Inda koshikalimo

Inda koshikalimo

 ETUKULWA 113

Oshilihongomwa shi na sha nokulonga noudiinini — Oitalenti

Oshilihongomwa shi na sha nokulonga noudiinini — Oitalenti

MATEUS 25:14-30

  • JESUS TA YANDJE EFANEKO LI NA SHA NOITALENTI

Eshi Jesus a li natango novayapostoli vaye vane kOmhunda yEemono, okwa li e va lombwela vali efaneko limwe. Omafiku a tetekela, ofimbo a li muJeriko, okwa li a yandja efaneko li na sha noisilveri opo a ulike kutya Ouhamba ou li kokule. Efaneko olo a li a yandja pomhito opo ola faafana naalo a yandjele nale. Efaneko olo ola li la nyamukula epulo li na sha nokukala po kwaye nolexulilo lounyuni. Ola li yo la divilika kutya ovahongwa vaye ove na okulonga noudiinini moilonga oyo e ve lineekelela.

Jesus okwa ti: “Ouhamba otau dulu yo okufaafanifwa nomulumenhu oo e li pokuya kondje yoshilongo. Ofimbo ina ya, okwa ifana ovapiya vaye ndele te va fiile oinima yaye.” (Mateus 25:14) Molwaashi Jesus okwa li e lifaafanifa nale nomulumenhu oo a ya koshilongo shokokule “opo a ka ninge ohamba,” ovayapostoli ova li tava dulu okudidilika mo kutya oye ‘omulumenhu’ oo a li ta popiwa pomhito oyo. — Lukas 19:12.

Ofimbo omulumenhu oo womefaneko ina ya koshilongo shokokule, okwa li a fiila ovapiya vaye oinima yaye. Jesus okwa kala ta yandje elitulemo kokuudifa onghundana iwa yOuhamba waKalunga nokudeula ovahongwa vaye opo va longe oilonga oyo pefimbo loukalele waye. Okwa li a ya e na elineekelo kutya otava ka longa osho e va deulila. — Mateus 10:7; Lukas 10:1, 8, 9; yelekanifa naJohannes 4:38; 14:12.

Mefaneko olo, omulumenhu oo okwa tukula ngahelipi oinima yaye? Jesus okwa ti: “Umwe okwe mu pa oitalenti itano, umwe ivali, namukwao shimwe; keshe umwe shi fike pokudula kwaye, opo nee okwa ya kondje yoshilongo.” (Mateus 25:15) Ovapiya ovo ova li tava ka ninga shike noinima oyo ve lineekelelwa? Mbela otave ke i longifa ngoo nawa opo va hafife omwene wavo? Jesus okwa lombwela ovayapostoli a ti:

“Ou a pewa itano okwa ya diva e ke i landakanife, ndele ta likola itano ya wedwa po. Sha faafana, ou a pewa ivali naye okwa likola ivali ya wedwa po. Ndele omupiya oo a pewa shimwe okwa ya, ndele ta fe elambo nokufudika oshimaliwa shomwene waye.” (Mateus 25:16-18) Oshike tashi ka ningwa po ngeenge omwene okwa aluka?

Jesus okwa weda ko a ti: “Eshi pa pita efimbo lile, omwene wovapiya ovo okwe uya okutala nghee va longa.” (Mateus 25:19) Ovapiya votete vavali ova ninga “keshe umwe shi fike pokudula kwaye.” Omupiya keshe okwa li a longa noudiinini nokwa li a mona oidjemo iwa mwaasho a li e lineekelelwa. Oo a pewa oitalenti itano okwa likola itano ya wedwa po naao a pewa ivali naye okwa likola ivali ya wedwa po. (Pefimbo opo  omupiya okwa li ha longo oule womido 19 lwaapo opo a mone oshitalenti shimwe.) Omwene okwa li a pandula omupiya keshe a ti: “Owa ninga nawa omupiya ove muwa nomudiinini! Owa li omudiinini mwaai inini, onghee ohandi ku nangeke po u file oshisho oinima ihapu. Hafa pamwe nomwene woye.” — Mateus 25:21.

Omupiya oo a li a pewa oshitalenti shimwe okwa li a yooloka ko kuvakwao. Okwa ti: “Omwene, ondi shii kutya ove omulumenhu omukwanyanya, oho teya apa ino kuna noho ongele oikunomwa oyo ino longa. Onghee onda li nda tila, ndele handi fudike oshitalenti shoye medu. Osho ngaha, shi tambula.” (Mateus 25:24, 25) Ka li nokuli a yandja oshimaliwa kovalandakanifi opo shi dule oku aluka noishoshela. Ka li a longa metwokumwe naasho omwene waye a li a hala.

Omwene okwa li e mu ula kutya ye “omukolokoshi nomundedenhu.” Osho a li e na okwa li eshi kufwa ndele tashi pewa omupiya oo a li a hala okulonga noudiinini. Omwene okwa ti: “Keshe ou e na, ota pewa shihapu, ndele ta kala e na shihapu unene. Ndele ou ehe na sha, nokuli nakanini oko e kwete ote ka kufwa.” — Mateus 25:26, 29.

Ovahongwa vaJesus ova li ve na shihapu okudiladila kusho, mwa kwatelwa efaneko olo. Ova mona kutya osho Jesus e ve lineekelela, okuninga ovanhu ovahongwa, oshi li oufembanghenda munene. Nokwa teelela va longe noudiinini eshi tava wanifa po oshilonga osho. Ashike Jesus ka li ta diladila kutya aveshe ove na okulonga shi fike pamwe eshi tava longo po oilonga yokuudifa. Ngaashi sha popiwa mefaneko, ‘keshe umwe oku na okulonga shi fike pokudula kwaye.’ Ashike Jesus ka li a hala okutya ota ka kala a hafela omupiya ‘omundedenhu’ oo ha dopa okuninga ngaashi ta dulu opo a likolele Omwene waye oinima ihapu.

Ovayapostoli ova li va hafa eshi va shilipalekwa kutya: “Keshe ou e na, ota pewa shihapu.”