Salimo 78:1-72
-
Mulungu ankasamalira Aisiraeli koma iwo analibe chikhulupiriro
Masikili.* Salimo la Asafu.+
78 Inu anthu anga, mvetserani chilamulo changa.*Tcherani khutu ku mawu apakamwa panga.
2 Ndidzatsegula pakamwa panga nʼkunena mwambi.
Ndidzanena mawu ophiphiritsa akalekale.+
3 Zinthu zimene tinamva ndipo tikuzidziwa,Zimene makolo athu anatifotokozera,+
4 Sitidzazibisa kwa ana awo.Tidzafotokozera mʼbadwo wamʼtsogolo+Tidzawafotokozera zinthu zotamandika zimene Yehova anachita komanso mphamvu zake,+Zinthu zodabwitsa zimene wachita.+
5 Mulungu anaika chikumbutso pakati pa ana a Yakobo,Ndipo anaika chilamulo mu Isiraeli.Iye analamula makolo athuKuti auze ana awo zinthu zimenezi,+
6 Kuti mʼbadwo wotsatira,Ana amene adzabadwe mʼtsogolo, adzadziwe zimenezi.+
Nawonso adzazifotokoze kwa ana awo.+
7 Zikadzatero anawo azidzadalira Mulungu.
Sadzaiwala ntchito za Mulungu+Koma azidzasunga malamulo ake.+
8 Akadzachita zimenezi sadzakhala ngati makolo awo,Mʼbadwo wosamva komanso wopanduka,+Mʼbadwo umene mtima wawo unali wosakhazikika*+Komanso wosakhulupirika kwa Mulungu.
9 Anthu a fuko la Efuraimu anali ndi mauta,Koma anathawa pa tsiku lankhondo.
10 Iwo sanasunge pangano la Mulungu,+Ndipo anakana kutsatira chilamulo chake.+
11 Iwo anaiwalanso zimene anachita,+Ntchito zake zodabwitsa zimene anawaonetsa.+
12 Mulungu anachita zodabwitsa pamaso pa makolo awo,+Mʼdziko la Iguputo, mʼdera la Zowani.+
13 Iye anagawa nyanja kuti iwo awoloke,Ndipo anaimitsa madzi nʼkukhala ngati khoma.+
14 Iye ankawatsogolera ndi mtambo masanaNdipo usiku wonse ankawatsogolera ndi kuwala kwa moto.+
15 Iye anangʼamba miyala mʼchipululu,Anawalola kumwa madziwo mpaka ludzu kutha ngati kuti akumwa madzi amʼnyanja.+
16 Iye anatulutsa madzi ochuluka pathanthwe,Ndipo anachititsa madzi ambiri kuti ayende ngati mitsinje.+
17 Koma iwo anapitiriza kumuchimwiraPopandukira Wamʼmwambamwamba mʼchipululu.+
18 Iwo anayesa Mulungu mʼmitima yawo+Pomuumiriza kuti awapatse chakudya chimene ankalakalaka.
19 Choncho iwo analankhula mawu amwano kwa MulunguKuti: “Kodi Mulungu angathe kutipatsa chakudya mʼchipululu muno?”+
20 Iye anamenya thanthweMoti panatuluka madzi ambiri ndipo mitsinje inasefukira.+
Koma iwo anati: “Kodi angathenso kutipatsa chakudya,Kapena kodi angapatse anthu ake nyama?”+
21 Yehova atamva zimene ankanenazo anakwiya kwambiri.+Moto+ unayakira Yakobo,Ndipo mkwiyo wake unayakira Isiraeli+
22 Chifukwa chakuti sanakhulupirire Mulungu.+Sanakhulupirire kuti iye angathe kuwapulumutsa.
23 Choncho Mulungu analamula mitambo yamumlengalenga,Ndipo anatsegula zitseko zakumwamba.
24 Iye anapitiriza kuwagwetsera mana ngati mvula kuti adye.Anawapatsa tirigu wochokera kumwamba.+
25 Anthu anadya chakudya cha amphamvu.*+Iye anawapatsa chakudya chokwanira.+
26 Anachititsa kuti mphepo yakumʼmawa iwombe mumlengalenga,Komanso ndi mphamvu zake, anachititsa kuti mphepo yakumʼmwera iwombe.+
27 Iye anawagwetsera nyama yochuluka ngati fumbi,Anawagwetsera mbalame zochuluka ngati mchenga wamʼmbali mwa nyanja.
28 Anawagwetsera zimenezi mumsasa wawo,Kuzungulira matenti awo onse.*
29 Iwo anadya nʼkukhuta kwambiri.Iye anawapatsa zimene ankalakalaka.+
30 Koma nkhuli yawo isanathe,Chakudya chawo chidakali mʼkamwa,
31 Mkwiyo wa Mulungu unawayakira.+
Iye anapha amuna amphamvu pakati pawo.+Anapha anyamata a mu Isiraeli.
32 Ngakhale zinali choncho, iwo anapitiriza kumuchimwira,+Ndipo sanakhulupirire ntchito zake zodabwitsa.+
33 Choncho anathetsa masiku a moyo wawo ngati mpweya,+Ndipo anawabweretsera masoka amene anachititsa kuti afe mwadzidzidzi.
34 Nthawi zonse akayamba kuwapha, iwo ankamufunafuna.+Iwo ankabwerera nʼkuyamba kufunafuna Mulungu,
35 Chifukwa choti ankakumbukira kuti Mulungu anali Thanthwe lawo,+Ndiponso kuti Mulungu Wamʼmwambamwamba anali Wowawombola.*+
36 Koma iwo ankafuna kumupusitsa ndi pakamwa pawoKomanso kumunamiza ndi lilime lawo.
37 Mtima wawo sunali wokhulupirika kwa iye.+Ndipo iwo sanali okhulupirika ku pangano lake.+
38 Koma ankawamvera chifundo.+Ankawakhululukira* machimo awo ndipo sankawawononga.+
Nthawi zambiri ankabweza mkwiyo wake+Mʼmalo moonetsa ukali wake wonse.
39 Iye ankakumbukira kuti iwo ndi anthu athupi la nyama,+Ali ngati mphepo imene imadutsa ndipo sibwereranso.*
40 Nthawi zambiri iwo ankamupandukira mʼchipululu,+Ndipo ankamukhumudwitsa mʼchipululumo!+
41 Ankayesa Mulungu mobwerezabwereza,+Ndipo ankachititsa kuti Woyera wa Isiraeli amve chisoni.*
42 Iwo sanakumbukire mphamvu za* Mulungu,Tsiku limene anawapulumutsa* kwa mdani wawo,+
43 Sanakumbukire mmene anasonyezera zizindikiro zake ku Iguputo,+Komanso zinthu zodabwitsa zimene anachita mʼdera la Zowani,
44 Sanakumbukirenso mmene anasandutsira madzi amʼngalande zotuluka mumtsinje wa Nailo kukhala magazi,+Moti sanathe kumwa madziwo.
45 Mulungu anawatumizira ntchentche zoluma kuti ziwasowetse mtendere,+Komanso achule kuti awawononge.+
46 Anapereka zokolola zawo kwa dzombe lowononga,Anapereka zipatso za ntchito yawo kwa dzombe lochuluka.+
47 Anawononga mitengo yawo ya mpesa+Komanso mitengo yawo ya mkuyu ndi matalala.
48 Anapha nyama zawo zonyamula katundu pogwiritsa ntchito matalala,+Ndiponso ziweto zawo ndi mphezi.
49 Anawasonyeza mkwiyo wake woyaka moto,Komanso ukali wake ndipo anawabweretsera mavuto,Anawatumizira magulu a angelo kuti awabweretsere tsoka.
50 Mkwiyo wake anaulambulira njira.
Sanawapulumutse ku imfa,Ndipo anawagwetsera mliri.*
51 Pamapeto pake anapha ana onse oyamba kubadwa a ku Iguputo,+Amene ndi chiyambi cha mphamvu zawo zobereka mʼmatenti a Hamu.
52 Kenako anatulutsa anthu ake mʼdzikolo ngati gulu la nkhosa,+Ndipo anawatsogolera mʼchipululu ngati nkhosa.
53 Anawatsogolera ndi kuwateteza,Ndipo sanachite mantha.+Nyanja inamiza adani awo.+
54 Kenako anawalowetsa mʼdziko lake lopatulika,+Mʼdera lamapiri ili limene dzanja lake lamanja linatenga.+
55 Iye anathamangitsa mitundu ya anthu kuichotsa pamaso pawo.+Iye anawagawira dzikolo kuti likhale cholowa chawo pochita kuwayezera ndi chingwe.+Anachititsa mafuko a Isiraeli kuti akhale mʼnyumba zawozawo.+
56 Koma iwo anapitiriza kuyesa Mulungu Wamʼmwambamwamba komanso kumupandukira.+Sanamvere zikumbutso zake.+
57 Iwo anasiyanso Mulungu ndipo ankachita zinthu mwachinyengo ngati makolo awo.+
Anali osadalirika ngati uta wosakunga kwambiri.+
58 Anapitiriza kumukhumudwitsa ndi malo awo okwezeka,+Ndipo anamukwiyitsa* ndi zifaniziro zawo zogoba.+
59 Mulungu anamva ndipo anakwiya kwambiri,+Choncho anawakaniratu Aisiraeli.
60 Pamapeto pake anasiya chihema cha ku Silo,+Tenti imene ankakhalamo pakati pa anthu.+
61 Analola kuti adani atenge chizindikiro cha mphamvu zake,Analola kuti ulemerero wake ukhale mʼmanja mwa adani.+
62 Iye anapereka anthu ake ku lupanga,+Ndipo anakwiyira cholowa chake.
63 Moto unapsereza anyamata ake,Ndipo anamwali ake sanawaimbire nyimbo zapaukwati.*
64 Ansembe ake anaphedwa ndi lupanga,+Ndipo akazi awo amasiye sanalire.+
65 Kenako Yehova anadzuka ngati kuti anali mtulo,+Ngati mmene amadzukira munthu wamphamvu+ pambuyo pomwa vinyo wambiri.
66 Iye anathamangitsa adani ake nʼkuwabweza,+Anachititsa kuti adaniwo akhale onyozeka mpaka kalekale.
67 Iye anakana tenti ya Yosefe,Ndipo sanasankhe fuko la Efuraimu.
68 Koma anasankha fuko la Yuda,+Phiri la Ziyoni limene amalikonda.+
69 Anachititsa kuti malo ake opatulika akhalepo mpaka kalekale ngati kumwamba,*+Ngati dziko lapansi limene analikhazikitsa mpaka kalekale.+
70 Anasankha Davide+ mtumiki wake,Ndipo anamuchotsa kumakola a nkhosa,+
71 Kumene ankaweta nkhosa zoyamwitsa,Anamuika kuti akhale mʼbusa wa ana a Yakobo, omwe ndi anthu ake,+Ndi Isiraeli, amene ndi cholowa chake.+
72 Iye anawaweta ndi mtima wokhulupirika,+Ndipo anawatsogolera mwaluso.+
Mawu a M'munsi
^ Onani Matanthauzo a Mawu Ena.
^ Kapena kuti, “malangizo anga.”
^ Mʼchilankhulo choyambirira, “wosakonzeka.”
^ Kapena kuti, “cha angelo.”
^ Mʼchilankhulo choyambirira, “mumsasa wake; mʼmatenti ake.” Kutanthauza a Mulungu kapena a Isiraeli.
^ Kapena kuti, “Wowabwezerera.”
^ Mʼchilankhulo choyambirira, “Ankaphimba.”
^ Kapena kuti, “Moyo wawo umapita ndipo subwereranso.”
^ Kapena kuti, “Ndipo anapweteketsa mtima Woyera wa Isiraeli.”
^ Mʼchilankhulo choyambirira, “dzanja la.”
^ Mʼchilankhulo choyambirira, “anawawombola.”
^ Mʼchilankhulo choyambirira, “anapereka moyo wawo ku mliri.”
^ Kapena kuti, “anamuchititsa nsanje.”
^ Mʼchilankhulo choyambirira, “Ndipo anamwali ake sanatamandidwe.”
^ Mʼchilankhulo choyambirira, “Anamanga malo ake opatulika ngati malo okwezeka.”
