Jesus okwa li a honga oilihongomwa ya fimana ofimbo a li meumbo lomuwiliki wOvafarisai. Eshi Jesus a li molweendo laye lokuya kuJerusalem, ongudu yovanhu oya li ya ya pamwe naye. Omolwashike mbela? Mbela ova li ngoo va hala okukala ovashikuli vaye vashili, kashi na nee mbudi kutya otashi pula shike?

Eshi va li mondjila, Jesus okwa li a popya oshinima osho tashi dulika sha li sha kumwifa vamwe, a ti: “Ngeenge ope na ou a hala okuninga omuhongwa wange oku na okukala e hole nge shi dulife xe, ina, omukulukadi waye, ovana vaye, ovamwainamati, ovamwainakadona, nokuli nomwenyo waye. Ngeenge hasho, ita dulu okuninga omuhongwa wange.” (Lukas 14:26) Ndele mbela okwa li a hala kutya ngahelipi eshi a popya ngaho?

Paulelalela Jesus ka li a hala kutya keshe oo ta ningi omushikuli waye oku na okukala e tonde ovapambele vaye. Ndele ponhele yaasho, okwa li a hala okutya nava kale ve mu hole shi dulife ovapambele vavo, ndele hangaashi omulumenhu oo a popiwa mefaneko olo oo a li a shivwa koshivilo sha fimana ndele ina tambula ko eshivo molwaashi ashike a hombola. (Lukas 14:20) Xekulululwa yOvajuda, Jakob, ka li ‘e hole’ Lea, sha hala kutya okwa li e hole unene Rakel shi dulife Lea. — Genesis 29:31.

Natango okwa li a popya kutya omuhongwa oku na okukala e tonde “nokuli nomwenyo waye.” Osho osha hala kutya omuhongwa washili oku na okukala e hole Jesus shi dulife omwenyo waye, tashi dulika a kale a hala okufya ngeenge onghalo otai pula efyo. Osho osha yela kutya okuninga omuhongwa waKristus oshinima sha kwata moiti. Kashi fi ashike oshinima shongahenya, ndele owa pumbwa oku shi diladila moule ofimbo ino katuka onghatu oyo.

Okukala omuhongwa otaku dulu okukwatela mo omaupyakadi nomapataneko, nomolwaasho Jesus a ti: “Keshe ou ita humbata omuti waye womahepeko ndele ta shikula nge, ita dulu okuninga omuhongwa wange.” (Lukas 14:27) Ovahongwa vaJesus vashili ove na okukala va halelela okuhepekwa ngaashi ye. Okwa popya yo kutya ota ka fila momake ovatondi vaye.

Onghee ongudu yovanhu oyo ya li pamwe naye oya li ya pumbwa okukonakona noukeka kutya osha kwatela mo shike okukala omuhongwa waye. Jesus okwa li a longifa efaneko opo a divilike oshinima osho. Okwa ti: “Olyelye womunye ngeenge a hala okutunga oshungongulu ita kala omutumba tete ndele ta valula a tale ngeenge oku na oitungifo ya wana? Ngeenge hasho, otashi dulika a tunge ekanghameno layo, ndele ta nyengwa oku i mana.” (Lukas 14:28-30) Ofimbo ovo va li tava ende pamwe naJesus va yuka kuJerusalem inava ninga ovahongwa vaye, ova li va tokola okuwanifa po oshinakuwanifwa osho nomupondo.  Okwa li a xulifa oshinima osho nefaneko limwe vali, a ti:

“Ngeenge ohamba tai ka lwifa ohamba ikwao, mbela kai na okukala omutumba tete nokukundafana navakwao ngeenge otai dulu ngoo okuya moita novakwaita 10 000 opo va finde ohamba oyo tai uya novakwaita 20 000? Ndele ngeenge itai dulu olwoodi olo, otai tumu ko ovakalelipo vayo fimbo ohamba ikwao i li kokule opo va pange ombili.” Opo a divilike oshitwa shaye, okwa ti: “Sha faafana, ngeenge ope na ou a hala okuninga omuhongwa wange, na fiye po oinima yaye aishe.” — Lukas 14:31-33.

Eendjovo odo kada li ashike da nuninwa ovo va li naye mondjila. Aveshe ovo va hala okukala ovahongwa vaKristus ove na okudulika kwaasho a popya. Osho osha hala kutya ove na okukala ve lilongekida okuyamba po keshe osho ve na, nokuli neemwenyo davo, ngeenge ova hala okukala ovahongwa vaye. Fimbo ino ninga omuhongwa owa pumbwa okudiladila nawa nokwiilikana kombinga yasho.

Jesus okwa li a endulula oshinima osho a li a popya mEudifo laye lokOmhunda kutya ovahongwa vaye ovo “omongwa wedu.” (Mateus 5:13) Kungaho, okwa li a hala okutya ngaashi ashike omongwa hau kwafele oinima iha ole, ovahongwa vaye navo otava ka amena ovanhu pamhepo nosho yo keenghedi inadi koshoka. Pexulilo loukalele waye okwa popya a ti: “Oshoshili kutya omongwa ouwa. Ndele ngeenge owa tutuka, otau shunwa eenghono kushike?” (Lukas 14:34) Ovapwilikini vaye ova li ve shii kutya ope na omongwa oo wa li hau tutuka molwaashi wa lumbakanifwa mumwe noinima oyo hai u kufa ongushu.

Jesus okwa li a ulika kutya nokuli naavo va kala ovahongwa vaye efimbo lile ove na okukala va tokola okukala ovadiinini opo vaha nghundipale. Ngeenge osho osha ningwa, otava ka kala vehe na vali oshilonga ngaashi ashike omongwa wa tutuka. Otashi dulika nokuli va ka shekwe kovanhu. Shimwe vali, itava ka kala vali va hokiwa kuKalunga, notava ka shekifa nokuli nedina laye. Jesus okwa li a divilika nghee sha fimana okuhenuka okuninga ngaho, a ti: “Ou e na omatwi na ude ko.” — Lukas 14:35.