Inda koshikalimo

Inda koshikalimo

 ETUKULWA 41

Oikumwifilonga oya li ya longwa keenghono da lyelye?

Oikumwifilonga oya li ya longwa keenghono da lyelye?

MATEUS 12:22-32 MARKUS 3:19-30 LUKAS 8:1-3

  • OLWEENDO LAJESUS LOKUUDIFA OSHIKANDO OSHITIVALI

  • TA TE MO EENDEMONI NOKULONDWELA SHI NA SHA NOMATIMBA OO ITAA DIMWA PO

Diva eshi Jesus a mana okupopya kombinga yediminepo meumbo lOmufarisai Simon, okwa li a ya vali a ka udife kuGalilea. Oyo oya li odula onhivali youkalele waye noka li oye aeke molweendo olo. Ovayapostoli vaye 12 ova li va ya pamwe naye nosho yo ovakainhu ovo a “velula nokwa ta mo eemhepo da nyata muvo.” (Lukas 8:2) Mokati kavo omwa li Maria Magdalena, Susanna nosho yo Johanna, oo omushamane waye a li elenga laHerodes Antipas.

Eshi ovanhu vahapu va enda tava shiiva Jesus, mokati kavo omwa li mwa holoka eemhata di na sha noilonga yaye. Osho osha li shi liwetikile eshi Jesus a velula omulumenhu oo a li e na ondemoni, omupofi noiha popi. Omulumenhu oo ka li vali e na ondemoni nokwa li e wete ko nota popi. Ovanhu ova li va kumwa ndele tava ti: “Pamwe ou oye Omona waDavid?” — Mateus 12:23.

Jesus novahongwa vaye kava li tava dulu okulya, molwaashi meumbo omo va li omwa li eemhunga dovanhu da ongala. Ashike nande ongaho, haaveshe va li tava diladila kutya Jesus oye “Omona waDavid” oo a udanekwa. Ovahongimhango nosho yo Ovafarisai vamwe ova li va dja kuJerusalem, ndele kava li ve na elalakano lokulihonga kuJesus ile oku mu yambidida. Ova li tava lombwele ovanhu tava ti: “Oku na Belsebul,” nota longele kumwe ‘nomupangeli weendemoni.’ (Markus 3:22) Eshi ovapambele vaye va uda kombinga yaasho, ova li ve uya oku mu kwata po. Omolwashike va li ve uya oku mu kwata po?

Pomhito oyo, ovamwaina vaJesus kava li va itavela kutya ye Omona waKalunga. (Johannes 7:5) Ova li ve wete a fa ta etifa omapiyaano, vo hasho va li ve mu ikila ngaho eshi va putukila pamwe muNasaret. Onghee ova li tava diladila kutya ke li nawa momutwe, nomolwasho va ti: “Ota i eenghwengu.” — Markus 3:21.

Osho osha li sha yandja oumbangi ulipi? Jesus okwa li a velula omulumenhu oo a li e na  eendemoni, nokwa li a hovela okumona ko nokupopya. Kape na oo a li ta dulu okupataneka oshinima osho. Ovahongimhango nOvafarisai ova li tava kendabala okuhafimaneka Jesus moku mu totela eendjovo doipupulu. Ova popya tava ti: “Omulumenhu ou eendemoni ote di te mo naBelsebul, omupangeli weendemoni.” — Mateus 12:24.

Jesus okwa li e shii osho ovahongimhango nOvafarisai tava diladila, ndele ta ti: “Ouhamba keshe tau lipilukile otau teka po, noshilando ile eumbo keshe tali lipilukile po itali kala po. Sha faafana, ngeenge Satana ota te mo Satana, okwe lipilukila po; hano, ongahelipi ouhamba waye tau dulu okukala po?” — Mateus 12:25, 26.

Jesus okwa li a tomhafana navo pandunge. Ovafarisai ova li ve shii kutya Ovajuda vamwe ohava te mo eendemoni. (Oilonga 19:13) Jesus okwe va pula a ti: “Ngeenge eendemoni ohandi di te mo naBelsebul, ovana veni otave di te mo nalyelye?” Noitya imwe, okwa li ta ti kutya eshi tave mu tokola, otave litokola vo vene. Opo nee Jesus okwa tomhafana navo ta ti: “Ndele ngeenge eendemoni ohandi di te mo nomhepo yaKalunga, osha hala okutya Ouhamba waKalunga owe uya ndele inamu shi didilika.” — Mateus 12:27, 28.

Opo Jesus a ulike kutya eshi a ta mo eendemoni oku na eenghono e dule Satana, okwa ti: “Ongahelipi umwe ta dulu okupumina meumbo lomulumenhu omunaenghono ndele ta kufa mo oinima yaye? Tete oku na okumanga omulumenhu oo, opo nee ta dulu okukufa mo oinima meumbo laye. Keshe oo ina ama kombinga yange, oku li omhinge naame, naau ita ongele ovanhu pamwe naame, ota halakanifa.” (Mateus 12:29, 30) Ovahongimhango nOvafarisai ova li omhinge naJesus, naasho oshi li oumbangi kutya ova li tava yambidida Satana. Ova li tava lombwele ovanhu vaha ehene popepi nOmona waKalunga, oo a li ta yambididwa kuJehova.

Jesus okwa lombwela ovapataneki vaye a ti: “Ovanhu otava diminwa po enyono keshe, neendjovo desheko keshe tava popi. Ashike keshe ou ta sheke omhepo iyapuki ita diminwa po nandenande, ndele ota kala e na etimba fiyo alushe.” (Markus 3:28, 29) Diladila kunghee ovo va li tava yambidida Satana va li ve uditile osho sha ningwa komhepo yaKalunga.