Inda koshikalimo

Inda koshikalimo

 ETUKULWA 39

Woo kepupi eli inali hala okutambula ko Jesus

Woo kepupi eli inali hala okutambula ko Jesus

MATEUS 11:16-30 LUKAS 7:31-35

  • JESUS TA YANDJE OUSHIMA KOILANDO IMWE

  • OKWA YANDJA EPEPELELO NOSHO YO ETULUMUKO

Jesus okwa li a fimaneka Johannes Omuninginifi, ndele mbela ovanhu vahapu ova li va tala ko ngahelipi Johannes? Jesus okwa ti: “Epupi eli . . . ola fa ounona ve li omutumba pomalandifilo tava ingida vakwao, tava ti: ‘Otwe mu shikila eenyalilo, ndele inamu dana; otwa imba omaimbilo eenghali, ndele inamu lila.’” — Mateus 11:16, 17.

Jesus okwa li a hala okutya shike? Okwa yelifa oshitwa osho, a ti: “Johannes okwe uyile ita li noita nu, ndele ovanhu ova ti, ‘Oku na ondemoni.’ Omona womunhu okwe uya ta li nota nu, ndele ovanhu ova ti, ‘Tala, omulumenhu ou omufukenhu nongholwe, kaume kovafendelifi nokovalunde.’” (Mateus 11:18, 19) Shikwao vali, Johannes okwa li e na onghalamwenyo yanafangwa e li Omunasaret, nokwa li nokuli e lidilika omaviinyu, ashike natango epupi eli ola li tali ti oku na ondemoni. (Numeri 6:2, 3; Lukas 1:15) Shimwe vali, Jesus okwa li e na onghalamwenyo ya fa yovanhu vakwao. Okwa li ha li nokunwa pandjele, ashike okwa li ha lundilwa kutya okwa li he shi ningi sha pitilila. Oshidjuu okuhafifa keshe umwe.

Jesus okwa li a faafanifa epupi eli nounona ve li omutumba pomalandifilo ovo va anya okudana eshi vakwao tava shiki eenyalilo ile okulila eshi vakwao tava imbi omaimbilo eenghali. Okwa ti: “Ounongo ohau hololwa koilonga yao ya yuka.” (Mateus 11:16, 19) ‘Oilonga’ oyo i li oumbangi oo Johannes naJesus va yandja, otai ulike kutya oinima oyo tava lundililwa kai fi yoshili.

Konima eshi Jesus a popya shi na nepupi olo inali mu tambula ko, okwa li a yandja oushima koilando yaKorasin, Betsaida nosho yo Kapernaum omo a longa oikumwifilonga ihapu. Okwa ti, ngeno okwa longele oikumwifilonga oyo moilando yOvafoinikia, Tirus naSidon, ngeno ovanhu vomoilando oyo ove lidilulula. Okwa popya yo shi na sha naKapernaum, omo a li ha di omafimbo amwe. Nokuli nomoshilando osho, vahapu kava li ve mu tambula ko. Jesus okwa popya shi na sha noshilando osho a ti: “MEfiku lEtokolo, ehandukilo loye otali ka kala linene li dulife laSodom.” — Mateus 11:24.

Jesus okwa hambelela Xe, oo ha holeke oshili i na ondilo ‘ovanaendunge novahongwanhu,’ ashike okwe i hololela ovo vanini, ovo tashi dulika ve li ngaashi ounona vanini. (Mateus 11:25) Okwa shiva ovanhu va tya ngaho a ti: “Ileni kwaame amushe ava hamu longo nomwa lolokifwa, opo ndi mu tulumukife. Humbateni ondjoko yange nokulihonga kwaame, osheshi ame ondi na omwenyo muwa, nomomutima onde lininipika, opo nee otamu ke limonena etulumuko. Osheshi ondjoko yange oiwa, nomutengi wange omupu.” — Mateus 11:28-30.

Jesus oha yandje ngahelipi etulumuko? Ovawiliki vomalongelokalunga ova li va humbatifa ovanhu omutengi u na sha neenghulunghedi davo, ngaashi eemhango da kwata moiti di na sha nokudiinina Eshabata. Ashike Jesus ohe va tulumukifa moku va honga oshili kombinga yaKalunga oyo inai nwefwa mo keenghulunghedi odo. Oha ulikile yo ondjila yepepelelo ovo ve udite va teyaulwa kokupangelwa komapangelo opapolotika nosho yo ovo va wililwa po koulunde. Jesus okwe va hololela nghee omatimba avo taa dulu okudimwa po nanghee tava dulu okukala ve na ombili naKalunga.

Aveshe ovo hava tambula ko ondjoko yaJesus otava dulu okuliyapulila Kalunga nokulongela  Tate yetu womeulu omunalukeno nomunanghenda. Okuninga ngaho kashi fi omutengi, molwaashi osho Kalunga ta pula kufye kashi fi shidjuu. — 1 Johannes 5:3.