Inda koshikalimo

Inda koshikalimo

 ETUKULWA 12

Jesus ta ninginifwa

Jesus ta ninginifwa

MATEUS 3:13-17 MARKUS 1:9-11 LUKAS 3:21, 22 JOHANNES 1:32-34

  • JESUS TA NINGINIFWA NOKUVAEKWA

  • JEHOVA TA POPI KUTYA JESUS OMONA WAYE

Konima yeemwedi hamano eshi Johannes Omuninginifi a hovela okuudifa, Jesus oo a li e na omido 30 lwaapo, okwa li e uya kuye komulonga waJordan. Omolwashike mbela? Ka li ashike e uya oku mu talela po ngahenya. Natango Jesus ka li e uya okutala nghee Johannes te shi endifa moilonga yaye. Ndele okwa li e uya okupula Johannes e mu ninginife.

Oshi shii okuudiwa ko eshi Johannes a anya a ti: “Aame ngeno nda wana okuninginifwa kwoove, ndele oove to uya kwaame?” (Mateus 3:14) Johannes okwa li e shii kutya Jesus Omona waKalunga e likalekelwa. Dimbuluka kutya eshi Maria a li e na eteelelo laJesus okwa li a ka talela po Elisabet ina yaJohannes, na Johannes okwa li a nhuka kehafo nonande okwa li medimo laina. Lwanima, ina okwe ke mu lombwela oshinima osho. Otashi dulika e lihonga kombinga yaasho omweengeli a popya shi na sha nokudalwa kwaJesus naashi ovaengeli ve lihololela ovafita voimuna oufiku oo Jesus a dalwa.

Johannes okwa li e shii kutya ota ninginifa ovo ve lidilulula komatimba avo. Ashike Jesus ka li e na etimba lasha. Nonande Johannes okwa li eshi anya, Jesus okwe mu nyamukula a ti: “Itavela ashike, molwaashi okuninga ngaho ohatu wanifa po ashishe osho sha yuka.” — Mateus 3:15.

Omolwashike sha li sha fimana kuJesus a ninginifwe? Jesus ka li a ninginifwa nelalakano opo omatimba aye a dimwe po. Ashike okwa ninginifwa nelalakano lokuulika kutya okwe liyandja opo a longe ehalo laXe. (Ovaheberi 10:5-7) Jesus okwa kala omuhongi womiti, ashike paife osha li efimbo lokuhovela oshilonga osho a pewa kuXe womeulu a longe kombada yedu. Mbela Johannes okwa li a teelela oshinima shikumwifi shi ningwe eshi a li ta ninginifa Jesus?

Lwanima, Johannes okwa ka popya a ti: “Ou a tuma nge ndi ninginife momeva okwa lombwela nge ta ti: ‘Ou to mono omhepo tai uya kombada yaye, oye ou te uya okuninginifa nomhepo iyapuki.’” (Johannes 1:33) Osha yela kutya Johannes okwa li a teelela omhepo yaKalunga i uye kombada yaumwe womwaavo a li ta ka ninginifa. Onghee hano, eshi Jesus a dja koshi yomeva, otashi dulika Johannes ka li a kumwa eshi a  mona “omhepo yaKalunga ya fa onghuti tai kulukile [kuJesus].” — Mateus 3:16.

Kakele kaasho, opa li pa ningwa oinima imwe vali. ‘Eulu ola li le mu yeulukila.’ Osho osha hala okutya ngahelipi? Otashi dulika tashi ulike kutya, okudja peninginifo laye, okwa li ta dulu okudimbuluka onghalamwenyo yaye yomeulu. Kungaho, Jesus okwa li ta dimbuluka onghalamwenyo yaye e li omonamati waJehova wopamhepo nosho yo oshili oyo e mu honga ofimbo a li meulu.

Natango, peninginifo laJesus, meulu omwa dja ondaka tai ti: “Ou Omona wange, omuholike, ou nde mu hokwa.” (Mateus 3:17) Ondaka oyo oya li ya lyelye? Itai dulu okukala yaJesus molwaashi pefimbo opo ova li naJohannes. Ondaka oyo oya li yaKalunga. Osho osha yela kutya Jesus Omona waKalunga, ndele Jesus ke fi Kalunga.

Jesus okwa li omonamati waKalunga wopanhu, ngaashi ashike omulumenhu wotete, Adam. Konima eshi omuhongwa Lukas a popya kombinga yeninginifo laJesus, okwa weda ko a ti: ‘Eshi Jesus a hovela oilonga yaye yokuudifa, okwa li e na omido 30 lwaapo. Ovanhu ova li ve mu tala ko e li omona waJosef, oo a li omona waEeli, omona waDavid, omona waAbraham, omona waNoa, omona waAdam, omona waKalunga.’ — Lukas 3:23-38.

Ngaashi ashike Adam a li “omona waKalunga,” Jesus naye omona waKalunga. Konima eshi a ninginifwa, okwa hovela okukala e na ekwatafano lipe naKalunga, nokungaho okwa ninga Omona waKalunga wopamhepo. Naasho otashi ulike kutya Jesus oku li pondodo yokuhonga oshili ya fimana oyo tai twala komwenyo waalushe. Jesus okwa hovela oshilonga osho tashi ke mu ningifa a yandje omwenyo waye mokweendela ko kwefimbo u ninge oikulila yovanhu aveshe.