Jesus okwa kala ta udifile muGalilea oule wefimbo, novanhu ova li ve linyenga nawa shi dulife muJudea. Ndele nande ongaho, e shi a li muJerusalem naashi a velula omulumenhu mefiku lEshabata, “Ovajuda ova li va hala oku mu dipaa.” — Johannes 5:18; 7:1.

Osha li opefimbo loikukaongo mo 32 O.P., nOshivilo shOmatwali osha li pokufika. Oshivilo osho osha li hashi danwa oule womafiku aheyali, nomefiku etihetatu osha li hashi shikulwa koshoongalele shiyapuki. Oshivilo osho osha li hashi didilikifa mo exulilo lomudo wounamapya nosha li hashi kala efimbo lehafo linene nolokupandula.

Ovamwainamati vaJesus, Jakob, Simon, Josef naJudas, ove mu lombwela va ti: “Inda kuJudea.” Jerusalem osha li ondingandinga yomalongelokalunga moshilongo osho. Pefimbo loivilo oyo itatu, oshilando osha li hashi kala shi yadi ovanhu. Ovamwainamati vaJesus ova li va tomhafana tava ti: “Kaku na oo ha longo sha meholeko ngeenge okwa hala okushiivika moipafi. Ngeenge oto longo oinima oyo, i longa moipafi yovanhu aveshe.” — Johannes 7:3, 4.

Ovamwainamati ovo vane “kava li ve mu itavela,” e li Messias. Ashike nande ongaho, ova li va hala ovo va li va ongala poshivilo ve mu mone eshi ta longo oikumwifilonga. Eshi Jesus a didilika oupyakadi oo, okwe va lombwela a ti: “Ounyuni itau dulu okukala u mu tonde, ndele ou tonde nge shaashi ohandi popi kutya oilonga yao oii. Nye indeni ashike koshivilo, ame itandi i ko paife molwaashi efimbo lange inali fika natango.” — Johannes 7:5-8.

Konima yomafiku onhumba, ovamwainamati vaJesus ova li va ya nongudu yovaendi, na Jesus nosho yo ovahongwa vaye ova li va ya meholeko opo vaha monike kovanhu. Ova li va ya nondjila oyo ya pita muSamaria ponhele yokuya nondjila oyo i shiivike nawa i li popepi nomulonga waJordan. Jesus novahongwa vaye ova li va pumbwa onhele yokunangala muSamaria, onghee okwa li a tuma ovahongwa vaye ve mu tetekele komesho ve ke mu longekidile onhele. Ashike ovanhu muSamaria kava li ve va tambula ko, molwaashi Jesus okwa li ta i kuJerusalem koshivilo shOvajuda. Jakob naJohannes ova li va handuka, ndele tava pula Jesus tava ti: “Omwene, natu ifane omundilo meulu u va lungwinife po?” (Lukas 9:54) Jesus okwa li e va hanyena omolweetepo olo, ndele tava twikile nolweendo lavo.

Ofimbo va li mondjila, omunongo womishangwa okwa li a lombwela Jesus ta ti: “Omuhongi, ohandi ke ku shikula keshe apa to i.” Jesus okwa tya kuye: “Ouvandje ove na omikwena, needila dokeulu odi na oihadi, ndele Omona womunhu ke na apa ta tenheke omutwe waye.” (Mateus 8:19, 20) Okwa li ta ulike kutya omunongo womishangwa  ota ka mona oixuna ngeenge okwa ningi omushikuli waye. Osha fa shi li ngaha kutya omunongo womishangwa ka li a hala okutambula ko onghalamwenyo ya tya ngaho molwaashi okwa li e na ounhwa. Onghee hano, keshe umwe ne lipule kutya, ‘Mbela onde lilongekida ngoo okushikula Jesus?’

Jesus okwa li a lombwela vali omulumenhu umwe a ti: “Ninga omushikuli wange.” Omulumenhu oo okwe mu nyamukula a ti: “Omwene, pitike nge manga ndi ye ndi ka pake tate.” Jesus okwa li e shii onghalo yomulumenhu oo, ndele ta ti kuye: “Efa ovafi va pake ovafi vavo, ndele ove inda u ka udife Ouhamba waKalunga keshe pamwe.” (Lukas 9:59, 60) Paulelalela xe yomulumenhu oo ka li a fya natango. Ngeno xe yomulumenhu okwa li a fya, ngeno omulumenhu oo ita dulu okukala oko ta popi naJesus. Omulumenhu oo ka li e lilongekida okupitifa komesho Ouhamba waKalunga monghalamwenyo yaye.

Eshi va li mondjila yokuya kuJerusalem, omulumenhu vali umwe okwa lombwela Jesus ta ti: “Omwene, ohandi ku shikula, ashike pitike nge tete ndi ye ndi ka lekele vambuletu.” Jesus okwe mu nyamukula a ti: “Kape na omunhu ha kwata oshipululo, ndele ta tale konima, ta wapalele Ouhamba waKalunga.” — Lukas 9:61, 62.

Ovo va hala okuninga ovahongwa vaJesus vashili ova pumbwa okuyandja elitulemo koinima yOuhamba. Ngeenge omunhu oo ta pulula ina tala komesho, ota ka pulula eenghudu. Nongeenge okwa efa ko koshipululo opo a tale nghee a pulula, ita ka manifa oilonga yaye. Sha faafana, keshe oo ta tale koinima oyo a fiya po otashi dulika aha ka kale mondjila oyo tai twala komwenyo waalushe.