Inda koshikalimo

Inda koshikalimo

 ETUKULWA 27

Mateus ta shivwa a ninge omuhongwa

Mateus ta shivwa a ninge omuhongwa

MATEUS 9:9-13 MARKUS 2:13-17 LUKAS 5:27-32

  • JESUS TA SHIVI MATEUS, OMUFENDELIFI

  • JESUS TA ENDAFANA NOVALUNDE OPO E VA KWAFELE

Konima eshi Jesus a velula oshingudu, okwa kala moshitukulwa shaKapernaum pefuta laGalilea oule wefimbo linini. Natango ongudu inene oya li ye uya kuye, nokwa li a hovela oku i honga. Eshi a li ta ende, okwa li a mona Mateus, oo ha ifanwa yo Levi, e li omutumba pombelewa yomafutilo oifendela. Jesus okwa li e mu shiva a ti: “Ninga omushikuli wange.” — Mateus 9:9.

Otashi dulika Mateus a li e shii nale omahongo aJesus nosho yo oilonga oyo a li a longa moshitukulwa osho, ngaashi ashike Petrus, Andreas, Jakob naJohannes. Ngaashi vo, Mateus okwa li a tambula ko eshivo olo diva. Mateus okwe shi popya mEvangeli laye, a ti: Mateus ‘okwa fikama diva ndele ta shikula’ Jesus. (Mateus 9:9) Onghee okwa li a fiya po oinakuwanifwa yaye e li omufendelifi nokuninga omuhongwa waJesus.

Lwanima, opo Mateus a ulike olupandu eshi a shivwa kuJesus, okwa li a ninga oshivilo shinene meumbo laye. Kakele kuJesus novahongwa vaye, oolyelye vali va li va shivwa? Ovovo va li ookaume kaMateus nosho yo ovafendelifi vakwao. Ovafendelifi ovo ova li hava ongele oifendela yepangelo laRoma olo la li tondike, mwa kwatelwa oifendela yeeskepa odo tadi uya komatuliloskepa, yoyeendo yeengamelo odo tadi longifa eendjila davo nosho yo yoilandomwa oyo ya dja kondje yoilongo. Mbela Ovajuda ova li hava tale ko ngahelipi ovafendelifi? Ovanhu ova li ve va tonde molwaashi ova li have va nyokoma moku va futifa oimaliwa ihapu i dulife pwaayo i na okufutwa. Okwa li yo ‘ovalunde’ koshivilo osho, oohandimwe ovo va li va shiivikila okulonga owii. — Lukas 7:37-39.

Eshi Ovafarisai ovo ve lishii ouyuki va mona Jesus poshivilo osho e li novanhu va tya ngaho, ova pula ovahongwa vaye va ti: “Omolwashike omuhongi weni ta li pamwe novafendelifi nosho yo ovalunde?” (Mateus 9:11) Eshi Jesus e va uda, okwe va nyamukula a ti: “Ovanhu ovo ve na oukolele inava pumbwa omuhakuli, ndele ovovo ashike tava vele. Indeni mu ke lihonge kutya eshi osha hala okutya shike: ‘Onda hala efilonghenda ndele hayambo.’ Osheshi ame inandi endela ovayuki, ndele ovalunde.” (Mateus 9:12, 13; Hosea 6:6) Eshi Ovafarisai va li hava ifana Jesus “omuhongi,” kava li have shi ningi tashi di komitima, ndele ova li tava dulu okulihonga sha kuye shi na sha naasho shi li mondjila.

Osha fa shi li ngaha kutya Mateus okwa li a shiva ovafendelifi nosho yo ovalunde keumbo laye opo va pwilikine kuJesus nova velulwe pamhepo, “osheshi opa li vahapu vomuvo ovo va li tave mu shikula.” (Markus 2:15) Jesus okwa li a hala oku va kwafela va kale ve na ekwatafano liwa naKalunga. Mepingafano nOvafarisai ovo ve lishii ouyuki, Jesus ka li e tonde ovanhu va tya ngaho. Okwa li e linyengifwa kolukeno nosho yo konghenda; ota dulu okukala omuhakuli wopamhepo kwaaveshe ovo tava yahama pamhepo.

Jesus ka li a ulikila ovafendelifi nosho yo ovalunde olukeno opo ngeno e va tokole omolwomatimba avo, ndele oku va udila oukwao wananghali ngaashi ashike omunhu oo ta ehama palutu. Pashihopaenenwa, dimbuluka kutya eshi Jesus a kwata omunashilundu nonghenda, okwa ti: “Onda hala! Veluka.” (Mateus 8:3) Mbela nafye katu na okukala tu na etaleko la tya ngaho nokukwafela ovo ve li momhumbwe, unene tuu pamhepo?