Jesus okwa li ta hongo moshinagoga muKapernaum kombinga yokukala po kwaye, e li omungome washili wa dja meulu. Osha yela kutya okwa li a twikila noshikundafanwa shaye osho a li a kundafana novanhu ovo va li va aluka koushilo wefuta laGalilea, ovo va lile omingome neeshi.

Okwa li a twikila neenghundafana daye, a ti: “Ooxokulululwa ova lile omana mombuwa ndele nande ongaho ova fya.” Mepingafano naasho, okwa li e va yelifila a ti: “Aame omungome u na omwenyo oo wa dja meulu. Keshe ou ta li omungome ou ota kala fiyo alushe, osheshi omungome ou handi yandje oo olutu lange omolweemwenyo dovanhu.” — Johannes 6:48-51.

Pokwenye mo 30 O.P., Jesus okwa li a lombwela Nikodemus kutya Kalunga oku hole ovanhu aveshe nomolwaasho a yandja Omona waye e li Omuxupifi. Jesus okwa li a divilika omhumbwe yokulya olutu laye mokukala neitavelo meyambo olo a li ta ka ninga. Kungaho, omunhu opo ashike ta dulu oku ka mona omwenyo waalushe.

Ashike ovanhu kava li va twa kumwe neendjovo daJesus. Opo nee ova pula tava ti: “Omulumenhu ou ota dulu ngahelipi oku tu pa olutu laye tu li lye?” (Johannes 6:52) Jesus okwa li a hala va ude ko kutya ota popi pafaneko. Osho a ka popya lwanima osha ka yandja eityo leendjovo daye.

Okwa ti: “Ngeenge itamu li olutu lOmona womunhu nokunwa ohonde yaye, itamu kala nomwenyo. Keshe ou ta li olutu lange nokunwa ohonde yange oku na omwenyo waalushe, . . . osheshi olutu lange olo oikulya yashili, nohonde yange oyo oshikunwa shashili. Keshe ou ta li olutu lange nota nu ohonde yange ohandi ka kala ndi na ekwatafano la kola naye.” — Johannes 6:53-56.

Ovajuda ovo va li tava pwilikine ova li va udifwa nai kwaasho Jesus a li ta popi. Ova li tava diladila kutya Jesus ota nyono omhango yaKalunga i na sha nokulya ohonde. (Genesis 9:4; Levitikus 17:10, 11) Ashike Jesus ka li ta popi kokulya olutu nokunwa ohonde yo venevene. Okwa li ta ulike kutya aveshe ovo va hala oku ka mona omwenyo waalushe, ove na okukala ve na eitavelo mekuliloyambo olo a li ta ka ninga eshi ta ka yamba po olutu laye la wanenena naashi ohonde yaye tai ka tika. Ndele nokuli novahongwa vaye vahapu kava li ve udite ko osho a li te va hongo. Vamwe ova ti: “Eendjovo odo inadi wapala, inatu hala oku di pwilikina.” — Johannes 6:60.

Eshi Jesus a mona kutya ovahongwa vaye vamwe otava ngongota, okwe va pula a ti: “Hano eendjovo odo ode mu udifa nai? Ongahelipi ngeenge omwa mono Omona womunhu ta shuna oku a dile? . . . Eendjovo odo nde mu lombwela oda dja momhepo iyapuki notadi yandje omwenyo. Ndele ope na vamwe vomunye ovo inava itavela.” Eshi ovahongwa ve shi uda, vahapu ova ya ndele tava efa po oku mu shikula. — Johannes 6:61-64.

Jesus okwa li a pula ovayapostoli vaye 12 a ti: “Nye inamu hala okuya?” Petrus okwa tya kuye: “Omwene, otu ye vali kulyelye? Oove u na eendjovo domwenyo waalushe. Otwa itavela notu shi shii kutya oove Omuyapuki waKalunga.” (Johannes 6:67-69) Petrus okwa li a ulika oudiinini nonande pomhito oyo ye novayapostoli vakwao kava li lela ve udite ko osho Jesus a li te va hongo.

Nonande Jesus okwa li a hafela enyamukulo laPetrus, okwa li e va pula a ti: “Hano haame nde mu hoolola nye omulongo navavali? Ndele umwe womunye omunaipupulu.” (Johannes 6:70) Jesus okwa li ta popi kombinga yaJudas Iskariot.  Pomhito oyo otashi dulika Jesus a li a didilika kutya Judas okwa hovela okukatuka metwokumwe nomahalo aye a puka.

Ashike nande ongaho, Jesus okwa li a hafa eshi a mona kutya Petrus nosho yo ovayapostoli vakwao kava li va efa oku mu shikula nokukufa ombinga moilonga yokuxupifa eemwenyo oyo naye a li ta longo.