Inda koshikalimo

Inda koshikalimo

 ETUKULWA 118

Ovayapostoli tava tu eemhata kombinga yao munene mokati kavo

Ovayapostoli tava tu eemhata kombinga yao munene mokati kavo

MATEUS 26:31-35 MARKUS 14:27-31 LUKAS 22:24-38 JOHANNES 13:31-38

  • JESUS TA YANDJE OMAYELE E NA SHA NEENDODO

  • OKULIDIMBIKA KWAPETRUS TAKU XUNGANEKWA

  • OHOLE OHAI DIDILIKIFA MO OVASHIKULI VAJESUS

Jesus okwa honga oshilihongomwa sha fimana shi na sha nokukala nelininipiko eshi a kosha eemhadi dovayapostoli vaye moufiku waye waxuuninwa pamwe navo. Omolwashike osho sha li tashi wapalele? Osha li tashi wapalele omolwounghundi oo va li va ulika. Ova li hava longele Kalunga noudiinini, ashike natango ova li have lipula kutya olyelye a fimana mokati kavo. (Markus 9:33, 34; 10:35-37) Ova li natango va ulika ounghundi oo oufiku oo.

Ovayapostoli ova li va hovela okutwa “eemhata kutya olyelye womuvo e na okutalika ko munene e dule vakwao.” (Lukas 22:24) Jesus okwa li a nyika oluhodi eshi e va mona natango tava tu eemhata. Mbela okwa li a ninga po shike?

Ponhele Jesus a hanyene ovayapostoli vaye omolwoikala nosho yo elihumbato lavo lii, okwa tomhafana navo a ti: “Eehamba doiwana ohadi i pangele, naavo ve na eenghonopangelo ohava ifanwa ovafimanekwa. Ashike nye hasho mu kala ngaho. . . . Osheshi olyelye munene, oye ou ta li ile oye ou ta yakula?” Okwa li e va dimbulukifa oshihopaenenwa osho e va tulila po, a ti: “Ndele ame ondi li mokati keni ngaashi omuyakuli.” — Lukas 22:25-27.

Nonande ovayapostoli kava li va wanenena, ova kala naJesus momaudjuu aeshe. Onghee okwa ti: Ohandi “ningi ehangano nanye ngaashi Tate a ninga ehangano naame omolwouhamba.” (Lukas 22:29) Ovalumenhu ovo ova li ovashikuli vaJesus ovadiinini. Okwe va shilipaleka kutya okupitila mehangano olo a ninga navo, otava ka kala mOuhamba nokumona efimano.

Nonande ovayapostoli ove na eteelelo olo litunhula, ove li natango ovanhu vopambelela noinava wanenena. Jesus okwa li e va lombwela a ti: “Satana okwa indila e mu yele amushe ngaashi oilya” oyo hai lihanene apeshe ngeenge tai yelwa. (Lukas 22:31) Okwa li yo e va londwela a ti: “Amushe otamu ka fiya nge po oufiku wonena, osheshi opa shangwa: ‘Ohandi ka denga omufita, needi doufita otadi ke lihana.’” — Mateus 26:31; Sakaria 13:7.

Petrus okwa li a popya nexwamo a ti: “Nande vakwetu aveshe nave ku fiye po omolwoshinima osho to ka ningilwa, ame nghi na fiku ndi ku fiye po!” (Mateus 26:33) Jesus okwa li a lombwela Petrus kutya ote ke mu lidimbika fimbo ekondobolo inali kwena luvali oufiku oo. Jesus okwa weda ko a ti: “Onde ku ilikanena opo eitavelo loye liha nghundipale, ndele shimha wa aluka, pameka ovamwaxo.” (Lukas 22:32) Petrus okwa nyamukula nouladi a ti: “Kutya nee otashi pula ndi fye pamwe naave, itandi ke ku lidimbika nande.” (Mateus 26:35) Ovayapostoli vakwao aveshe navo ova popya sha faafana.

Jesus okwa li a lombwela ovahongwa vaye a ti: “Ohandi kala nanye okafimbo kaxupi. Opo nee otamu ka konga nge, ndele ngaashi nda lombwela Ovajuda, nanye ohandi shi mu lombwele yo kutya, ‘Oku handi i itamu dulu okuuya ko.’” Okwa weda ko vali a ti: “Ohandi mu pe oshipango shipe kutya kaleni mu holafane, ndele kaleni mu holafane ngaashi ame nda kala ndi mu hole. Kungaho, ovanhu aveshe otava ka shiiva kutya nye ovahongwa vange ngeenge omu holafane.” — Johannes 13:33-35.

Eshi Petrus a uda kutya Jesus ota kala navo okafimbo kaxupi, okwe mu pula a ti: “Omwene, oto i peni?” Jesus okwa nyamukula a ti: “Oku handi i ito dulu okuya ko paife, ndele oto ke uya ko nale.” Petrus okwa li a ngwangwana, ndele ta ti: “Omwene, omolwashike itandi dulu okuya ko paife? Onde lilongekida okufya ponhele yoye.” — Johannes 13:36, 37.

Jesus okwa popya vali shi na sha nefimbo olo  a li a tuma ovayapostoli va ka udife kuGalilea vehe na ondjato yoimaliwa ile ondjato yoikulya. (Mateus 10:5, 9, 10) Okwe va pula a ti: Mbela “omwa li mwa hepa sha?” Ova nyamukula va ti: “Ahowe.” Ndele oshike osho va li tava ka ninga komafiku okomesho? Jesus okwa li e va pa elombwelo a ti : “Ou e na ondjato yoimaliwa naao e na yoikulya ne i kufe nosho yo ou ehe na eongamukonda na landife po oshikutu shaye shokombada e lilandele eongamukonda. Ndele ohandi mu lombwele kutya osho sha shangwa oshi na okuwanifilwa nge, eshi kwa tiwa: ‘Okwa valulilwa movakolokoshi.’ Onghee eshi otashi wanifilwa nge.” — Lukas 22:35-37.

Jesus okwa li ta popi shi na sha nefimbo olo ta ka valelwa komuti womahepeko pamwe novakolokoshi ile ovahenakalunga. Nokudja opo ovashikuli vaye ova li tava ka shakeneka omapataneko a kwata moiti. Ova li ve wete kutya ove lilongekida ndele tava ti: “Omwene, tala, apa ope na omaongamukonda avali.” Okwe va nyamukula a ti: “Okwa wana.” (Lukas 22:38) Jesus okwa li ta ka longifa omaongamukonda avali oo va li ve na opo e va honge oshilihongomwa sha fimana.