Inda koshikalimo

Inda koshikalimo

 ETUKULWA 109

Jesus ta tokola ovapataneki vomalongelokalunga

Jesus ta tokola ovapataneki vomalongelokalunga

MATEUS 22:41–23:24 MARKUS 12:35-40 LUKAS 20:41-47

  • KRISTUS OMONA WALYELYE?

  • JESUS TA NYANEKE POMUTENYA OIHELELE YOVAPATANEKI VAYE

Ovapataneki vomalongelokalunga ova li va nyengwa okukwata po Jesus noku mu twala kovapangeli vaRoma. (Lukas 20:20) Ofimbo va li natango motembeli mo 11 Nisan, Jesus okwa li a nyaneka pomutenya oihelele yavo. Okwe va pula a ti: “Otamu diladila ngahelipi shi na sha naKristus? Omona walyelye?” (Mateus 22:42) Ovanhu ova li ve shii nawa kutya Kristus ile Messias ota ka dja mepata laDavid. Ova li va nyamukula kutya ota ka dja mepata laDavid. — Mateus 9:27; 12:23; Johannes 7:42.

Jesus okwa pula a ti: “Omolwashike hano David a li a nwefwa mo kuKalunga e mu ifane Omwene? Eshi a ti, ‘Jehova okwa lombwela Omwene wange, a ti: “Kala omutumba kolulyo lange fiyo ohandi tula ovatondi voye koshi yeemhadi doye.”’ Hano ngeenge David okwe mu ifana Omwene, ongahelipi e li omona waye?” — Mateus 22:43-45.

Ovafarisai ova li va mwena molwaashi ova li va teelela oo a li ta ka dja moludalo laDavid e va mangulule ko kepangelo laRoma. She likolelela keendjovo daDavid odo di li mEpsalme 110:1, 2, Jesus okwa li e va lombwela kutya Messias ota ka ninga shihapu shihe fi ashike okukala omupangeli wopanhu. Oku li Omwene waDavid, nokonima ngeenge a kala omutumba kolulyo laKalunga ota ka pangela. Enyamukulo laJesus ola li la mweneka ovapataneki vaye.

Ovahongwa nosho yo vamwe ova kala tava pwilikine. Opo nee Jesus okwa li e va londwela shi na sha novanongo vomishangwa nosho yo Ovafarisai. Ovanongo vomishangwa novafarisai ova li ve “litula pondodo yaMoses” opo va honge Omhango yaKalunga. Jesus okwa lombwela ovapwilikini vaye a ti: “Ashishe osho tave mu lombwele, shi ningeni noku shi diinina, ndele inamu hopaenena oilonga yavo, osheshi ohava popi ashike, ndele ihava longo osho hava popi.” — Mateus 23:2, 3.

Jesus okwa yandja oihopaenenwa i na sha noihelele yavo, a ti: “Ohava nenepeke oundjato voshipa ve na omishangwa ovo hava djala nelalakano lokuliamena.” Ovajuda vamwe ova li hava djala oundjato mombaba yoshipala ile kokwooko omo hamu kala outukulwa vanini va dja mOmhango. Ovafarisai ova li hava nenepeke oundjato vavo opo ve limonikife kutya ove hole Omhango. Ova li yo hava “lelepeke eenyemba doikutu yavo.” Ovaisrael ova li ve na okutula eenyemba koikutu yavo, ashike Ovafarisai ova li hava shilipaleke kutya eenyemba davo odile. (Numeri 15:38-40) Ova li hava ningi oinima aishe oyo “opo ve limonikife kovanhu.” — Mateus 23:5.

Nokuli novahongwa vaJesus otashi dulika va kale ve lihalela eendodo, nomolwaasho a li e va kunghilila, a ti: “Inamu ifanwa Omuhongi, osheshi omu na ashike Omuhongi umwe aeke, ndele nye amushe ovamwainafana. Natango, inamu ifana nande oumwe Xo kombada yedu, osheshi omu na ashike Xo umwe aeke, oo e li meulu. Inamu ifanwa yo ovawiliki, osheshi Omuwiliki weni umwe aeke, Kristus.” Ovahongwa ova li ve na okulitala ko nokukatuka ngahelipi? Jesus okwe va lombwela a ti: “Ou munene mokati keni na kale omuyakuli weni. Keshe ou te linenepeke ota ka ninipikwa, nakeshe ou te lininipike ota ka nenepekwa.” — Mateus 23:8-12.

Jesus okwa li a tokola ovanongo vomishangwa nOvafarisai ovanaihelele, a ti: “Woo ovanongo vomishangwa nOvafarisai, ovanaihelele nye! Osheshi omwa idilila po ovanhu oshivelo shOuhamba womeulu; molwaashi nye vene itamu i mo, notamu kelele mo ovo va hala okuya mo.” — Mateus 23:13.

 Jesus okwa li a tokola Ovafarisai molwaashi kava li va fimaneka etaleko laJehova, naasho ove shi ulika mwaasho va popya. Pashihopaenenwa, ova ti: “Ngeenge umwe okwa ane kotembeli, ke na okuwanifa po eano olo, ndele ngeenge umwe okwa ane koshingoli shotembeli, oku na okuwanifa po eano laye.” Ova li va twika molwaashi ova li tava yandje elitulemo koshingoli shotembeli ponhele yokuyandja elitulemo kotembeli yo vene omo hava longele Jehova nokweehena popepi naye. Ohava “efa oinenenima yOmhango ngaashi ouyuki, onghenda noudiinini.” — Mateus 23:16, 23; Lukas 11:42.

Jesus okwa ula Ovafarisai ovo a ti: “Ovakwatiketi ovapofi nye, omwe otamu i dindi mo, ndele ongamelo otamu i pona po!” (Mateus 23:24) Ohava dindi mo omwe momaviinyu avo molwaashi oya talika ko inai koshoka. Ashike ova efa oinenenima yOmhango, ngaashi okupona ongamelo, oyo nayo ya talika ko inai koshoka. — Levitikus 11:4, 21-24.