Inda koshikalimo

Inda koshikalimo

 ETUKULWA 114

Kristus okwa pewa eenghonopangelo dokutokola eedi noikombo

Kristus okwa pewa eenghonopangelo dokutokola eedi noikombo

MATEUS 25:31-46

  • JESUS TA YANDJE EFANEKO LI NA SHA NEEDI NOIKOMBO

Eshi Jesus a li kOmhunda yEemono, okwa li a yandja efaneko li na sha noukadona omulongo nosho yo loitalenti. Okwa li a xulifa ngahelipi enyamukulo kepulo lovayapostoli vaye li na sha nedidiliko lokukala po kwaye nosho yo lomafiku axuuninwa ounyuni? Okwa xulifa enyamukulo laye nefaneko leedi noikombo.

Jesus okwa hovela efaneko olo, ta ti: “Omona womunhu ote ke uya moshinge shaye pamwe novaengeli aveshe, ndele ta ka kala omutumba kolukalwapangelo laye loshinge.” (Mateus 25:31) Nopehe na omalimbililo, Jesus oye ta dana onghandangala mefaneko olo. Luhapu, okwa kala he liifana “Omona womunhu.” — Mateus 8:20; 9:6; 20:18, 28.

Efaneko olo otali ka wanifwa po naini? Otali ka wanifwa po eshi Jesus te ke “uya moshinge shaye pamwe novaengeli aveshe, ndele ta ka kala omutumba kolukalwapangelo laye loshinge.” Okwa hangwa a popya nale kutya ‘Omona womunhu ote uya moilemo yokeulu e na eenghono noshinge shinene’ e li pamwe novaengeli vaye. Osho otashi ka ningwa naini? Otashi ka ningwa “diva konima youdjuu.” (Mateus 24:29-31; Markus 13:26, 27; Lukas 21:27) Efaneko olo otali ka wanifwa monakwiiwa eshi Jesus te ke uya moshinge. Ota ka ninga po shike?

Jesus okwa yelifa a ti: “Omona womunhu ote ke uya moshinge shaye . . . oiwana aishe otai ka ongelwa koshipala shaye, nota ka tongola ovanhu muvakwao, ngaashi ashike omufita ta tongola eedi moikombo. Ndele eedi ote ke di ameka keke laye lokolulyo, noikombo okolumosho laye.” — Mateus 25:31-33.

Eedi otadi ka amekwa kombinga oyo ya hokiwa, na Jesus okwa ti: “Opo nee Ohamba otai ka tya kwaavo ve li kolulyo layo: ‘Ileni, ava mwa nangekwa noupuna kuTate, mu fyuulule Ouhamba  oo mwe u longekidilwa okudja pehovelo lounyuni.’” (Mateus 25:34) Omolwashike eedi tadi ka kala da hokiwa kOhamba?

Ohamba otai ka nyamukula tai ti: “Onda li nda fya ondjala, ndele omwa pa nge okulya; onda li nda fya enota, ndele omwa pa nge okunwa. Onda li omweendanandjila, ndele omwa yakula nge; onda li olutu longaho, ndele omwa djaleka nge. Onda li handi vele, ndele omwa fila nge oshisho. Onda li modolongo, ndele omwa talela nge po.” Eshi eedi odo, “ovayuki,” va pula kutya ova longa oinima oyo monghedi ya tya ngahelipi, okwa nyamukula a ti: “Keshe osho mwa ningila umwe womovamwatate ava vanini, aame mwe shi ningila.” (Mateus 25:35, 36, 40, 46) Oinima oyo inave i ninga meulu molwaashi meulu ihamu velwa noihamu fiwa ondjala. Osho sha yela kutya oya ningilwa ovamwaxe vaKristus kombada yedu.

Oshike tashi ka ningilwa oikombo oyo tai ka amekwa kolumosho? Jesus okwa ti: “Opo nee [Ohamba otai] ka tya kwaavo ve li kolumosho laye: ‘Djeni po pwaame, onye ava mwa tokolelwa omundilo waalushe, oo wa longekidilwa Ondiaboli novaengeli vayo. Osheshi onda li nda fya ondjala, ndele inamu pa nge okulya; onda li nda fya enota, ndele inamu pa nge okunwa. Onda li omweendanandjila, ndele inamu yakula nge; onda li olutu longaho, ndele inamu djaleka nge; onda li handi vele nonda li modolongo, ndele inamu fila nge oshisho.’” (Mateus 25:41-43) Oikombo oyo oye lilongela etokolo molwaashi oya dopa okukwafela ovamwaxe vaKristus kombada yedu, ngaashi ya li i na okuninga.

Ovayapostoli ova li va mona kutya etokolo olo tali ka ningwa monakwiiwa otali ka eta oilanduliko tai kalelele. Jesus okwe va lombwela a ti: “Opo nee [Ohamba otai] ke va nyamukula [tai] ti: ‘Oshili ohandi mu lombwele, keshe osho inamu ningila umwe womwaava vanini, aame inamu shi ningila.’ Ava otava ka hanaunwa po fiyo alushe, ndele ovayuki otava ka kala nomwenyo fiyo alushe.” — Mateus 25:45, 46.

Enyamukulo laJesus kepulo lovayapostoli ola li la kwafela ovashikuli vaye va diladile moule, noku ve linyengifa va konakone oikala yavo nosho yo eenghatu davo.