Inda koshikalimo

Inda koshikalimo

 ETUKULWA 125

Jesus ta twalwa kuHannas, nolwanima okuKajafas

Jesus ta twalwa kuHannas, nolwanima okuKajafas

MATEUS 26:57-68 MARKUS 14:53-65 LUKAS 22:54, 63-65 JOHANNES 18:13, 14, 19-24

  • JESUS TA TWALWA KUHANNAS OO A LI NALE OMUPRISTERI MUNENE

  • OMHANGU YOPOMBADA YOVAJUDA YA NINGA OMHANGU IHE LI PAUYUKI

Jesus okwa li a mangwa a fa omukolokoshi wongaho, nokwa li a twalwa kuHannas oo a li omupristeri munene pefimbo olo omunyasha Jesus a li a kumwifa ovahongi kotembeli. (Lukas 2:42, 47) Lwanima, ovanamati vamwe vaHannas ova ka ninga ovapristeri ovakulunhu, nopefimbo opo oshitenya shaye, Kajafas, osho sha li omupristeri munene.

Ofimbo Jesus a li keumbo laHannas, Kajafas okwa li e na efimbo lokushiva oilyo yOmhangu yoPombada yOvajuda opo i ongale. Omhangu oyo oya li i na oilyo 71, mwa kwatelwa omupristeri munene nosho yo ovapristeri vamwe.

Hannas okwa li a “pula Jesus kombinga yovahongwa vaye nosho yo ehongo laye.” Jesus okwa nyamukula a ti: “Onda kala handi popi moipafi yovanhu. Onda kala handi hongo alushe moshinagoga nomotembeli, omo Ovajuda aveshe hava ongala, noinandi popya sha meholeko. Omolwashike to pulile nge? Pula ovo va uda osho nde va lombwela.” — Johannes 18:19-21.

Umwe womovakeleli votembeli ovo va li ofika popepi naJesus okwe mu denga enghava moshipala, ndele ta ti kuye: “Osho ngoo u na okunyamukula omupristeri omukulunhu ngaho?” Molwaashi Jesus okwa li e shi shii kutya ina ninga sha sha puka, okwa ti: “Ngeenge onda popya sha sha puka, shi lombwele nge, ndele ngeenge osho nda popya oshi li mondjila, oto dengele nge shike?” (Johannes 18:22, 23)  Onghee Hannas okwa li a tuma Jesus koshitenya shaye Kajafas.

Oilyo aishe yOmhangu yoPombada yOvajuda, mwa kwatelwa oo a li omupristeri munene pefimbo opo, ovakulunhu voshiwana novanongo vomishangwa, ova li va ongala. Ova li va ongalela meumbo laKajafas. Kasha li paveta okuninga omhangu moufiku wOpassa, ashike osho kasha li she va imba va wanife po elalakano lavo.

Vahapu vomuvo ova li ve na onhondo. Konima eshi Jesus a nyumuna Lasarus, Omhangu yoPombada yOvajuda oya li ya tokola i dipae Jesus. (Johannes 11:47-53) Konima yomafiku manini, ovawiliki vomalongelokalunga ova li va pangela omhangela yoku mu kwata po noku mu dipaa. (Mateus 26:3, 4) Ofimbo nokuli omhangu inai hovela, Jesus okwa li a tokolelwa nale efyo.

Kakele kokwoongala oko kuhe li paveta, ovapristeri ovakulunhu nosho yo oilyo imwe yOmhangu yoPombada yOvajuda, ova li tava kendabala okumona eembangi odo tadi ka popya omahokololo oipupulu opo va patululile Jesus oshibofa. Nonande opa li eembangi dihapu, omahokololo ado kaa li taa tu kumwe. Opo nee eembangi mbali oda ti: “Otwe mu uda ta ti, ‘Ohandi ngumauna po otembeli ei ya tungwa nomake, ndele moule womafiku atatu ohandi tungu po imwe inai tungwa nomake ovanhu.’” (Markus 14:58) Ovalumenhu ovo kava li nokuli tava tu kumwe.

Kajafas okwa pula Jesus a ti: “Ito nyamukula sha? Ku udite ko hano eshi ovalumenhu ava tave ku hokololifa?” (Markus 14:60) Jesus okwa li ashike a mwena eshi a li ta lundilwa keendombwedi doipupulu odo da li tadi popi omahokololo itaa tu kumwe. Onghee omupristeri munene, Kajafas, okwa li a kendabala okulongifa onghedi imwe i lili.

Kajafas okwa li e shii kutya Ovajuda ohava handuka diva ngeenge omunhu okwe liti kutya ye Omona waKalunga. Eshi Jesus a popya kutya Kalunga oXe, Ovajuda ova li va hala oku mu dipaa molwaashi ova li tava ti ote liningi e “fike puKalunga.” (Johannes 5:17, 18; 10:31-39) Kajafas okwa li e shii oinima oyo, nokwa li a pula Jesus noukengeleledi a ti: “Ohandi ku anifa kuKalunga omunamwenyo u tu lombwele ngeenge oove Kristus, Omona waKalunga!” (Mateus 26:63) Jesus okwa li a dimina nale kutya ye Omona waKalunga. (Johannes 3:18; 5:25; 11:4) Ngeno ke shi ningile pomhito oyo, ngeno okwe lidimbika kutya ke fi Omona waKalunga nosho yo kutya haye Kristus. Onghee Jesus okwa ti: “Heeno, aame; notamu ka mona Omona womunhu e li omutumba kolulyo laKalunga Omunaenghono note uya moilemo yokeulu.” — Markus 14:62.

Opo nee Kajafas okwa pombaula oshikutu shaye shokombada, ndele ta ti: “Omulumenhu ou okwa sheka Kalunga! Omolwashike twa pumbwa vali okukonga eembangi? Taleni! Nanye omwe mu uda eshi ta sheke Kalunga. Otamu ti ngahelipi?” Omhangu yoPombada yOvajuda oya li ya yandja etokolo lihe li pauyuki, ya ti: “Okwa wana okufya.” — Mateus 26:65, 66.

Okwa hovela okusheka Jesus noku mu denga neengonyo. Vamwe ove mu denga nomanghava noku mu fiila omate moshipala. Konima yaasho, ove mu ula tava ti: “Xunganeka! Olyelye e ku denga?” (Lukas 22:64) Omona waKalunga okwa li ta ungaungiwa naye nai momhangu oyo ya li ya ningwa oufiku nokaya li pauyuki.