Inda koshikalimo

Inda koshikalimo

 ETUKULWA 63

Omayele e na sha nokupundukifa vamwe nosho yo okunyona

Omayele e na sha nokupundukifa vamwe nosho yo okunyona

MATEUS 18:6-20 MARKUS 9:38-50 LUKAS 9:49, 50

  • OMAYELE KOMBINGA YOKUPUNDUKIFA VAMWE

  • NGEENGE OMUMWAXO A NYONA

Jesus okwa li a popya kombinga yanghee ovashikuli vaye ve na okukala. Ova li ve na okukala ve na etaleko la fa lounona. Ovahongwa ova li ve na ‘okutambula okaana oko medina laye, nokungaho ova tambula ko Jesus.’ — Mateus 18:5.

Ovayapostoli ova kala nokutwa eemhata kutya olyelye munene, notashi dulika va li va tala ko eendjovo daJesus di li outekuduliko. Omuyapostoli Johannes okwa li a popya oshinima shimwe osho opo sha li sha ningwa, a ti: “Otwa mona umwe ta te mo eendemoni ta longifa edina loye, ndele otwa kendabala oku mu kelela molwaashi iha ende nafye.” — Lukas 9:49.

Mbela Johannes okwa li a tala ko ovayapostoli kutya ovo ashike va pewa oufemba wokuvelula noku ta mo eendemoni? Ngeenge osho, ongahelipi omulumenhu Omujuda a li a dula okuta mo eemhepo da nyata? Johannes otashi dulika a li e udite kutya omulumenhu oo ke na eenghono dokulonga oilonga oyo molwaashi ka li ha ende naJesus noka li omuyapostoli waye.

Johannes okwa li a kumwa eshi Jesus a ti: “Inamu mu kelela, osheshi kape na ou ta dulu okulonga oikumwifilonga medina lange ndele ta popile nge vali mowii. Osheshi keshe ou ehe li omhinge nafye oku li kombinga yetu. Ndele keshe ou te mu pe omeva okunwa molwaashi mu li ovahongwa vaKristus, oshili ohandi mu lombwele, ita kala nande ina pewa ondjabi yaye.” — Markus 9:39-41.

Omulumenhu oo ka li a teelelika a kale ha ende pamwe naKristus opo a yambidide omahongo aye. Eongalo lOpakriste kala li natango la totwa po, naashi omulumenhu oo a li iha ende pamwe naJesus, inashi hala kutya okwa li omupataneki ile ta xumifa komesho omahongo oipupulu. Osha yela kutya omulumenhu oo okwa li e na eitavelo muJesus, naasho Jesus a li a popya otashi ulike kutya ota ka pewa ondjabi.

Natango, osha li sha kwata moiti ngeenge omulumenhu okwa pundukifwa keenghatu nosho yo keendjovo dovayapostoli. Jesus okwa ti: “Ou ta hongaula umwe womwaava vanini, ovo ve na eitavelo mwaame, oshixwepo a mangelwe emanya loshini mofingo yaye ndele ta ekelwa mokati kefuta.” (Markus 9:42) Jesus okwa li vali a lombwela ovayapostoli vaye kutya ove na okuteta ko nokuli noshinima osho shi na oshilonga ngaashi eke, omhadi ile nokuli neisho ngeenge otali va hongaula. Oshixwepo okukala oshingudu ndele to i mOuhamba waKalunga ponhele yokukala noitukulwa aishe ndele to ekelwa muGehenna (efilu laHinnom). Ovayapostoli ova li va mona efilu olo la li popepi naJerusalem omo mwa li hamu xwikilwa oimbodi, naasho osha li she va kwafela va ude ko shi na sha nehanauno laalushe.

Jesus okwa yandja yo elondwelo, a ti: “Inamu  dina nande oumwe womwaava vanini, osheshi ohandi mu lombwele kutya ovaengeli vavo meulu ove li mo va tala alushe koshipala shaTate.” Ongahelipi “umwe womwaava vanini” a fimana kuXe? Jesus okwa li a popya shi na sha nomulumenhu oo e na eedi 100 ndele imwe tai kana. Omulumenhu okwa li a fiya po odo 99 noku ka konga oyo ya kana, naashi e i mona okwa li a hafa unene shi dulife eshi e na odo 99. Jesus okwa weda ko ta ti: “Tate womeulu ina hala pa kane nande oumwe womwaava vanini.” — Mateus 18:10, 14.

Otashi dulika Jesus a li ta diladila kovayapostoli vaye ovo va kala tava tu eemhata kutya olyelye munenenene mokati kavo, ndele te va lombwele ta ti: “Kaleni mu na omongwa munye vene nokukala mu na ombili mokati keni.” (Markus 9:50) Omongwa ohau fingaleke oikulya. Omongwa wopafaneko ohau ningifa oinima i kale tai ende nawa nokukaleka po ombili. — Ovakolossi 4:6.

Omafimbo amwe otashi dulika pa holoke omaupyakadi, ashike Jesus okwa popya nghee hatu dulu okuungaunga nao. Okwa ti: “Ngeenge omumwaxo okwa nyona kwoove, inda u ke mu pukulule mu li po onye amuke. Ngeenge okwe ku pwilikine, owa kwafela omumwaxo a longe osho sha yuka.” Ndele ongahelipi ngeenge ina hala okupwilikina? Jesus okwa yandja omayele a ti: “Kufa ondombwedi imwe ile mbali. Opo ku kolekwe oushili woshinima shonhumba, ope na okukala eembangi mbali ile nhatu.” Ngeenge osho inashi kandula po oupyakadi, ove na oku “shi lombwela eongalo,” ile tu tye ovakulunhuongalo ovo ve na oshinakuwanifwa shokuyandja etokolo. Ongahelipi ngeenge omunyoni natango ina hala okupwilikina? “Mu tala ko ngaashi omunhu womoiwana imwe nongaashi omufendelifi,” ovanhu ovo va li ihava endafana nOvajuda. — Mateus 18:15-17.

Ovapashukili vomaongalo ove na okudulika kEendjovo daKalunga. Ngeenge ova mono kutya omunyoni oku na ondjo nokwa pumbwa okupewa outekuduliko, etokolo lavo ola ‘mangwa nale meulu.’ Ngeenge ina monika ondjo, otashi ka “mangululwa nomeulu.” Omayele oo okwa li taa ka longa ngeenge eongalo lOpakriste la totwa po. Jesus okwa popya shi na sha noshinima osho, a ti: “Apa pa ongala vavali ile vatatu medina lange, ohandi kala mokati kavo.” — Mateus 18:18-20.