Jesus okwa li a honga ovayapostoli vaye oshilihongomwa shi na sha nokukala nelininipiko eshi a kosha eemhadi davo onguloshi imwe. Konima youvalelo wOpaasa, okwa li a tofa eendjovo daDavid, a ti: “Neume lange nokuli, eli nde lineekela nomutima aushe, nola li hali li eendja dange, olo la yelulila nge oshififinwa, li fangule nge.” Okwa yelifa a ti: “Umwe womunye ota ka kengelela nge.” — Epsalme 41:9; Johannes 13:18, 21.

Ovayapostoli ova talafana, ndele keshe umwe ta pula Jesus ta ti: “Omwene, haame ndi shii?” Nokuli naJudas okwa li e mu pula. Petrus okwa li a lombwela Johannes, oo a li a shaama naJesus poshitaafula, e mu pule kutya olyelye oo te ke mu kengelela. Onghee Johannes okwa li a yaamena Jesus ndele te mu pula ta ti: “Omwene, olyelye hano?” — Mateus 26:22; Johannes 13:25.

Jesus okwa li a nyamukula a ti: “Oye ou handi ka pa omungome nde u velela.” Konima eshi Jesus a velela omungome, okwe u pa Judas ndele ta ti: “Omona womunhu ota ka fya ngaashi pa shangwa kombinga yaye, ndele woo omunhu ou te mu kengelele! Oshixwepo ngeno ka dalelwe.” (Johannes 13:26; Mateus 26:24) Opo nee Judas okwa kwatwa komhepo yaSatana. Judas okwa li nale omukengeleledi, nopomhito oyo okwe liyandja okulonga ehalo lOndiaboli, nomolwaasho a ninga ‘omona wehanauno.’ — Johannes 6:64, 70; 12:4; 17:12.

Jesus okwa li a lombwela Judas a ti: “Osho wa hala okuninga, shi ninga diva.” Ovayapostoli vakwao ova li tava diladila kutya Judas, oo e na okakutu koimaliwa, ota lombwelwa taku ti: “‘Ka lande osho twa pumbwa poshivilo,’ ile a yandje sha keehepele.” (Johannes 13:27-30) Ndele ponhele yaasho, Judas okwa li a ya a ka kengelele Jesus.

Moufiku oo wouvalelo wOpaasa, Jesus okwa li a dika po ouvalelo mupe. Okwa kufa omungome,  ta ilikana pamwe nomapandulo, te u pambula noku u pa ovayapostoli vaye va lye. Okwa ti: “Omungome ou otau faneke olutu lange olo tali yandjwa molweni. Kaleni hamu shi ningi okudimbuluka nge.” (Lukas 22:19) Ovayapostoli ove litaambekida omungome oo, noku u lya.

Jesus okwa kufa eholo lomaviinyu, ndele ta ilikana pamwe nomapandulo, ndele te li va pe. Aveshe ova li va nwa meholo olo, olo Jesus a popya kombinga yalo a ti: “Eholo eli oli lile po ehangano lipe olo la pamekwa kohonde yange oyo tai tilwashi molweni.” — Lukas 22:20.

Kungaho, Jesus okwa li a ninga elongekido li na sha nedimbuluko lefyo laye olo ovashikuli vaye ve na okukala hava dana omudo keshe mo 14 Nisan. Naasho osha li tashi ka dimbulukifa ovanhu osho Jesus nosho yo Xe va ninga opo ovanhu ovadiinini va dule okumangululwa moulunde nefyo. Opaasa oyo ya li hai danwa kOvajuda oya li tai ti sha, ndele efyo laye otali ka etela ovanhu emanguluko lashili ngeenge ova kala neitavelo mekuliloyambo laJesus.

Jesus okwa ti kutya ohonde yaye otai ka “tilwashi omolwokudima po omatimba avahapu.” Mokati kavahapu ovo tava ka diminwa po, omwa kwatelwa ovayapostoli vaye ovadiinini nosho yo ovavaekwa, ovo tava ka kala pamwe naye mOuhamba waXe. — Mateus 26:28, 29.