Inda koshikalimo

Inda koshikalimo

 ETUKULWA 38

Johannes a hala okuuda kuJesus

Johannes a hala okuuda kuJesus

MATEUS 11:2-15 LUKAS 7:18-30

  • JOHANNES OMUNINGINIFI TA PULA ONGHANDANGALA OYO JESUS TA DANA

  • JESUS TA TANGE JOHANNES

Johannes okwa kala modolongo hanga oule wodula. Ashike natango okwa li ha udu oilonga ikumwifi oyo Jesus a li ta longo. Diladila kunghee Johannes a li e udite eshi ovahongwa vaye ve mu lombwela kutya Jesus okwa nyumuna okamonamati komufiyekadi wokuNain. Ndele Johannes okwa li a hala okuliudila ko ye mwene kuJesus kutya oinima aishe oyo otai ti naanaa shike. Opo nee Johannes okwa ifana ovahongwa vaye vavali. Ova li tava ka ninga shike? Ova li tava ka pula Jesus kutya: “Oove tuu ou e na okuuya, ile otu na okuteelela umwe e lili?” — Lukas 7:19.

Mbela epulo olo ola li tali monika lidjuu? Johannes okwa li omulumenhu omuladi, nokuli nokonima yomido mbali eshi a ninginifa Jesus, okwa li a mona omhepo yaKalunga ye uya kombada yaJesus nokwa li a uda ondaka yaKalunga tai ti, okwe mu hokwa. Katu na okudiladila kutya eitavelo laJohannes ola li la nghundipala. Ngeno osho sha li ngaho, ngeno Jesus ina popya nefimaneko shi na sha naJohannes, ngaashi a li eshi ninga pomhito oyo. Ndele ngeenge Johannes ka li e na omalimbililo, omolwashike a li a pula Jesus epulo olo?

Otashi dulika Johannes a li a hala okuuda kuJesus ye mwene ngeenge oye Messias. Osho osha li tashi ke mu pameka eshi a li ta ka mona oixuna modolongo. Ndele nande ongaho, epulo laye ola li la kwatela mo shihapu. Okwa li e shii omaxunganeko Ombiibeli oo a li taa ulike kutya Omuvaekwa waKalunga oye ta ka ninga ohamba nomuxupifi. Ashike konima yeemwedi donhumba eshi Jesus a ninginifwa, Johannes okwa li a tulwa modolongo. Johannes okwa li ta pula ngeenge ope na vali umwe te ke uya, oo a li ta ka tetekelwa kuJesus nota ka wanifilwa omaxunganeko aeshe e na sha naMessias ngaashi sha li sha xunganekwa.

Ponhele ashike yokulombwela ovahongwa vaJohannes kutya, ‘Heeno, aame oo ndi na okuuya,’ Jesus okwa li e va pa oumbangi oo tau ulike kutya Kalunga ote mu kwafele mokuvelula ovanhu vahapu ovo va li ve na omaudu e lili noku lili. Opo nee Jesus okwa lombwela ovahongwa ta ti: “Indeni mu ka lombwele Johannes osho mwa uda naasho mwa mona: Ovapofi paife ove wete ko, oingudu otai ende, ovanashilundu otava velulwa, ovafitamatwi ove udite ko, ovafi otava nyumunwa neehepele otadi udifilwa onghundana iwa.” — Mateus 11:4, 5.

Otashi dulika eshi Johannes a pula epulo olo a li a teelela Jesus a ninge shihapu shi dulife osho a li ta ningi, tashi dulika nokuli a li ta diladila kutya ote mu mangululifa mo modolongo. Ashike Jesus okwe mu lombwela kutya ina teelela a ninge shihapu shi dulife oikumwifilonga oyo a li ta longo.

Eshi ovahongwa vaJohannes va ya, Jesus okwa li a shilipaleka ongudu yovanhu kutya Johannes oku dule kokule omuprofeti. Oku li “omutumwa” waJehova oo a xunganekwa muMalakia 3:1. Oku li yo omuprofeti Elia, ngaashi sha xunganekwa muMalakia 4:5, 6. Jesus okwa yelifa a ti: “Oshili ohandi mu lombwele, mwaava va dalwa kovakainhu kamu na nande oumwe e dule Johannes Omuninginifi, ashike omunhu ou munini mOuhamba womeulu oku mu dule.” — Mateus 11:11.

 Eshi Jesus a ti kutya omunhu ou munini mOuhamba womeulu oku dule Johannes, okwa li ta ulike kutya Johannes ita ka kala mOuhamba womeulu. Johannes okwa li a longekidila Jesus ondjila, ashike okwa fya ofimbo Kristus ina yeulula ondjila yokuya meulu. (Ovaheberi 10:19, 20) Ndele nande ongaho, Johannes oku li omuprofeti waKalunga omudiinini nota ka kala omupangelwa kombada yedu koshi yOuhamba waKalunga.