Inda koshikalimo

Inda koshikalimo

 ETUKULWA 76

Jesus ta li pamwe nOmufarisai

Jesus ta li pamwe nOmufarisai

LUKAS 11:37-54

  • JESUS TA TOKOLA OIHELELE YOVAFARISAI

Ofimbo Jesus a li muJudea, okwa li a tambula ko eshivo loku ka lya pamwe nOmufarisai. Otashi dulika a li a shivwa a ka lye omwisha. (Lukas 11:37, 38; yelekanifa naLukas 14:12) Ovafarisai ova li ve na onghedindjikilile yokulikosha keenyala fiyo opeengolo domaoko ofimbo inava lya. Ashike Jesus hasho a li ha ningi ngaho. (Mateus 15:1, 2) Okulikosha keenyala fiyo opeengolo domaoko itashi nyono Omhango yaKalunga, nokashi fi oshinima osho Kalunga ta pula tu ninge.

Omufarisai okwa li a kumwa eshi Jesus iha landula onghedindjikilile oyo. Eshi Jesus eshi mona mo, okwa ti: “Ovafarisai nye, ohamu kosho eholo netiti kombada, ndele meni leni omu yadi olwisho noukolokoshi. Omalai nye! Mbela ou a shita eshi shokombada haye a shita yo shomeni?” — Lukas 11:39, 40.

Oihelele yomalongelokalunga oya li oshinima sha kwata moiti, shi dulife okulya we likosha keenyala. Ovafarisai nosho yo vamwe ovo va fimaneka onghedindjikilile oyo yokulikosha keenyala fiyo opeengolo domaoko, ova dopa okuyelifa omitima davo koukolokoshi. Opo nee Jesus okwe va pa omayele a ti: “Kaleni hamu yandje eeshalinghenda tashi di komutima opo mu dule okukala mwa yela filufilu.” (Lukas 11:41) Oshoshili kutya otu na okuyandja kuvamwe tashi di komutima, ndele hamolwaashi twa hala okuliulika kutya fye ovayuki.

Ashike osho inashi hala okutya ovalumenhu ovo kava li hava yandje. Jesus okwa popya a ti: “Ohamu yandje oshitimulongo shomint, shorue noshoikwambidi aishe yomepya, ashike ohamu efa ouyuki nohole yokuhola Kalunga! Oinima oyo omwa li mu na oku i wanifa po, naikwao kamu na oku i efa po.” (Lukas 11:42) Omhango yaKalunga oya li tai pula ovanhu va yandje oshitimulongo shoilikolomwa yavo yomomapya. (Deuteronomion 14:22) Osho osha li sha kwatela mo omint, orue nosho yo oikwambidi ile tu tye oihemba oyo hai yandje omulyo koikulya. Ovafarisai ova li hava yandje oitimulongo yoihemba oyo, ndele ongahelipi shi na sha nokuwanifa po oiteelelwa yOmhango oyo ya fimana, ngaashi okulonga osho sha yuka nokweenda nelininipiko pamwe naKalunga? — Mika 6:8.

Jesus okwa weda ko a ti: “Woo Ovafarisai nye, osheshi omu hole okukala omutumba koipundi yokomesho meeshinagoga nokupopifwa monghedi ye likalekelwa peenhele domalandifilo. Woo nye, osheshi omwa fa eembila da fufala po, ovanhu tava ende kudo ndele inave shi didilika.” (Lukas 11:43, 44) Ovanhu otashi dulika va ende keembila da tya ngaho notava ka kala inava koshoka. Jesus okwa longifa efaneko olo opo a ulike kutya okuhenoukoshoki kwOvafarisai itaku didilikwa mo noupu. — Mateus 23:27.

Omulumenhu umwe oo a li e shii nawa Omhango yaKalunga okwa popya a ti: “Muhongi, eshi to popi ngaho nafye oto tu tuku.” Ashike ovalumenhu ovo kava li va mona kutya ova dopa okukwafela ovanhu. Jesus okwa ti: “Woo nanye yo ovanongo vomhango, osheshi ohamu twike ovanhu omitengi didjuu okuhumbata, ashike nye vene ihamu di kumu nande onomunwe weni! Woo nye, osheshi omwa tunga eembila dovaprofeti, ndele ova dipawa kooxokulululwa.” — Lukas 11:45-47.

Omutengi oo Jesus a li ta popi owa li u na sha neenghulunghedi nosho yo nghee Ovafarisai hava fatulula Omhango. Ovalumenhu ovo ova li va djuupaleka onghalamwenyo yovanhu. Ova li yo va fininikila ovanhu oinima oyo i li omutengi kuvo. Ooxekulululwa ova dipaa ovaprofeti vaKalunga, okudja kuAbel. Ashike paife otave liningifa  va fa tava fimaneke ovaprofeti moku va tungila eembila, ashike paulelalela otava hopaenene oikala nosho yo eenghatu dooxekulululwa. Ova li va hala okudipaa Omuprofeti munenenene waKalunga. Jesus okwa ti Kalunga ota ka tokola epupi olo. Naasho osha li sha ningwa mo 70 O.P, konima yeedula 38 lwaapo.

Jesus okwa weda ko a ti: “Woo nye ovanongo vomhango, osheshi omwa kufa po oshapi yokupatulula omuvelo wokushiiva Kalunga. Nye vene inamu ya mo, ndele ohamu kendabala okukelela ovo tava i mo.” (Lukas 11:52) Ovalumenhu ovo ova li ve na oshinakuwanifwa shokuhonga ovanhu Eendjovo daKalunga, ndele ponhele yaasho, ova xutwifa omhito yoku va honga noku va kwafela ve di ude ko.

Ovafarisai novanongo vomishangwa ova li ve linyenga ngahelipi? Eshi Jesus a li ta i, ova li va hovela oku mu pataneka va handuka noku mu pula omapulo mahapu. Kava li tava pula Jesus shaashi va hala okushiiva shihapu, ndele ponhele yaasho, ova li va hala oku mu kengelela opo a popye sha osho tashi dulu oku mu tulifa modolongo.