Inda koshikalimo

Inda koshikalimo

 ETUKULWA 37

Jesus ta nyumuna omonamati womufiyekadi

Jesus ta nyumuna omonamati womufiyekadi

LUKAS 7:11-17

  • ENYUMUKO OLO LA NINGWA MUNAIN

Jesus okwa li a dja mo muKapernaum a ya kuNain diva eshi a velula omupiya womukulunhu wetangakwaita laRoma, oshilando osho sha li kouningininolukadi nopa li hapa endwa oshinano sheekilometa 32. Jesus ka li a ya oye aeke. Okwa li a ya pamwe novahongwa vaye nosho yo nongudu inene yovanhu. Etango ola li pokuningina eshi va li pokufika poshivelo shoshilando shaNain. Ova li va shakena po nongudu yOvajuda ya humbata oshimhu shomumati omunyasha tave ke shi paka kondje yoshilando.

Ina yomumati oo oye a li a nyika unene oluhodi. Okwa li omufiyekadi, nomonamati waye ewifa okwa fya. Eshi omushamane waye a fya, okwa li a fyaala po nomonamati waye omuholike. Molwaashi okwa li e na ekwatafano liwa nomonamati, okwa li e na elineekelo kutya ota ka kala ekwafo linene kuye monakwiiwa. Ashike naye okwa fya. Olyelye mbela te ke mu hekeleka noku mu yambidida?

Eshi Jesus a mona omukainhu oo, osha li she mu kuma komutima omolwonghalo yaye i nyikifa oluhodi. Opo nee okwa li e mu udila olukeno noku mu shilipaleka a kale e na omukumo, eshi e mu lombwela a ti: “Ino lila vali.” Ashike okwa li a ninga shihapu. Okwa ehena popepi ndele ta kwata kolutala oko kwa li ku na oshimhu. (Lukas 7:13, 14) Onghedi omo Jesus e linyenga oya ningifa ovanhu ovo va li tava lili va mwene. Otashi dulika vahapu va li tave lipula kutya, ‘Okwa hala okutya ngahelipi, nota ka ninga po shike?’

Ongahelipi shi na sha naavo va enda pamwe naJesus nova mona oikumwifilonga oyo a longa, ngaashi okuvelula omikifi dihapu? Osha fa shi li ngaha kutya kava li va mona nande onale Jesus ta nyumuna omunhu. Nonande enyumuko ola li la ningwa nale koitukulwa yokokule, mbela Jesus ota dulu ngoo okunyumuna? (1 Eehamba 17:17-23; 2 Eehamba 4:32-37) Jesus okwa popya a ti: “Omunyasha, ohandi ku lombwele, penduka!” (Lukas 7:14) Nomumati oo okwa li a penduka. Okwa kala omutumba ndele ta hovele okupopya. Jesus okwe mu yandja kuina oo a li a kumwa nokwa hafa. Omufiyekadi oo ka li vali oye aeke.

Eshi ovanhu va mona kutya omunyasha oo oku na shili omwenyo, ova hambelela Omuyandjimwenyo,  Jehova, tava ti: “Mokati ketu omwa holoka omuprofeti munene.” Vamwe ova li va mona oilonga ididilikwedi oyo Jesus a longa, ndele tava ti: “Kalunga okwa dimbuluka oshiwana shaye.” (Lukas 7:14-17) Onghundana oyo ikumwifi oya li ya tandavela diva moitukulwa oyo ya li popepi, tashi dulika nomoshitukulwa shooJesus, muNasaret, osho sha li kokule oule weekilometa 10. Onghundana oyo otashi dulika ya li ya tandavela nokuli nokoshitukulwa osho shi li kolukadi laJudea.

Johannes Omuninginifi okwa li natango modolongo, ashike natango okwa li a yandja elitulemo koilonga yaJesus oyo a li ta longo. Ovahongwa vaye ova li ve mu lombwela kombinga yoikumwifilonga yaJesus. Okwa li e linyenga ngahelipi?