Salimo 108:1-13
Nyimbo ndi Salimo la Davide.
108 Ndatsimikiza mtima, Inu Mulungu,
Ndidzakuimbirani nyimbo ndi moyo wanga wonse* pogwiritsa ntchito zipangizo zoimbira.+
2 Dzuka, iwe choimbira cha zingwe, ndi iwenso zeze.+
Ine ndidzadzuka mʼbandakucha.
3 Ndidzakutamandani pakati pa mitundu ya anthu, inu Yehova.Ndidzaimba nyimbo zokutamandani pakati pa mitundu ya anthu.
4 Chifukwa chikondi chanu chokhulupirika nʼchachikulu moti chafika kumwamba,+Ndipo kukhulupirika kwanu kwafika kuthambo.
5 Inu Mulungu, kwezekani kupitirira kumwamba.Ulemerero wanu ukhale padziko lonse lapansi.+
6 Kuti anthu amene mumawakonda apulumutsidwe,Tipulumutseni ndi dzanja lanu lamanja ndipo mundiyankhe.+
7 Popeza ndi woyera,* Mulungu walankhula kuti:
“Ndidzasangalala popereka Sekemu+ ngati cholowa,Ndipo ndidzayezera anthu anga malo mʼchigwa cha Sukoti.+
8 Giliyadi+ ndi wanga, ngati mmene zilili ndi Manase,Ndipo Efuraimu ndi chipewa* choteteza mutu wanga.+Yuda akuimira mphamvu zanga zolamula.+
9 Mowabu ndi beseni langa losambiramo.+
Edomu ndidzamuponyera nsapato zanga.+
Ndidzafuula mosangalala chifukwa chogonjetsa Filisitiya.”+
10 Ndi ndani amene adzandibweretse kumzinda wokhala ndi mpanda wolimba kwambiri?
Ndi ndani amene adzanditsogolere mpaka kukafika ku Edomu?+
11 Kodi si inu Mulungu amene munatikana,Mulungu wathu, amene simukutsogoleranso magulu athu ankhondo?+
12 Tithandizeni pamene tikukumana ndi mavuto,+Chifukwa chipulumutso chochokera kwa munthu nʼchopanda pake.+
13 Mulungu adzatipatsa mphamvu,+Ndipo adzapondaponda adani athu.+
