Inda koshikalimo

Inda koshikalimo

 ETUKULWA 34

Jesus ta hoolola ovayapostoli vaye omulongo navavali

Jesus ta hoolola ovayapostoli vaye omulongo navavali

MARKUS 3:13-19 LUKAS 6:12-16

  • OVAYAPOSTOLI 12

Opa pita hanga omudo umwe netata eshi Johannes Omuninginifi a lombwela ovanhu kutya Jesus oku li Odjona yaKalunga. Eshi Jesus a hovela oukalele waye, ovalumenhu vamwe ovanamitima diwa ova li va ninga ovahongwa vaye, ngaashi Andreas, Simon Petrus, Johannes, Jakob tashi dulika (omumwaina waJohannes), Filippus nosho yo Bartolomeus (oo ha ifanwa yo Natanael). Mokweendela ko kwefimbo, vahapu ova ka shikula Kristus. — Johannes 1:45-47.

Jesus okwa li e lilongekida okuhoolola ovayapostoli vaye. Otava ka kala ve na ekwatafano lopofingo naye nokupewa edeulo le likalekelwa. Ashike fimbo ine va hoolola, okwa li a ya komhunda oyo tashi dulika ya li popepi nefuta laGalilea, popepi naKapernaum. Okwa kala oufiku aushe ta ilikana, ta pula Kalunga e mu pe ounongo noku mu nangeke noupuna. Efiku la landula ko okwa li a ifana ovahongwa vaye nokuhoolola mo 12, ve li ovayapostoli.

Jesus okwa li a hoolola ovo omadina avo a tumbulwa pehovelo nosho yo Mateus oo a shivwa kuJesus a efe po oilonga yaye e li omufendelifi. Vakwao vatano ovo Judas (oo ha ifanwa yo Tadeus, “omona waJakob”), Simon Omukanaan, Tomas, Jakob omona waAlfeus naJudas Iskariot. — Mateus 10:2-4; Lukas 6:16.

Jesus okwa li a ya pamwe novayapostoli vaye 12, nokwa li e va shii nawa. Vahapu vomuvo ovapambele vaye. Jakob naJohannes ovo ovapambele votete vaJesus ve mu shikula. Ngeenge Alfeus omumwaina waJosef, xe yaJesus wopambelela, ngaashi vamwe hava diladila, osha yela kutya omonamati waAlfeus, omuyapostoli Jakob, omupambele waJesus.

Jesus okwa li e shii nawa omadina ovayapostoli vaye. Mbela oto dimbuluka omadina avo? Osho tashi dulu oku ku kwafela u dimbuluke omadina avo oshosho kutya ope na ooSimon vavali, ooJakob vavali nosho yo ooJudas vavali. Natango, Simon (Petrus) omumwaina waAndreas nosho yo Jakob (omona waSebedeus) omumwaina waJohannes. Oyo oyo onghedi ipu yokudimbuluka omadina ovayapostoli ovo vahetatu. Mwaavo vane omwa kwatelwa (Mateus) omufendelifi, (Tomas) oo a li e li limbililwa, (Natanael) oo a ka ifanwa ko koshi yomuti nosho yo (Filippus) kaume kaNatanael.

Aveshe omulongo naumwe vomovayapostoli ovo ova dja kuGalilea, oshilando shooJesus. Ashike Natanael okwa dja kuKana. Filippus, Petrus nosho yo Andreas ova dja muBetsaida. Lwanima, Petrus naAndreas ova ka tembukila kuKapernaum, oko haku di Mateus. Jakob naJohannes navo ova li hava di popepi naKapernaum omo va kala ve na ongeshefa yokuyula eeshi. Osha fa shi li ngaha kutya Judas Iskariot, oo lwanima a ka kengelela Jesus, oye aeke omuyapostoli a li a dja muJudea.