Inda koshikalimo

Inda koshikalimo

 ETUKULWA 3

Okudalwa kwaao ta ka longekida ondjila

Okudalwa kwaao ta ka longekida ondjila

LUKAS 1:57-79

  • JOHANNES OMUNINGINIFI TA DALWA NOKULUKWA

  • SAKARIA TA XUNGANEKE ONGHANDANGALA OYO JOHANNES A LI TA KA DANA

Elisabet okwa li pokumona okaana. Maria okwa kala naye hanga oule weemwedi nhatu. Efimbo ola li la fika opo Maria a shune noku lidenge ondjila ileile a finda kolundume leemhunda daJudea odo di li muNasaret. Naye okwa li ta ka mona okaana moule weemwedi hamano lwaapo.   

Diva ashike eshi Maria a shuna keumbo, Elisabet okwa mona okaana. Osha li ehafo eshi Elisabet a mona okaana, naashi aveshe va li ve na oukolele konima eshi a pulumuna. Ovashiinda novapambele vaye ova li va hafa eshi Elisabet e va ulikila okaana kaye okamati.

Omhango yaKalunga oyo a li a pa Ovaisrael oya li ya popya kutya mefiku etihetatu konima eshi okaana okamati ka dalwa, oka li ke na okupita etanda nokulukwa. (Levitikus 12:2, 3) Vamwe ova li va hala okaana ka lukilwe xe, Sakaria. Ashike Elisabet okwa li a nyamukula a ti: “Ahowe, edina lako oJohannes.” (Lukas 1:60) Dimbuluka kutya omweengeli Gabriel okwa ti okaana oke na okulukwa Johannes.

Ovashiinda novapambele ova tya kuye: “Kape na nande oumwe womovapambele voye e na edina olo.” (Lukas 1:61) Onghee ova li va udikila Sakaria tave mu pula kutya okwa hala okaana kaye ka lukwe lyelye. Sakaria okwa pula okapelende ndele ta shange ko enyamukulo laye ta ti: “Edina lako oJohannes.” — Lukas 1:63.

Ombadilila, Sakaria okwa hovela vali okupopya. Otashi dulika to dimbuluka kutya ka li vali ta dulu okupopya eshi a anya okwiitavela osho omweengeli a li a popya kutya Elisabet ota ka kala e na okaana okamati. Eshi Sakaria a hovela okupopya, ovashiinda shaye ova li va kumwa ndele tave lipula tava ti: “Okaana aka otaka ka kala omunhu a tya ngahelipi?” (Lukas 1:66) Ova mona eke laKalunga monghedi omo Johannes a li a lukwa.

Sakaria okwa li a yadifwa omhepo iyapuki ndele  ta ti: “Jehova na hambelelwe, Kalunga kaIsrael, molwaashi okwa kenukila oshiwana shaye nokwe shi etela exupifo. Okwe tu pa omuxupifi omunaenghono a dja mepata laDavid omupiya waKalunga.” (Lukas 1:68, 69) Eshi Sakaria a ti kutya “Omuxupifi omunaenghono,” okwa li ta popi Omwene Jesus, oo a li pokudalwa. Okwa popya yo kombinga yaJesus a ti: “Kalunga e tu xupifa kovatondi vetu, okwe tu pitika tu mu longele tuhe na oumbada, opo tu kale ovadiinini nokulonga osho sha yuka mokukalamwenyo kwetu akushe.” — Lukas 1:74, 75.

Sakaria okwa xunganeka shi na sha nomona waye a ti: “Omumwange, oto ka ifanwa omuprofeti wOmukombadambada, osheshi oto ka tetekela Jehova u mu longekidile ondjila yaye, noto ka udifila oshiwana shaye etumwalaka lexupifo opo shi diminwe po omatimba asho omolwefilonghenda laKalunga ketu. Efilonghenda olo la dja pombada otali ke tu minikila ngaashi etango tali piti, olo tali yandje ouyelele kwaavo ve li momilaulu nomomudidimbe wefyo, nokuyukifa eemhadi detu mondjila yombili.” (Lukas 1:76-79) Exunganeko olo kala li tuu tali tu omukumo!

Pefimbo opo, Maria oo a hangwa ina hombolwa natango, okwa li a fika meumbo lavo muNasaret. Oshike tashi ke mu ningilwa ngeenge ovanhu ova didilike kutya omufimba?