Inda koshikalimo

Inda koshikalimo

 ETUKULWA 28

Omolwashike ovahongwa vaJesus va li ihave lidilike oikulya?

Omolwashike ovahongwa vaJesus va li ihave lidilike oikulya?

MATEUS 9:14-17 MARKUS 2:18-22 LUKAS 5:33-39

  • OVAHONGWA VAJOHANNES TAVA PULA JESUS KOMBINGA YOKULIDILIKA OIKULYA

Johannes Omuninginifi okwa kala modolongo oule wefimbo okudja eshi Jesus a li koshivilo shOpaasa shomo 30 O.P. Johannes okwa li a hala ovahongwa vaye va ninge ovashikuli vaJesus, ashike haaveshe ve shi ninga konima yeemwedi odo a kala modolongo.

Eshi Opaasa yomo 31 O.P. ya li pokufika, ovahongwa vamwe vaJohannes ova li ve uya kuJesus ndele tave mu pula tava ti: “Omolwashike fye nOvafarisai hatu lidilike oikulya ndele ovahongwa voye ihave lidilike?” (Mateus 9:14) Ovafarisai ova li have lidilike oikulya shi li onghedindjikilile yelongelokalunga. Lwanima, Jesus okwa ka longifa efaneko omo Omufarisai umwe oo e lishii ouyuki a ilikana ta ti: “Kalunga, ohandi ku pandula eshi inandi fa ovanhu vamwe . . . Ohandi lidilike oikulya luvali moshivike.” (Lukas 18:11, 12) Ovahongwa vaJohannes otashi dulika va li have lidilike oikulya shi li onghedindjikilile. Ile tashi dulika va kala tave lidilike oikulya molwaashi ova li va nyika oluhodi eshi Johannes a tulwa modolongo. Ovo va li ve shi mona otashi dulika navo va li va kumwa eshi ovahongwa vaJesus ihave lidilike oikulya, tashi dulika tave shi ningi okuulika kutya ova nyika oluhodi omolwoshinima osho sha ningilwa Johannes.

Jesus okwe va nyamukula ta longifa oshihopaenenwa a ti: “Ookaume komuhomboli mbela ova pumbwa ngoo okunyika oluhodi fimbo omuhomboli e li navo? Ndele omafiku otae uya eshi omuhomboli te ke va kufwa, opo nee otave ke lidilika.” — Mateus 9:15.

Johannes okwa li a popya kutya Jesus oye omuhomboli. (Johannes 3:28, 29) Natango, ofimbo Jesus a li novahongwa vaye, ovahongwa vaye kava li have lidilike oikulya. Lwanima, eshi Jesus a fya, ovahongwa vaye ova li va nyika oluhodi nova li va kanifa ehalo lokulya. Ashike konima eshi a nyumuka, kava li vali have lidilike oikulya, molwaashi kava li vali va nyika oluhodi.

Jesus okwa li a yandja vali omafaneko avali a ti: “Kape na omunhu ta vandeke oshikutu shikulu noshivando shipe, osheshi oshivando shipe otashi pombola oshikutu, nombululu otai ningi inene. Natango, ovanhu ihava tula omaviinyu mape momakutu makulu. Ngeenge ova ningi ngaho, omakutu otaa pomboka ndele omaviinyu taa tika mo, nomakutu otaa nyonauka. Ndele ovanhu ohava tula omaviinyu mape momakutu mape.” (Mateus 9:16, 17) Jesus okwa li a hala okutya shike?

Jesus okwa li ta kwafele ovahongwa vaJohannes Omuninginifi va mone kutya kape na nande oumwe e na okuteelela ovashikuli vaye va shikule omahongo onale Oshijuda, ngaashi onghedindjikilile i na sha nokulidilika oikulya. Ka li e uya okuvandeka ile okuxwepopaleka elongelokalunga  likulu olo la li pokuhanaunwa po. Jesus ka li ta xumifa komesho omahongo Oshijuda opefimbo lonale nosho yo eenghulunghedi dao. Ka li ta kendabala okuvandeka oshivando koshikutu sha kulupa ile okutula omaviinyu mape mekutu la kulupa.