Inda koshikalimo

Inda koshikalimo

 ETUKULWA 79

Ova taalela ehanauno

Ova taalela ehanauno

LUKAS 13:1-21

  • OSHO HATU LIHONGO MOININGWANIMA IVALI INYIKIFA OLUHODI OYO JESUS A HONGA

  • OMUKAINHU OO A LI TA EHAMA A VELULWA MESHABATA

Jesus okwa li a ninga eenghendabala opo a kwafele ovanhu va diladile kombinga yekwatafano lavo naKalunga. Opa li pa holoka omhito imwe vali konima eshi a li ta kundafana novanhu pondje yeumbo lOmufarisai.

Ovanhu vamwe ova li va popya kombinga yoshiningwanima shi nyikifa oluhodi. Ova li va popya “kutya [omupangeli waRoma Pontius] Pilatus okwa dipaa Ovagalilea ovo va li tava yambe omayambo.” (Lukas 13:1) Ova li va hala okutya ngahelipi?

Otashi dulika Ovagalilea ovo va li va dipawa eshi Ovajuda omayovi va li va popya kutya Pilatus okwa longifa oimaliwa oyo ya dja momayambidido otembeli opo a tunge ekangha lokweeta omeva muJerusalem. Pilatus otashi dulika a li a mona oimaliwa oyo kekwafo laavo hava longele motembeli. Ovo va li tava popi kombinga yoshinima osho, otashi dulika va li ve udite kutya Ovagalilea ova hangwa koshinima osho shi nyikifa oluhodi omolwoilonga yavo ii. Ashike Jesus ka li a twa kumwe navo.

Okwe va pula a ti: “Mbela otamu diladila kutya Ovagalilea ovo eshi va ningilwa oshinima osho ova li ovalunde ve dule Ovagalilea vakwao aveshe?” Okwa nyamukula kutya, hasho nandenande. Okwa longifa oshiningwanima osho opo a londwele Ovajuda, a ti: “Nanye otamu ka hanaunwa po ngaashi vo ngeenge itamu lidilulula.” (Lukas 13:2, 3) Jesus okwa popya vali oshiningwanima shimwe osho tashi dulika shi na ekwatafano nokufewa kwomukangha, ndele ta pula ta ti:

“Otamu diladila kutya ovanhu 18 ovo va li va wilwa koshungongulu yomuSiloa, ndele tava fi ova li ovalunde unene ve dule Ovajerusalem vakwao aveshe?” (Lukas 13:4) Ongudu yovanhu otashi dulika ya li tai diladila kutya ovanhu ova fya molwaashi ohava longo oilonga ii. Natango Jesus ka li a twa kumwe navo. Okwa li e shii kutya “efimbo noiningwanima yombadilila” otai dulu okuholoka po naasho otashi dulika osho sha li sha ningwa pomhito oyo. (Omuudifi 9:11, NW) Ovanhu ova li va pumbwa okulihonga oshilihongomwa koshiningwanima osho. Jesus okwa ti: “Amushe otamu ka hanaunwa po ngaashi vo ngeenge itamu lidilulula.” (Lukas 13:5) Omolwashike a li ta divilike oshilihongomwa osho?

Eshi a li ta wanifa po oukalele waye, okwa yandja efaneko tali ti: “Opa li omulumenhu a twika omukwiyu moshikunino shaye shomandjebele, nokwa li e uya okukonga ko eenghwiyu ashike ina hanga ko sha. Opo nee okwa tya komulongi womoshikunino, ‘Komukwiyu ou onde uya ko omido nhatu paife handi kongo eenghwiyu, ndele ihandi hange ko sha. Nau tetwe po molwaashi otau kulu ashike ndele itau imi sha.’ Omulongi womoshikunino okwa tya kuye, ‘Omwene, u efa u kale po omudo umwe fimbo handi u palele nokutula po oushosho. Otashi ka kala shiwa ngeenge owa ka ima monakwiiwa, ndele ngeenge itau imi sha, nau tetwe po.’” — Lukas 13:6-9.

Oule weedula di dulife punhatu, Jesus okwa li ta kendabala okukwafela Ovajuda va kale neitavelo. Ovanini ashike va ninga ovahongwa vaye nove li oiimati yoilonga yaye. Modula onhine,  okwa li a tamununa mo oukalele waye neenghono. Eshi a li ta udifa nokuhonga muJudea nomuPerea, okwa li a fa ta palele nokutula oushosho pomuti womukwiyu wOvajuda. Osho osha li sha etifa oidjemo ya tya ngahelipi? Ovajuda ashike vanini va li ve linyenga nawa. Oshiwana ashishe osha li sha anya okulidilulula nosha li tashi ka hanaunwa po.

Konima yEshabata, ovanhu vahapu natango kava li ve mu tambula ko. Jesus okwa li ta hongo moshinagoga. Okwa li a mona omukainhu umwe a li e na omhepo ya nyata oyo ya li ye mu ningifa a kale ha ende a petama oule womido 18. Jesus okwa li a ungaunga nomukainhu oo nonghenda, ndele te mu lombwele ta ti: “Owa velulwa koudu woye.” (Lukas 13:12) Jesus okwa li a tenheka omake aye komukainhu, nombuda yaye oya li ya yukilila diva nokwa hovela okutanga Kalunga.

Osho osha li sha handukifa omupashukili woshinagoga, ndele ta ti: “Ope na omafiku ahamano oilonga; hano ileni momafiku oo opo mu velulwe, ashike hamefiku lEshabata.” (Lukas 13:14) Omupashukili oo ka li ngeno a hala kutya Jesus ke na eenghono dokuvelula, ndele ponhele yaasho okwa li ta tokola ovanhu ovo va li ve uya okuvelulwa mefiku lEshabata. Jesus okwa li a nyamukula a ti: “Ovanaihelele nye, mbela keshe umwe womunye iha pandekulula mo ongobe ile ondongi yaye mefiku lEshabata ndele te i twala i ka nwe? Mbela omukainhu ou, oo e li oludalo laAbraham nokwa kala a mangwa kuSatana oule womido 18, ke na okumangululwa meemhango odo mefiku lEshabata?” — Lukas 13:15, 16.

Ovapataneki ova li va fya ohoni, ashike ongudu yovanhu oya li ya hafa eshi ya mona Jesus ta longo oilonga oyo. Opo nee eshi Jesus a li muJudea, okwa li a endulula omafaneko avali e na sha nOuhamba, oo a yandjele nale eshi a li mowato pefuta laGalilea. — Mateus 13:31-33; Lukas 13:18-21.