Inda koshikalimo

Inda koshikalimo

 ETUKULWA 96

Jesus ta nyamukula omulumenhu omunyasha oshipuna

Jesus ta nyamukula omulumenhu omunyasha oshipuna

MATEUS 19:16-30 MARKUS 10:17-31 LUKAS 18:18-30

  • OMULUMENHU OSHIPUNA TA PULA SHI NA SHA NOKU KA MONA OMWENYO WAALUSHE

Jesus okwa li ta ende natango muPerea a yuka kuJerusalem. Omulumenhu omunyasha oshipuna okwa li a lotokela kuye ndele te mu twile eengolo. Omulumenho oo okwa li umwe ‘womovapangeli,’ tashi dulika a li ta longo e li omupashukili woshinagoga ile oshilyo shOmhangu yoPombada yOvajuda. Okwa li a pula Jesus a ti: “Omuhongi muwa, ondi na okulonga shike opo ndi ka mone omwenyo waalushe?” — Lukas 8:41; 18:18; 24:20.

Jesus okwe mu nyamukula a ti: “Omolwashike to ifana nge omuhongi muwa? Kape na omunhu muwa, oKalunga aeke.” Otashi dulika omulumenhu omunyasha oo a li a longifa outumbulilo “muwa,” opo a ulike kutya okwa fimaneka Jesus. Nonande Jesus okwa li omuhongi omunekeka, okwa li a lombwela omulumenhu oo kutya Kalunga oye aeke “Muwa.”

Jesus okwa li e mu ladipika a ti: “Ndele ngeenge owa hala okumona omwenyo, kala ho dulika koipango.” Opo nee omulumenhu omunyasha okwa pula a ti: “Ilipi po?” Jesus okwa li a tofa oipango itano yomoipango omulongo, ngaashi kutya ino dipaa, ino nyona ohombo, ino vaka, ino popya oipupulu nosho yo kutya fimaneka xo nanyoko. Okwa weda ko vali oshipango shimwe sha fimanenena a ti: ‘Kala u hole mukweni ngaashi u lihole mwene.’ — Mateus 19:17-19.

Omulumenhu oo okwa nyamukula a ti: “Aishe oyo ohandi dulika kuyo; oshike vali ndi na okuninga?” (Mateus 19:20) Otashi dulika a li e udite kutya okwa pumbwa natango okuninga oshinima shinene opo a dule oku ka mona omwenyo waalushe. Eshi Jesus a mona kutya okwa halelela okuninga omalunduluko, okwa li e “mu hokwa.” (Markus 10:21) Ashike omulumenhu oo okwa li e na oshinima osho tashi mu imbi a ninge omalunduluko.

Omulumenhu oo okwa li a kanyatela keliko laye, onghee Jesus okwe mu lombwela a ti: “Ope na vali oshinima shimwe osho wa pumbwa okuninga: Inda u ka landife po oinima yoye ndele oimaliwa to i yandje keehepele, opo u kale u na emona meulu, ndele to uya u ninge omushikuli wange.” Omulumenhu oo okwa li ta dulu okuyandja oimaliwa  yaye keehepele odo itadi dulu vali oku i mu alulila, nokuninga omuhongwa waJesus. Ashike otashi dulika Jesus a li e mu uditile onghenda eshi e mu mona ta fikama naashi ta i a nyika oluhodi. Molwaashi omulumenhu oo okwa li a kanyatela ‘keliko laye lihapu,’ ola li le mu twikifa opo aha mone emona lashili. (Markus 10:21, 22) Jesus okwa ti: “Kashidjuu tuu kwaavo ve na oimaliwa ihapu okuya mOuhamba waKalunga!” — Lukas 18:24.

Ovahongwa ova li va kuminwa eendjovo odo Jesus a li a popya eshi a ti: “Oshipu kongamelo okupita meyulu longwiya shi dulife okuya kwoshipuna mOuhamba waKalunga.” Osho osha li she linyengifa ovahongwa va pule Jesus tava ti: “Olyelye hano mboli ta dulu okuxupifwa?” Mbela oshidjuu ngoo unene omunhu a ka xupifwe? Jesus okwa li a tala kuvo, ndele ta ti: “Oinima oyo ovanhu tava diladila kutya itai shiiva, kuKalunga otai shiiva.” — Lukas 18:25-27.

Petrus okwa li a popya kutya ova ninga ehoololo la yooloka ko kwaalo lomulumenhu oshipuna, a ti: “Tala, otwa fiya po oinima aishe ndele hatu ku shikula; mbela oshike hatu ka mona?” Jesus okwa li a popya shi na sha naasho tava ka mona omolwetokolo lavo lopandunge olo va ninga, a ti: “Meshitululo, ngeenge Omona womunhu a kala omutumba kolukalwapangelo laye liyapuki, ovo mwa shikula nge otamu ka kala omutumba komalukalwa 12, ndele tamu ka tokola omapata 12 aIsrael.” — Mateus 19:27, 28.

Osha yela kutya Jesus okwa li e na momadiladilo efimbo olo eshi onghalo tai ka lunduluka kombada yedu opo i kale ya fa oyo ya li moshikunino shaEden. Petrus novahongwa vakwao otava ka pewa ondjabi yokupangela pamwe naJesus Oparadisa kombada yedu, nondjabi oyo oya yeleka omaliyambo aeshe oo va ninga.

Ashike ondjabi ya tya ngaho itai ka monika ashike monakwiiwa. Ovahongwa vaye ohava hafele omanangeko noupuna amwe paife. Jesus okwa ti: “Keshe oo a fiya po eumbo, omukulukadi, ovamwainamati, ovadali ile ovana omolwOuhamba waKalunga, ota mono shihapu paife, nomounyuni tau uya omwenyo waalushe.” — Lukas 18:29, 30.

Keshe apa ovahongwa vaye tava i, ohava hafele oumwainafana novalongelikalunga vakwao nove na ekwatafano la kola lidule nokuli olo ve na novapambele vavo. Shinyikifa oluhodi, omulumenhu omunyasha oshipuna oo okwa xutwifa omanangeko noupuna a tya ngaho nosho yo ondjabi yoku ka mona omwenyo waalushe mOuhamba waKalunga womeulu.

Jesus okwa weda ko a ti: “Ndele vahapu ovo votete otava ka ninga vaxuuninwa, naavo vaxuuninwa otava ka ninga votete.” (Mateus 19:30) Mbela okwa li a hala okutya ngahelipi?

Omulumenhu omunyasha omupangeli oo okwa li umwe womwaavo “votete” mokati kovawiliki velongelokalunga lOshijuda. E li omuwanifi woipango yaKalunga, okwa li a ulika kutya ota dulu okuninga omalunduluko notashi dulika a li a teelelwa a ninge shihapu. Ashike okwa li a pitifa komesho oinima yopamaliko monghalamwenyo yaye aishe. Mepingafano naye, ovanhu vongaho ova li va mona kutya omahongo aJesus oo oshili notaa twala komwenyo waalushe. Ova li “vaxuuninwa,” ashike paife otava ka ninga “votete.” Ove na oufembanghenda woku ka kala omutumba kolukalwapangelo naJesus nokupangela edu alishe.