Inda koshikalimo

Inda koshikalimo

 ETUKULWA 80

Omufita muwa nosho yo oshiunda sheedi

Omufita muwa nosho yo oshiunda sheedi

JOHANNES 10:1-21

  • JESUS OKWA POPYA KOMBINGA YOMUFITA MUWA NOSHO YO OSHIUNDA SHEEDI

Eshi Jesus a twikila nokuudifa muJudea, okwa li a popya kombinga yeedi nosho yo oshiunda sheedi, oshinima osho tashi dulu okuudiwa ko noupu kovapwilikini vaye. Ashike okwa li ta popi pafaneko. Otashi dulika Ovajuda va li va dimbuluka eendjovo daDavid, odo tadi ti: “Omwene Oye omufita wange, ihandi pumbwa sha. Oye ta lifa nge momatunda omwiidi mutalala.” (Epsalme 23:1, 2) Natango mepsalme limwe, David okwa li a lombwela oshiwana a ti: “Omwene Omushiti wetu tu mu twileni eengolo! Osheshi Oye Kalunga ketu, ndele fye oshiwana shoufita waye.” (Epsalme 95:6, 7) Eshi Ovaisrael va li koshi yOmhango, ova li va faafanifwa noufita weedi.

‘Eedi’ odo oda kala “moshiunda sheedi” meityo olo kutya oda dalwa nale di li koshi yehangano lOmhango yaMoses. Omhango oya li ye va tukula ko kwaavo va li hava longo oilonga ii novehe li koshi yelongekido olo. Ashike Ovaisrael vamwe ova li hava ungaunga nai noufita waKalunga. Jesus okwa ti: “Oshili ohandi mu lombwele, ou te uya moshiunda sheedi ita pitile koshivelo ombudi. Ndele ou ta i mo ta pitile koshivelo oye omufita weedi.” — Johannes 10:1, 2.

Ovanhu otashi dulika va li tava diladila kwaavo va li tave liti ovo Messias ile Kristus. Ova li ngaashi eembudi nosho yo ovanyeki. Ovanhu kave na okushikula ovakengeleledi va tya ngaho. Ponhele yaasho, ove na okushikula “omufita weedi,” oo Jesus a popya a ti:

“Omukeleli woposhivelo shoshiunda ote mu yeulula, needi otadi udu ondaka yomufita. Eedi daye ote di ifana komadina ndele te di pitifa mo. Ngeenge e di pitifa mo adishe, ohe di kala komesho nohadi mu shikula, molwaashi odi shii ondaka yaye. Itadi ka shikula nandenande umwe e lili, ndele otadi ke mu faduka po molwaashi kadi shii eendaka davamwe ve lili.” — Johannes 10:3-5.

Johannes Omuninginifi, oo a faafanifwa nomukeleli woposhivelo, okwa li a popya kutya Jesus oye e na okushikulwa keedi odo dopafaneko di li koshi yOmhango. Eedi dimwe muGalilea nosho yo muJudea oda li da dimbuluka ondaka yaJesus. Okwa li te ke “di pitifa mo” di yuke peni? Noshidjemo otashi ka kala sha tya ngahelipi ngeenge ode mu shikula? Vamwe ovo va li va uda efaneko olo ova li va kumwa molwaashi “kava li ve udite osho a hala okutya.” — Johannes 10:6.

Opo nee Jesus okwa yelifa a ti: “Oshili ohandi mu lombwele, aame oshivelo omo eedi di na okupitila. Aveshe ovo ve uya tave liti kutya aame ovo eembudi; ndele eedi inadi pwilikina kuvo. Aame oshivelo; keshe ou ta pitile mwaame ota ka xupifwa, note ke uya mo nokupita mo ndele ta mono oulifilo muwa.” — Johannes 10:7-9.

Jesus okwa li ta popi oshinima shipe kuvo. Ovapwilikini vaye ova li ve shii kutya ka li oshivelo shehangano lOmhango olo la kala ko oule womafelemido. Onghee okwa li a hala okutya eedi odo ta “pitifa mo” oda li tadi ka ya moshiunda shimwe vali. Oshidjemo otashi ka kala sha tya ngahelipi?

Jesus okwa li a twikila okuyelifa onghandangala oyo ta dana, a ti: “Ame onde uya opo eedi di kale nomwenyo fiyo alushe. Aame omufita muwa; omufita muwa oha yandjele eedi daye omwenyo waye.” (Johannes 10:10, 11) Jesus okwa li a twa omukumo ovahongwa vaye a ti: “Ino tila okangudu ove kanini, osheshi Xo okwa halelela oku mu pa Ouhamba.” (Lukas 12:32) Ovo ve li ‘mokangudu kanini’ ovovo Jesus ta ka tula moshiunda sheedi shipe opo va ka kale “nomwenyo  fiyo alushe.” Oshi li oufembanghenda okukala oshitukulwa shokangudu oko.

Jesus hapo a li a xulila opo. Okwa twikila ko a ti: “Ondi na eedi dimwe dihe fi domoshiunda eshi; nado ondi na oku di eta mo ndele tadi ka uda ondaka yange, notadi ka kala moshiunda shimwe, di na omufita umwe.” (Johannes 10:16) “Eedi dimwe” kadi “fi domoshiunda eshi.” Ashike odomoshiunda shimwe osho sha yooloka ko kwaasho ‘shokangudu kanini’ oko taka ka fyuulula Ouhamba. Oiunda oyo ivali ile eedi odo di li meengudu dopavali odi na onakwiiwa ya yoolokafana. Ashike eedi adishe odo domoiunda oyo yopavali otadi mono ouwa monghandangala oyo Jesus ta dana. Nomolwaasho a popya a ti: “Tate oku hole nge, molwaashi ohandi ka yandja omwenyo wange.” — Johannes 10:17.

Vahapu vomongudu oyo ova li va nyamukula tava ti: “Oku na ondemoni nota i eenghwengu.” Ashike vamwe ova li tava ulike kutya otava pwilikine nohokwe nova li va hala okushikula Omufita Muwa. Opo nee ova ti: “Eendjovo odo kadi fi domunhu e na ondemoni. Mbela ondemoni otai dulu ngoo okutwikulula omesho ovapofi?” (Johannes 10:20, 21) Ova li tava popi kombinga yomulumenhu oo a dalwa omupofi nokwa twikululwa kuJesus.