Inda koshikalimo

Inda koshikalimo

 ETUKULWA 25

Jesus a kenukila omunashilundu ndele te mu velula

Jesus a kenukila omunashilundu ndele te mu velula

MATEUS 8:1-4 MARKUS 1:40-45 LUKAS 5:12-16

  • JESUS TA VELULA OMUNASHILUNDU

Eshi Jesus novahongwa vaye vane va ka udifa “meeshinagoga muGalilea ashishe,” eenghundana diwa di na sha naasho Jesus a ninga oda li da tandavela apeshe. (Markus 1:39) Oinima oyo Jesus a ninga oya li ya udika koshilando shimwe oko kwa li omulumenhu e na oshilundu. Omuhakuli Lukas okwa popya kombinga yomulumenhu oo kutya ota “vele neenghono oudu woshilundu.” (Lukas 5:12) Omukifi oo omudipai ngeenge u li poshitwa shaxuuninwa, ohau li oilyo yolutu kanini nakanini.

Omunashilundu oo okwa li e li monghalo inyikifa oluhodi oyo tai pula a kale kokule novanhu. Natango, okwa li e na okwiingida ta ti “Omunashilundu! Omunashilundu!” eshi ovanhu tava ehene popepi naye, naasho osha li tashi va kwafele vaha ehene popepi naye novaha kwatwe koshilundu. (Levitikus 13:45, 46) Ndele mbela omunashilundu oo ota ka ninga po shike? Omunashilundu oo okwa ya kuJesus, ndele te linyongamene puye ta ti: “Omwene, ngeenge owa hala, oto dulu okuvelula nge.” — Mateus 8:2.

Omulumenhu oo ka li tuu e na eitavelo muJesus! Okwa li mu etifa ongheda eshi a li e na omukifi oo. Jesus okwa li te ke linyenga ngahelipi? Ngeno opo wa li, ngeno owa ninga po shike? Jesus okwa li e linyengifwa konghenda, ndele ta yelula eke laye ndele ta kumu omulumenhu omunashilundu. Jesus okwa tya kuye: “Onda hala! Veluka.” (Mateus 8:3) Otashi dulika sha li shidjuu kuvamwe okwiitavela kutya omulumenhu oo omunashilundu okwa veluka diva koudu waye.

Mbela ino hala oku ka kala u na ohamba oyo i na onghenda noya wana ngaashi Jesus? Onghedi omo Jesus a ungaunga nomunashilundu oo otai tu shilipaleke kutya eshi ta ka pangela kombada yedu alishe e li Ohamba, ota ka wanifa po exunganeko lOmbiibeli olo tali ti: “Otai ningile omuxupi nohepele olukeno, notai xupifa eemwenyo deehepele.” (Epsalme 72:13) Jesus ota ka wanifa po eemhumbwe dovanhu nokukwafela aveshe ovo va wililwa po.

Dimbuluka kutya ofimbo Jesus ina velula omunashilundu oo, oukalele waye owa li wa etela ovanhu ehafo linene. Ashike paife ovanhu otava ka uda kombinga yoinima itunhula oyo Jesus a ninga. Ndele Jesus ka li a hala ovanhu ve mu itavele ashike ngahenya she likolelela kwaasho va uda. Jesus okwa li e shii exunganeko olo kombinga yaye kutya ‘ondaka yaye ite i yelula pombada momapandavanda’ monghedi ikumwifi. (Jesaja 42:1, 2) Okwa li a londwela omunashilundu oo a li a velula a ti: “Tala, ino lombwela nande oumwe, ashike inda u ke liulike komupristeri nokuyandja omayambo ngaashi sha popiwa mOmhango yaMoses.” — Mateus 8:4.

Diladila kunghee omulumenhu oo a li a hafa eshi a li a velulwa noka li ta dulu oku shi mwenenena. Okwa li a ya nokutandaveleka onghundana oyo keshe pamwe. Osho osha li sha pendula ohokwe yovanhu. Jesus ka li vali ta dulu okuya moshilando, ashike okwa li a ya konhele ye likalela oule wokafimbo oko kuhe na ovanhu. Natango, ovanhu ova li va dja keenhele da yoolokafana ve uya okuhongwa kuye nokuvelulwa.