Embo laJohannes 11:1-57

  • Efyo laLasarus (1-16)

  • Jesus ta hekeleke Marta naMaria (17-37)

  • Jesus ta nyumuna Lasarus (38-44)

  • Omhangela yokudipaa Jesus (45-57)

11  Omulumenhu wedina Lasarus womomukunda Betania, omumwaina waMaria naMarta, okwa li ta vele.  Maria, omumwaina waLasarus oo a li ta vele, oye a li a vaeka eemhadi dOmwene omaadi edimba liwa nokwe di pushula neexwiki daye.  Ovamwainakadona vaLasarus ova tuma kuJesus tava ti: “Omwene, kaume koye kopofingo ota vele.”  Eshi Jesus e shi uda, okwa ti: “Ouyahame ou itau twala mefyo, ndele otau fimanekifa Kalunga opo Omona waKalunga naye a fimanekwe okupitila muo.”  Ndele Jesus okwa li e hole Marta, Maria naLasarus.  Eshi Jesus a uda kutya Lasarus ota vele, konhele oko a li okwa kala ko natango oule womafiku avali.  Konima yomafiku oo avali, okwa lombwela ovahongwa vaye ta ti: “Natu shuneni kuJudea.”  Ovahongwa ova tya kuye: “Muhongi,* Ovajudea opo ashike va li va hala oku ku denga nomamanya, ndele owa hala vali okushuna ko?”  Jesus okwa ti: “Hano efiku kali na eevili 12? Ngeenge omunhu ota ende mouyelele, ite likoyola kusha molwaashi oku wete ouyelele wounyuni ou. 10  Ndele ou ta ende oufiku, ote likoyola molwaashi muye kamu na ouyelele.” 11  Konima eshi a popya oinima oyo, okwa weda ko ta ti: “Kaume ketu Lasarus okwa kofa, ndele ohandi i ko ndi ke mu pendule.” 12  Opo nee ovahongwa ova tya kuye: “Omwene, ngeenge okwa kofa ota veluka.” 13  Ndele Jesus okwa li a hala kutya Lasarus okwa fya. Ashike ovahongwa ova li tava diladila kutya ota popi kombinga yeemhofi do venevene. 14  Opo nee Jesus okwe va lombwela sha yukilila ta ti: “Lasarus okwa fya, 15  ndele oshiwa eshi inandi hangika ko opo mu dule okwiitavela. Natu yeni ko kuye.” 16  Opo nee Tomas, oo ha ifanwa Omukwanambwiyu, okwa lombwela ovahongwa vakwao ta ti: “Nafye natu yeni, tu ka fyeni pamwe naJesus.” 17  Eshi Jesus a fika, okwa hanga Lasarus a kala mombila* oule womafiku ane. 18  Betania osha li popepi naJerusalem, pa li pe na eekilometa nhatu lwaapo.* 19  Ndele Ovajuda vahapu ova li ve uya okuhekeleka Marta naMaria omolwefyo lomumwainamati. 20  Eshi Marta a uda kutya Jesus oku li mondjila te uya, okwa ya e ke mu shakeneke, ndele Maria okwa fyaala meumbo. 21  Marta okwa tya kuJesus: “Omwene, ngeno opo wa li, ngeno omumwameme ina fya. 22  Ashike nande ongaho, ondi shi shii kutya keshe osho to pula Kalunga ote shi ku pe.” 23  Jesus okwa tya kuye: “Omumwanyoko ota ka nyumuka.” 24  Opo nee Marta okwa tya kuye: “Ondi shi shii kutya ota ka nyumuka mefiku laxuuninwa.” 25  Jesus okwa tya kuye: “Aame enyumuko nomwenyo. Ou ta itavele nge,* nande nafye, ota ka nyumuka. 26  Ndele keshe ou e na omwenyo noku na eitavelo* mwaame, ota kala nomwenyo fiyo alushe. Mbela osho owe shi itavela?” 27  Marta okwa tya kuJesus: “Heeno Omwene, onda itavela kutya oove Kristus, Omona waKalunga, oo a li e na okuuya mounyuni.” 28  Eshi a popya ngaho, okwa ya ndele ta ka ifana omumwaina Maria, nokwe mu lombwela ve li po ovo aveke ta ti: “Omuhongi okwe uya note ku pula.” 29  Eshi Maria e shi uda, okwa fikama diva ndele ta i kuJesus. 30  Jesus ka li a fika momukunda oo, ndele natango okwa li ponhele opo a shakenekwa kuMarta. 31  Eshi Ovajuda ovo va li meumbo tava hekeleke Maria va mona kutya okwa fikama diva ndele ta di mo, ove mu shikula, tava diladila kutya ota i a ka lilile kombila.* 32  Eshi Maria a fika opo pa li Jesus, okwe mu mona ndele ta tu eengolo peemhadi daye nokwa tya kuye: “Omwene, ngeno opo wa li, ngeno omumwameme ina fya.” 33  Eshi Jesus a mona Maria nosho yo Ovajuda ovo va li ve uya naye tava lili, oshe mu kuma komutima ndele ta nyika oluhodi. 34  Opo nee okwa ti: “Omwe mu paka peni?” Ova tya kuye: “Omwene, ila u ka tale po.” 35  Ndele Jesus okwa lila. 36  Opo nee Ovajuda ova ti: “Tala, okwa li e mu hole shili!” 37  Vamwe vomuvo ova ti: “Omolwashike omulumenhu ou a twikulula omupofi ina dula okukelela efyo laau?” 38  Ndele Jesus okwa nyika vali oluhodi, opo nee okwa ya kombila.* Ombila oyo oya li ekololo noya li ya idilwa nemanya. 39  Jesus okwa ti: “Kufei ko emanya.” Opo nee Marta, omumwaina wanakufya, okwa tya kuJesus: “Omwene, oku na okukala ta nyika, shaashi okwa ninga mo omafiku ane.” 40  Jesus okwa tya kuye: “Inandi ku lombwela kutya ngeenge owa itavele oto ka mona efimano laKalunga?” 41  Opo nee ova kufa ko emanya. Jesus okwa tala keulu, ndele ta ti: “Tate, ohandi ku pandula eshi wa uda eilikano lange. 42  Ondi shi shii kutya oho udu nge alushe, ndele ohandi popi ngaha omolwongudu yovanhu ava va dingilila nge opo va itavele kutya oove wa tuma nge.” 43  Eshi a popya ngaho, okwa ingida mokule ta ti: “Lasarus, dja mo!” 44  Opo nee omulumenhu oo a li a fya okwa dja mo a uvikwa nelapi koshipala, nokwa mangwa nomalapi komaoko fiyo okomaulu. Jesus okwa tya kuvo: “Mu mangululeni, ndele tamu mu efa a ye.” 45  Ndele Ovajuda vahapu ovo va li ve uya kuMaria nova mona osho sha ningwa po ova itavela Jesus, 46  ashike vamwe vomuvo ova ya kOvafarisai noku va lombwela osho Jesus a ninga. 47  Opo nee ovapristeri ovakulunhu nOvafarisai ova ongala pamwe noilyo yOmhangu yoPombada yOvajuda, ndele tava ti: “Molwaashi omulumenhu ou ota longo oikumwifilonga ihapu, oshike tu na okuninga po? 48  Ngeenge otwa efa a twikile okuninga ngaho, ovanhu aveshe otave ke mu itavela, nOvaroma otave ke uya ndele tave tu kufa otembeli* novanhu vetu.” 49  Ndele umwe womuvo, Kajafas, oo a li omupristeri munene omudo oo, okwa tya kuvo: “Nye onghalo kamu i udite ko. 50  Mbela kamu wete kutya oshiwa kunye omunhu umwe a fye ponhele yovanhu aveshe va hanaunwe po?” 51  Osho ine shi popya pahalo laye mwene, ndele molwaashi oye a li omupristeri munene omudo oo, okwa xunganeka kutya Jesus ota ka fila oshiwana; 52  hashiwana ashike ndele okwoongela yo ovana vaKalunga ovo va li va halakanifwa. 53  Okudja opo ova li va pangela omhangela ve mu dipae. 54  Jesus ina kala vali ha ende moipafi mokati kOvajuda, ndele okwa ya koshilando shi li popepi nombuwa hashi ifanwa Efraim, oko a ka kala novahongwa vaye. 55  Ndele oshivilo shOvajuda hashi ifanwa Opaasa osha li popepi, novanhu vahapu ova li va ya kuJerusalem va dja komikunda ofimbo oshivilo osho inashi fika opo va ka yelifwe paMhango yaMoses. 56  Opo nee ova li tava kongo Jesus nova pulafana fimbo va li ofika motembeli tava ti: “Otamu ti ngahelipi? Mbela ote uya ngoo koshivilo?” 57  Ndele ovapristeri ovakulunhu nOvafarisai ova yandja elombwelo kutya ngeenge ope na ou e shii kutya Jesus oku li peni ne va shiivifile, opo ve ke mu kwate po.

Eshangelo lopedu

Ile “Rabbi.”
Ile “mombiladimbuluko.”
Eln., “eestadia 15 lwaapo.”
Ile “e na eitavelo li na oilonga.”
Ile “eitavelo li na oilonga.”
Ile “kombiladimbuluko.”
Ile “kombiladimbuluko.”
Eln., “onhele yetu.”