Inda koshikalimo

Inda koshikalimo

 ETUKULWA 89

Jesus ta udifa muPerea ofimbo e li mondjila yaye yokuya kuJudea

Jesus ta udifa muPerea ofimbo e li mondjila yaye yokuya kuJudea

LUKAS 17:1-10 JOHANNES 11:1-16

  • OSHA KWATA MOITI OKUPUNDUKIFA VAMWE

  • OKUDIMINA PO NOSHO YO OKUULIKA EITAVELO

Jesus okwa kala efimbo linini moshitukulwa shaPerea osho sha “taulula omulonga waJordan.” (Johannes 10:40) Pomhito oyo okwa li ta i kuJerusalem.

Jesus ka li oye aeke, ndele okwa li a ya pamwe novahongwa vaye nosho yo ‘eengudu dinene dovanhu,’ mwa kwatelwa ovafendelifi novalunde. (Lukas 14:25; 15:1) Ovafarisai novanongo vomishangwa ovo va li ve li omhinge neendjovo daJesus nosho yo oilonga yaye, navo ova li ve mu shikula. Ova li tava diladila moule shi na sha naasho Jesus a li a popya mefaneko li na sha nodi ya kana, nomumati oo a li a kana nosho yo nomulumenhu oshipuna naLasarus. — Lukas 15:2; 16:14.

Jesus okwa li a yandja elitulemo kovahongwa vaye e na momadiladilo osho a li a ningilwa kovapataneki vaye. Okwa li a endulula oitwa imwe oyo a li a popya nale eshi a li ta hongo ovanhu muGalilea.

Pashihopaenenwa, okwa ti: “Otapa ka kala alushe omahongaulo, ndele woo omunhu ou te a etifa! . . . Lipashukileni nye vene. Ngeenge omumwaxo okwa nyono kwoove, mu pukulula, ndele ngeenge okwe livele ombedi, mu dimina po. Nonande okwa nyono kwoove lwoikando iheyali mefiku, ndele te uya kwoove lwoikando iheyali, ta ti, ‘Dimine nge po,’ mu dimina po.” (Lukas 17:1-4) Otashi dulika eendjovo odo da li da dimbulukifa Petrus epulo olo a li a pula shi na sha nokudimina po lwoikando iheyali. — Mateus 18:21.

Mbela ovahongwa ova li ngoo tava ka katuka metwokumwe neendjovo daJesus? Eshi va lombwela Jesus kutya, “tu wedela eitavelo,” okwa li e va lombwela a ti: “Ngeno okwa li mu na eitavelo li fike pombuto yoshinapi, ngeno otamu dulu okulombwela omuti ou, ‘Liduda mo ndele to litwike mefuta!’ Opo nee otau dulika kunye.” (Lukas 17:5, 6) Nonande omunhu oku na eitavelo linini ota dulu okuwanifa po shihapu.

Jesus okwa twikila nokuhonga nghee sha fimana okukala omulininipiki, u na etaleko li li pandjele li na sha naave mwene, eshi a lombwela ovayapostoli vaye a ti: “Olyelye womunye e na omupiya ta pulula ile ta lifa ndele eshi e uya meumbo ta ti kuye, ‘Ila oku diva ndele to kala omutumba poshitaafula u lye’? Ponhele yaasho, ota ka tya kuye, ‘Djala okatetahema nokulongekidila nge oikulya, ndele to yakula nge fiyo nda mana okulya nokunwa, opo nee naave to dulu okulya nokunwa.’ Onghee ita ka pandula omupiya oo, molwaashi okwa wanifa po ashike oilonga yaye. Sha faafana, ngeenge mwa wanifa po ashishe osho mwa lombwelwa, tyeni: ‘Fye ovapiya vongaho. Otwa longa ashike osho twa li tu na okulonga.’” — Lukas 17:7-10.

Omupiya keshe waKalunga oku na okukala e shii kutya osha fimana okupitifa komesho Ouhamba. Natango, keshe umwe oku na okudimbuluka oufembanghenda oo e na wokulongela Kalunga e li oshilyo shoukwaneumbo waye.

Konima yaasho, Jesus okwa li a lombwelwa etumwalaka olo la dja kuMaria naMarta, ovamwaina vaLasarus, ovo va li hava di muBetania shaJudea. Oo a li a tumwa okwa ti: “Omwene, kaume koye kopofingo ota vele.” — Johannes 11:1-3.

Nonande Jesus okwa li a uda kutya kaume kaye Lasarus ota vele neenghono, ka li a nyika oluhodi. Ponhele yaasho, okwa ti: “Ouyahame ou itau twala mefyo, ndele otau fimanekifa Kalunga opo Omona waKalunga naye a fimanekwe okupitila muo.” Okwa li a kala ponhele opo a hangika oule womafiku avali, ndele ta lombwele ovahongwa vaye ta ti: “Natu shuneni kuJudea.”  Ovahongwa ove mu nyamukula va ti: “Muhongi, Ovajudea opo ashike va li va hala oku ku denga nomamanya, ndele owa hala vali okushuna ko?” — Johannes 11:4, 7, 8.

Jesus okwe va nyamukula a ti: “Hano efiku kali na eevili 12? Ngeenge omunhu ota ende mouyelele, ite likoyola kusha molwaashi oku wete ouyelele wounyuni ou. Ndele ou ta ende oufiku, ote likoyola molwaashi muye kamu na ouyelele.” (Johannes 11:9, 10) Eshi Jesus a popya eendjovo odo, okwa li a hala okutya efimbo olo Kalunga a tula po a udife ka la li la pwa ko natango. Onghee okwa li e na okulongifa filufilu efimbo olo la xupa ko.

Jesus okwa weda ko a ti: “Kaume ketu Lasarus okwa kofa, ndele ohandi i ko ndi ke mu pendule.” Otashi dulika ovahongwa va li tava diladila kutya Lasarus okwa kofa ashike nota ka veluka, ndele tava ti kuJesus: “Omwene, ngeenge okwa kofa ota veluka.” Opo nee Jesus okwe va lombwela sha yukilila a ti: “Lasarus okwa fya. . . . Natu yeni ko kuye.” — Johannes 11:11-15.

Ovahongwa ova li ve shii kutya Jesus otashi dulika a ka dipaelwe muJudea, nova li va halelela oku mu kwafela, nomolwaasho Tomas a li a ladipika ovahongwa vakwao, a ti: “Nafye natu yeni, tu ka fyeni pamwe naJesus.” — Johannes 11:16.