Inda koshikalimo

Inda koshikalimo

 ETUKULWA 50

Nghee ovayapostoli va longekidwa va ka udife nonande ope na omapataneko

Nghee ovayapostoli va longekidwa va ka udife nonande ope na omapataneko

MATEUS 10:16–11:1 MARKUS 6:12, 13 LUKAS 9:6

  • JESUS TA DEULA OVAYAPOSTOLI VAYE NOKU VA TUMA

Jesus okwa li a pa ovayapostoli vaye omalombwelo anghee ve na oku ka udifa eshi tava i oovavali. Ashike okwa twikila noku va pa omalombwelo. Okwe va londwela shi na sha novapataneki, a ti: “Taleni, ohandi mu tumu ngaashi eedi mokati komambungu . . . Lungameni ovanhu, molwaashi otave ke mu twala keemhangu ndele tave mu dengele meeshinagoga davo. Otamu ka twalwa yo komesho yovapangeli noyeehamba omolwange.” — Mateus 10:16-18.

Otashi dulika ovashikuli vaJesus va shakeneke omahepeko a kwata moiti, ashike okwe va udanekela a ti: “Ngeenge ove mu twala kovapangeli, inamu kala mu noshisho kutya otamu ka popya ngahelipi ile mu tye shike, molwaashi osho tamu ka popya otamu ke shi pewa pefimbo opo; osheshi hanye ashike vene tamu ka popya, ndele omhepo yaXo yeni oyo tai ka popya munye.” Okwa weda ko vali a ti: “Omumwaxe ota ka yandja omumwaxe a dipawe, naxe omona waye, nounona otava ka kala ve li omhinge novadali vavo, ndele tave va dipaifa. Ndele otamu ka tondwa kovanhu aveshe omolwedina lange, ashike ou te lididimike fiyo okexulilo ota ka xupifwa.” — Mateus 10:19-22.

Molwaashi oshilonga shokuudifa osha fimanenena, Jesus okwa divilika kutya ovashikuli vaye ova pumbwa okukala va lungama opo va kale va manguluka okuwanifa po oshilonga osho. Okwa ti: “Ngeenge tave mu hepeke moshilando shimwe, indeni onhapo kushikwao; osheshi ohandi mu lombwele oshili kutya itamu mane okuudifila moilando aishe yaIsrael fiyo Omona womunhu ote uya.” — Mateus 10:23.

Jesus okwa li a pa ovayapostoli vaye 12 omalombwelo, omalondwelo nosho yo etwomukumo la denga mbada. Oto dulu okukala u na olupandu molwaashi eendjovo odo oda nuninwa yo ovo tava ka kufa ombinga moilonga yokuudifa konima yefyo laJesus nosho yo yenyumuko laye. Osho okwe shi ulika yo eshi a pa ovahongwa vaye omalombwelo kutya otava ka ‘tondika kovanhu aveshe,’ ndele hakovanhu ashike ovo ovayapostoli va lombwelwa va ka udifile. Shikwao vali, inatu lesha kutya ovayapostoli ova li va twalwa komesho yovapangeli noyeehamba momukokomoko wefimbo lixupi olo va kala tava udifile muGalilea ile va dipaifwa kovapambele vavo.

Osha yela kutya Jesus okwa li e na momadiladilo osho sha li tashi ka ningwa monakwiiwa eshi a li ta lombwele ovahongwa vaye oinima oyo. Diladila kwaasho a li a lombwela ovahongwa vaye kutya itava ka mana okuudifila moshitukulwa shavo “fiyo Omona womunhu ote uya.” Jesus  okwa ulika kutya ovahongwa vaye itava ka mana okuudifa kombinga yOuhamba waKalunga ofimbo omutumbalekwa Jesus Kristus ine uya e li omutokoli oo a nangekwa po kuKalunga.

Ofimbo ovayapostoli tava wanifa po oshilonga shokuudifa, kave na okukala va kumwa ngeenge tava shakeneke omapataneko, molwaashi Jesus okwa ti: “Omuhongwa ke dule omuhongi waye, nomupiya ke dule omwene waye.” Oshitwa shaJesus osha yela. Okwa li a ungaungiwa naye nai nokupatanekwa eshi a li ta udifa kombinga yOuhamba waKalunga, naasho osho sha li tashi ke va ningilwa. Natango Jesus okwa li e va ladipika a ti: “Inamu tila ovo tava dipaa olutu, osheshi itava dulu oku mu imba oku ka kala nomwenyo monakwiiwa; mepingafano naasho, tileni ou ta dulu oku mu hanauna po muGehenna.” — Mateus 10:24, 28.

Jesus okwe tu tulila po oshihopaenenwa moshinima osho. Okwa li e lididimikila efyo ponhele yokutula moshiponga oudiinini waye kwaao e na eenghono adishe, Jehova. Kalunga Omunaenghono adishe oye aeke ta dulu ‘okuhanauna’ po omunhu (eteelelo laye loku ka kala nomwenyo monakwiiwa) ile oku mu nyumuna a hafele onghalamwenyo fiyo alushe. Osho kasha li tuu sha pameka ovayapostoli!

Jesus okwa li a yandja efaneko li na sha nefiloshisho laKalunga lopahole li na sha novashikuli vaye, a ti: “Mbela oiyandja ivali ihai landwa nokapeni kamwe kongushu inini? Ashike kape na nande oshimwe shomuyo tashi wile pedu Xo yeni ine shi didilika. . . . Hano inamu tila; nye omwa fimana unene mu dule oiyandja ihapu.” — Mateus 10:29, 31.

Etumwalaka olo ovahongwa vaJesus tava udifa otali ka tukaula omaukwaneumbo, vamwe otave ke li tambula ko navamwe itave li tambula ko. Jesus okwa yelifa a ti: “Inamu diladila kutya onde uya okweeta ombili kombada yedu.” Ohashi pula ouladi opo oshilyo shoukwaneumbo shi tambule ko oshili yOmbiibeli. “Keshe ou e hole unene xe ile ina komesho yange, ina wapalela nge; nakeshe ou e hole unene omonamati ile omonakadona komesho yange, ina wapalela nge.” — Mateus 10:34, 37.

Ashike vamwe otava ka tambula ko nawa ovahongwa vaye. Okwa ti: “Keshe ou ta pe umwe womwaava vanini nande eholo ashike lomeva okunwa, molwaashi e li omuhongwa, oshili ohandi mu lombwele, ita kala ina pewa ondjabi yaye.” — Mateus 10:42.

Ovayapostoli ova li ve lilongekida nawa konima eshi va pewa omalombwelo, omalondwelo nosho yo etwomukumo kuJesus nova li va “ya momikunda tava udifa onghundana iwa keshe pamwe nokuvelula ovanaudu.” — Lukas 9:6.