Inda koshikalimo

Inda koshikalimo

 ETUKULWA 20

Jesus ta longo oshikumwifilonga oshitivali ofimbo e li muKana

Jesus ta longo oshikumwifilonga oshitivali ofimbo e li muKana

MARKUS 1:14, 15 LUKAS 4:14, 15 JOHANNES 4:43-54

  • JESUS TA UDIFA KUTYA “OUHAMBA WAKALUNGA OWA EHENA POPEPI”

  • JESUS TA VELULA OKAMATI OKO KALI KOKULE NAYE

Konima eshi Jesus a kala muSamaria oule womafiku avali, okwa shuna keduumbo lavo. Okwa li a tamununa mo oukalele waye muJudea, ashike ka li ta i kuGalilea nelalakano loku ka fuda po. Ponhele yaasho, okwa li a hovela okutamununa mo oukalele waye moshilando omo a putukila. Jesus ka li a teelela a tambulwe ko, molwaashi okwa popya kutya “omuprofeti iha fimanekwa moshilando shavo.” (Johannes 4:44) Ovahongwa vaye ova li va shuna komaukwaneumbo avo nosho yo koilonga yavo ponhele yokukala naye.

Jesus okwa li a hovela okuudifa kombinga yetumwalaka lilipi? Etumwalaka ololo kutya: ‘Ouhamba waKalunga owa ehena popepi. Lidilululeni, nye mu itavele onghundana iwa.’ (Markus 1:15) Ovanhu ova li ve linyenga ngahelipi? Ovagalilea vahapu ova li va tambula ko Jesus nawa nova li ve mu fimaneka. Kava li ashike ve shi ninga omolwetumwalaka laye. Vamwe vomuGalilea ova li va ya koshivilo shOpaasa muJerusalem eemwedi da dja ko nova li va mona Jesus ta longo oikumwifilonga inene. — Johannes 2:23.

Openi Jesus a hovela okutamununa mo oukalele waye muGalilea? Okwa hovela muKana, omo a li a shitukifa omeva omaviinyu poshivilohombolo. Eshi a li omo oshikando shaye oshitivali, okwa li a uda kutya ope na omumati ta ehamenene noku li pokufya. Omumati oo omonamati welenga laHerodes Antipas, ohamba oyo lwanima ya ka tetifa ko omutwe waJohannes Omuninginifi. Elenga olo ola li la uda kutya Jesus okwa dja mo muJudea a ya kuKana. Ola li la dja mo meduumbo lavo muKapernaum nokuya kuKana li ka konge Jesus. Ola li la nyika oluhodi, ndele tali mu pula tali ti: “Omwene, ila tu ye fimbo okaana kange inaka fya.” — Johannes 4:49.

Jesus okwe mu nyamukula neendjovo odo da kumwifa omulumenhu oo, a ti: “Shuna keumbo, omonamati woye okwa veluka.” (Johannes 4:50) Elenga laHerodes ola itavela osho Jesus a li a popya nola shuna keumbo. Fimbo la li mondjila, ola shakenekwa kovapiya valo ndele tave mu lombwele onghundana iwa. Ova ti omonamati waye okwa veluka noku na omwenyo. Okwa li ta kendabala okuuda kutya osha enda ngahelipi, eshi e va pula ta ti: ‘Okwa veluka efimbo peni?’

Ova nyamukula va ti: “Okwa veluka onghela poimwe yomutenya lwaapo.” — Johannes 4:52.

Elenga ola li la didilika kutya olo olo la li efimbo Jesus a ti: “Omonamati woye okwa veluka.” Konima yaasho, omulumenhu oo e na ovapiya, nosho yo ovaneumbo vaye aveshe ova li va ninga ovahongwa vaKristus.

Jesus okwa li a longa oikumwifilonga ivali muKana, a shitukifa omeva omaviinyu nosho yo a velula okamati oko kali kokule oule weekilometa 26. Ndele oyo hayo aike oikumwifilonga a li a longa. Ashike oshikumwifilonga shokuvelula oshididilikwedi molwaashi otashi ke mu didilikifa mo eshi ta ka shuna kuGalilea. Osha yela kutya omuprofeti oo okwa hokiwa kuKalunga, ndele mbela ongahelipi ‘ta ka fimanekwa moshilando shavo’?

Osho otashi ke limonikila ngeenge Jesus a shuna keduumbo lavo kuNasaret. Oshike sha li she mu tuvikililwa?