Inda koshikalimo

Inda koshikalimo

 ETUKULWA 13

Lihonga kunghee Jesus a li a finda omayeleko nomupondo

Lihonga kunghee Jesus a li a finda omayeleko nomupondo

Diva eshi Jesus a ninginifwa kuJohannes, omhepo yaKalunga oye mu twala mombuwa kuJudea. Okwa li e na okudiladila koinima ihapu. Konima eshi Jesus a ninginifwa, “eulu ola yeuluka.” (Mateus 3:16) Osho osha li she mu dimbulukifa oinima oyo a li e lihonga naayo a li a ninga meulu. Oshoshili kutya okwa li e na shihapu okudilonga kusho.

Jesus okwa kala mombuwa oule womafiku 40. Moule wefimbo alishe olo, ka li a lya sha. Opo nee eshi Jesus a li a fya ondjala neenghono, Satana Ondiaboli okwe uya kuye ndele te mu hongaula ta ti: “Ove ngeenge omona waKalunga, lombwela omamanya aa a shituke omingome.” (Mateus 4:3) Molwaashi Jesus okwa li e shi shii kutya osha puka okulongifa eenghono daye pashikumwifilonga opo a wanife po omahalo aye opambelela, okwe shi anya filufilu.

Ondiaboli kaya li ashike ya xulila opo. Oya li ya kendabala vali onghedi imwe yoku mu yeleka. Oya li ya lombwela Jesus e liumbe ko kombada yekuma lotembeli. Ashike Jesus ka li e na ehalo lokuliumba ko kombada yekuma lotembeli opo ngeno ovaengeli ve mu xupife. Jesus okwa tofa mOmishangwa ta ulike kutya osha puka okuyeleka Kalunga monghedi ya tya ngaho.

Oshikando oshititatu, Ondiaboli oya li ye mu ulikila “omauhamba aeshe omounyuni newapalo lao,” ndele tai ti kuye: “Oinima aishe ei ohandi i ku pe ngeenge owa twile nge eengolo nokulinyongamena nge.” Opo nee Jesus okwa anya ndele ta ti kuyo: “Dja po Satana!” (Mateus 4:8-10) Jesus ka li e liyandja keyeleko olo, molwaashi okwa li e shi shii kutya Jehova oye aeke e na okulongelwa. Okwa kala omudiinini kuKalunga.

Ohatu dulu okulihonga mo sha momayeleko oo nanghee Jesus a ungaunga nao. Omayeleko oo okwa li a ningwa shili, notaa ulike kutya Ondiaboli kai fi ashike owii wongaho ngaashi vamwe hava diladila. Ndele oi li omunhu wolela iha monika. Osho otashi ulike yo kutya omapangelo aeshe omounyuni otaa pangelwa kOndiaboli. Ngeno omayeleko oo kaali oshili, ngeno Satana okwa dula ngahelipi okuyeleka Kristus?

Natango, Ondiaboli oya popya kutya ngeenge Jesus okwe mu linyongamene ote ke mu pa omauhamba aeshe omounyuni. Ondiaboli otashi dulika i kendabale oku tu yeleka monghedi ya faafana, mokweetifa po eemhito odo tadi dulu oku tu ningifa tu mone omaliko, eenghonopangelo ile eendodo. Otashi ka kala pandunge okushikula oshihopaenenwa shaJesus mokukala ovadiinini kuKalunga nonande ohatu yelekwa. Dimbuluka kutya Ondiaboli oya li ashike ya dja po puye “ndele tai teelele i mone omhito imwe vali tai wapalele.” (Lukas 4:13) Nafye otashi dulika tu yelekwe meenghedi da tya ngaho, ashike inatu efa okulwa nokukala oupafi.