Inda koshikalimo

Inda koshikalimo

 ETUKULWA 139

Jesus ota ka eta Oparadisa nokuwanifa po oshinakuwanifwa shaye

Jesus ota ka eta Oparadisa nokuwanifa po oshinakuwanifwa shaye

1 OVAKORINTO 15:24-28

  • OSHO TASHI KA NINGILWA EEDI NOIKOMBO

  • VAHAPU OTAVA KA HAFELA OPARADISA KOMBADA YEDU

  • JESUS OKWA ULIKA KUTYA OKU LI ONDJILA, NOSHILI, NOMWENYO

Diva eshi Jesus a ninginifwa, okwa li a ponokelwa komutondi oo a li ina hala a pondole nokuli fimbo ina hovela oukalele waye. Ondiaboli oya li ya kendabala okuyeleka Jesus lwoikando. Lwanima, Jesus okwa popya kombinga yayo a ti: “Omupangeli wounyuni ou ote uya noke na eenghono dokupangela nge.” — Johannes 14:30.

Omuyapostoli Johannes okwa li a mona emoniko li na sha naasho tashi ka ningilwa “ongadu inene, eyoka likulu olo hali ifanwa Ondiaboli nosho yo Satana.” Omutondi wovanhu oo okwa umbwa mo meulu, nokwe uya a ‘handuka neenghono osheshi oku shi shii kutya oku na ko efimbo lixupi.’ (Ehololo 12:9, 12) Ovakriste ove na omatomheno a femba okwiitavela kutya oku na ‘efimbo lixupi’ nosho yo kutya mafiku “ongadu, eyoka likulu,” otai ka mangelwa mombwili oule womido 1 000 ofimbo Jesus ta pangele mOuhamba waKalunga. — Ehololo 20:1, 2.

Momukokomoko womido odo, oshike tashi ka ningilwa edu? Oolyelye tava ka kala ko, notava ka kala monghalo ya tya ngahelipi? Enyamukulo olo Jesus a li a yandja ola li le shi yelifa nawa. Mefaneko laye li na sha needi noikombo, okwa popya osho sha tuvikililwa ovayuki ovo va fa eedi, ovo hava longele kumwe nohava ungaunga nawa novamwaxe vaye. Okwa yelifa yo osho tashi ka ningilwa ovo ve li ngaashi oikombo. Jesus okwa ti: “Ava [oikombo] otava ka hanaunwa po fiyo alushe, ndele ovayuki [eedi] otava ka kala nomwenyo fiyo alushe.” — Mateus 25:46.

Osho otashi tu kwafele tu ude ko eendjovo odo Jesus a li a lombwela omukolokoshi oo a li a valelwa pamwe naye. Jesus ka li a udanekela omukolokoshi oo ondjabi ya faafana naayo a udanekela ovayapostoli vaye ovadiinini, yoku ka kala pamwe naye mOuhamba womeulu. Ponhele  yaasho, okwa li a udanekela omukolokoshi oo e lidilulula a ti: “Oshili ohandi ku lombwele nena eli, oto ka kala pamwe naame mOparadisa.” (Lukas 23:43) Kungaho, omulumenhu oo okwa li a mona eteelelo loku ka kala mOparadisa, oyo i li oshikunino shiwa. Kunena, ovo ve li ngaashi eedi, navo “otava ka kala nomwenyo fiyo alushe” mOparadisa.

Osho otashi tu kumwe naasho omuyapostoli Johannes a li a popya shi na sha nonghalo oyo tai ka kala kombada yedu. Okwa ti: “Etwali laKalunga oli li povanhu, nota ka kala pamwe navo, notava ka ninga oshiwana shaye. Kalunga mwene ota ka kala pamwe navo. Ota ka feta po omahodi aeshe momesho avo, nefyo itali ka kala po vali, ile oluhodi, okulila nouyahame itau ka kala po vali. Oinima ikulu oya xula po.” — Ehololo 21:3, 4.

Opo omukolokoshi oo a ka hafele onghalamwenyo mOparadisa, oku na oku ka nyumunwa. Haye aeke ta ka nyumunwa molwaashi Jesus okwa yelifa a ti: “Efimbo otali uya eshi aveshe ovo ve li meembiladimbuluko tava ka uda ondaka yaye, ndele tava di mo, ava va longa ouwa otava ka nyumukila omwenyo, naava va longa owii otava ka nyumukila etokolo.” — Johannes 5:28, 29.

Ndele ongahelipi shi na sha novayapostoli ovadiinini nosho yo oshixupe shaavo tava ka kala pamwe naJesus meulu? Ombiibeli oya ti: “Otava ka ninga ovapristeri vaKalunga novaKristus, notava ka pangela ve li eehamba pamwe naKristus oule womido 1 000.” (Ehololo 20:6) Vamwe ofimbo va li kombada yedu ova li ovalumenhu vo vamwe ovakainhu. Otava ka pangela nonghenda noneyavelelo ovanhu ovo tava ka kala kombada yedu. — Ehololo 5:10.

Jesus ota ka longifa ekuliloyambo laye opo ovanhu aveshe kombada yedu va mone mo ouwa noitava ka kala vali noulunde oo va fyuulula. Ye nosho yo ovapangeli pamwe naye otava ka twala ovanhu ovadiinini mewaneneno. Ovanhu otava ka hafela onghalamwenyo ngaashi Kalunga a li a lalakanena eshi a lombwela Adam naEva va dalafane nokuyadifa edu. Nokuli nefyo olo la etifwa koulunde waAdam itali ka kala po vali.

Kungaho, Jesus ota ka wanifa po ashishe osho Jehova e mu pula a longe. Pexulilo lomido eyovi dokupangela kwaye, ota ka yandja Ouhamba nosho yo ovanhu va wanenena kuXe. Omuyapostoli Paulus okwa shanga shi na sha naasho Jesus ta ka ninga, a ti: “Ngeenge Kalunga okwa tula oinima aishe koshi yeemhadi dOmona, Omona naye ote ke liyandja kuKalunga oo e mu pa oinima aishe, nokungaho Kalunga oye aeke ta ka kala Omupangeli woinima aishe.” — 1 Ovakorinto 15:28.

Osha yela kutya Jesus ota dana onghandangala ya fimana mokuwanifa po elalakano laKalunga. Eshi ta ka wanifa po omaudaneko aeshe oo, ota ka ulika filufilu kutya eendjovo odo a popya di na sha naye odoshili, eshi a ti: “Aame ondjila, noshili nomwenyo.” — Johannes 14:6.