — Mateus 15:6-11; Jesaja 29:13.

Konima eshi va ya meumbo, ovahongwa ova pula Jesus tava ti: “Owa didilika ngoo kutya Ovafarisai ova uda nai kwaasho wa popya?” Okwe va nyamukula a ti: “Omuti keshe oo inau twikwa kuTate womeulu otau ka dudwa mo. Va efeni, ovo ovakwatiketi ovapofi. Ngeenge omupofi oku kwete omupofi mukwao kemhango, aveshe otava ka wila melambo.” — Mateus 15:12-14.

Jesus okwa li a kumwa eshi Petrus a pula ponhele yovahongwa a yelife kutya oshike hashi  nyateke omunhu. Jesus okwe mu nyamukula a ti: “Hamba kamu shi shii kutya keshe osho hashi i mokanya ohashi i medimo ndele tashi piti mo vali? Ndele keshe osho hashi di mokanya ohashi di komutima, naasho osho hashi nyateke omunhu. Pashihopaenenwa, momutima omo hamu di omadiladilo mai, omadipao, omanyonohombo, oluhaelo, oulunga, omalundilafano nomasheko. Oinima oyo oyo hai nyateke omunhu; ndele okulya neenyala inadi koshwa ihaku nyateke omunhu.” — Mateus 15:17-20.

Jesus ka li ta lombwele ovanhu vehe likoshe keenyala ofimbo inava longekida oikulya ile inava lya. Ponhele yaasho, okwa li ta tokola oihelele yovawiliki vomalongelokalunga ovo hava kendabala okupengifa eemhango douyuki daKalunga neenghulunghedi dovanhu. Osha yela kutya oilonga ii oyo hai di momutima oyo hai nyateke omunhu.