Salimo 51:1-19
Kwa wotsogolera nyimbo. Nyimbo ya Davide, pa nthawi imene mneneri Natani anapita kwa iye, Davideyo atagona ndi Bati-seba.+
51 Ndikomereni mtima inu Mulungu, mogwirizana ndi chikondi chanu chokhulupirika.+
Fufutani zolakwa zanga mogwirizana ndi chifundo chanu chachikulu.+
2 Mundisambitse bwinobwino nʼkuchotsa cholakwa changa,+Ndiyeretseni ku tchimo langa.+
3 Chifukwa zolakwa zanga ndikuzidziwa bwino,Ndipo tchimo langa lili pamaso panga* nthawi zonse.+
4 Inuyo ndi amene ndakuchimwirani kwambiri kuposa aliyense.*+Ndachita chinthu chimene mumachiona kuti ndi choipa.+
Choncho mukamalankhula, mumalankhula zachilungamo,Ndipo mukamaweruza, mumaweruza mwachilungamo.+
5 Taonani! Ndinabadwa ndili wochimwa,Ndipo ndine wochimwa kuchokera pamene mayi anga anatenga pakati panga.+
6 Taonani! Mumasangalala ndi choonadi chochokera pansi pa mtima.+Ndiphunzitseni* kuti ndikhale ndi mtima wanzeru.
7 Ndiyeretseni ndi hisope* ku machimo anga kuti ndikhale woyera.+Ndisambitseni kuti ndiyere kwambiri kuposa matalala.+
8 Ndichititseni kumva kufuula kokondwera ndi kosangalala,Kuti ndisangalale ngakhale kuti mwathyola mafupa anga.+
9 Ndikhululukireni* machimo anga,+Ndipo fufutani* zolakwa zanga zonse.+
10 Inu Mulungu, lengani mtima wolungama mkati mwanga,+Ndipo sinthani mmene ndimaganizira+ kuti ndikhale wokhulupirika.
11 Musandichotse pamaso panu nʼkunditaya.Ndipo musandichotsere mzimu wanu woyera.
12 Bwezeretsani mwa ine chisangalalo chimene chimabwera chifukwa cha chipulumutso chanu.+Ndipatseni mtima wofunitsitsa kukumverani.*
13 Anthu olakwa ndidzawaphunzitsa njira zanu,+Kuti ochimwawo abwerere kwa inu.
14 Inu Mulungu, ndipulumutseni ku mlandu wa magazi,+ inu Mulungu wa chipulumutso changa,+Kuti lilime langa lilengeze mosangalala kuti ndinu wolungama.+
15 Inu Yehova, tsegulani milomo yangayi,Kuti pakamwa panga patamande inu.+
16 Chifukwa nsembe simukuifuna, mukanakhala kuti mukuifuna ndikanaipereka kwa inu.+Inu simusangalala ndi nsembe yopsereza yathunthu.+
17 Nsembe zimene Mulungu amasangalala nazo ndi kudzimvera chisoni mumtima.Inu Mulungu, simudzakana* mtima wosweka ndi wophwanyika.+
18 Chitirani Ziyoni zabwino mwa kukoma mtima kwanu.Ndipo mangani mpanda wa Yerusalemu.
19 Mukatero mudzasangalala ndi nsembe zachilungamo,Mudzakondwera ndi nsembe zopsereza komanso nsembe zathunthu.Pamenepo ngʼombe zamphongo zidzaperekedwa paguwa lanu la nsembe.+
Mawu a M'munsi
^ Kapena kuti, “mʼmaganizo mwanga.”
^ Mʼchilankhulo choyambirira, “Inu nokha.”
^ Kapena kuti, “Phunzitsani umunthu wanga wamkati.”
^ Onani Matanthauzo a Mawu Ena.
^ Kapena kuti, “Bisani nkhope yanu kuti isaone.”
^ Kapena kuti, “fafanizani.”
^ Mʼchilankhulo choyambirira, “Ndichirikizeni ndi mzimu wofunitsitsa.”
^ Kapena kuti, “simudzanyoza.”
