Salimo 105:1-45
-
Zimene Yehova anachitira anthu ake posonyeza kuti ndi wokhulupirika
105 Yamikani Yehova,+ itanani pa dzina lake,Dziwitsani mitundu ya anthu ntchito zake.+
2 Muimbireni, muimbireni nyimbo zomutamanda,Ganizirani mozama* ntchito zake zonse zodabwitsa.+
3 Nyadirani dzina lake loyera.+
Mitima ya anthu ofunafuna Yehova isangalale.+
4 Funafunani Yehova+ ndipo muzidalira mphamvu zake.
Nthawi zonse muzimupempha kuti akuthandizeni.*
5 Kumbukirani ntchito zodabwitsa zimene wachita,Kumbukirani zozizwitsa zake ndi ziweruzo zimene wapereka,+
6 Inu mbadwa* za Abulahamu mtumiki wake,+Inu ana a Yakobo, osankhidwa ake.+
7 Iye ndi Yehova Mulungu wathu.+
Ziweruzo zake zili padziko lonse lapansi.+
8 Amakumbukira pangano lake mpaka kalekale,+Lonjezo limene anapereka* ku mibadwo 1,000.+
9 Wakumbukira pangano limene anapangana ndi Abulahamu,+Komanso lumbiro limene analumbira kwa Isaki,+
10 Limene analikhazikitsa monga lamulo kwa Yakobo,Komanso monga pangano lokhalapo mpaka kalekale kwa Isiraeli,
11 Pamene anati, “Ndidzakupatsa dziko la Kanani+Kuti likhale cholowa chako.”+
12 Pamene ananena zimenezi, nʼkuti iwo ali ochepa.+Nʼkuti ali ochepa kwambiri komanso ali alendo mʼdzikolo.+
13 Iwo ankayendayenda kuchokera ku mtundu wina kupita ku mtundu wina,Komanso kuchokera mu ufumu wina kupita kwa anthu a mtundu wina.+
14 Mulungu sanalole kuti munthu aliyense awapondereze,+Koma anadzudzula mafumu chifukwa cha iwo.+
15 Iye anati: “Musakhudze odzozedwa anga,Ndipo aneneri anga musawachitire choipa chilichonse.”+
16 Iye anagwetsa njala yaikulu mʼdzikomo,+Iye anachititsa kuti asathenso kupeza chakudya.*
17 Mulungu anatsogoza Yosefe,Munthu amene anagulitsidwa kuti akhale kapolo.+
18 Kumeneko anamanga* mapazi ake mʼmatangadza,+Khosi lake analiika mʼzitsulo
19 Mpaka nthawi imene zimene Mulungu ananena zinakwaniritsidwa,+Mawu a Yehova ndi amene anamuyenga.
20 Mfumu inalamula kuti amutulutse mʼndende,+Wolamulira mitundu ya anthu anatulutsa Yosefe mʼndende.
21 Anamupatsa udindo woyangʼanira banja lakeKomanso woyangʼanira chuma chake chonse.+
22 Anamupatsa mphamvu zolamulira* akalonga ake mmene akufuniraKomanso kuti akuluakulu aziwaphunzitsa zinthu za nzeru.+
23 Kenako Isiraeli anapita ku Iguputo+Ndipo Yakobo anakhala monga mlendo mʼdziko la Hamu.
24 Mulungu anachititsa kuti anthu ake aberekane kwambiri,+Iye anawachititsa kuti akhale amphamvu kwambiri kuposa adani awo.+
25 Analola adaniwo kuti asinthe mitima yawo nʼkuyamba kudana ndi anthu ake,Komanso kukonzera chiwembu atumiki akewo.+
26 Ndiyeno anatumiza Mose mtumiki wake,+Ndi Aroni+ amene anamusankha.
27 Iwowa anachita zizindikiro za Mulungu pamaso pa Aiguputo,Anachita zodabwitsa zake mʼdziko la Hamu.+
28 Mulungu anachititsa kuti mʼdziko la Iguputo mukhale mdima.+Iwo* sanapandukire mawu ake.
29 Anasandutsa madzi a Aiguputo kukhala magazi,Ndipo anapha nsomba zawo.+
30 Mʼdziko lawo munadzaza achule,+Ngakhalenso mʼzipinda za mafumu awo.
31 Analamula kuti pagwe ntchentche zoluma,Komanso tizilombo touluka toyamwa magazi,* mʼmadera awo onse.+
32 Anawagwetsera matalala mʼmalo mwa mvula,Anagwetsa mphezi* mʼdziko lawo.+
33 Anawononga mitengo yawo ya mpesa ndi ya mkuyuNdipo anakhadzula mitengo mʼdziko lawo.
34 Analamula kuti pagwe dzombe,Dzombe lingʼonolingʼono losawerengeka.+
35 Dzombelo linadya zomera zonse mʼdziko lawo,Linadyanso mbewu zonse zamʼmunda mwawo.
36 Kenako Mulungu anapha mwana aliyense woyamba kubadwa mʼdziko lawo,+Chiyambi cha mphamvu zawo zobereka.
37 Anatulutsa anthu ake atatenga siliva ndi golide.+Ndipo pakati pa mafuko ake panalibe amene anapunthwa panjira.
38 Aiguputo anasangalala Aisiraeli atatuluka mʼdzikolo,Chifukwa ankawaopa kwambiri.+
39 Mulungu anatumiza mtambo kuti uwateteze+
Komanso moto kuti uziwaunikira usiku.+
40 Anapempha nyama ndipo anawapatsa zinziri,+Ankawadyetsa chakudya chochokera kumwamba.+
41 Anatsegula thanthwe ndipo panatuluka madzi ambiri.+Madziwo anayenda ngati mtsinje kudutsa mʼchipululu.+
42 Chifukwa iye anakumbukira lonjezo lake loyera limene analonjeza mtumiki wake Abulahamu.+
43 Choncho Mulungu anatulutsa anthu ake mʼdzikomo anthuwo akusangalala,+Anatulutsa osankhidwa ake akufuula mokondwera.
44 Anawapatsa mayiko a anthu a mitundu ina,+Anatenga zinthu zimene mitundu ina ya anthu inapeza itagwira ntchito mwakhama,+
45 Anachita zimenezi kuti asunge malangizo ake,+Komanso kusunga malamulo ake.
Tamandani Ya!*
Mawu a M'munsi
^ Mabaibulo ena amati, “Nenani zokhudza.”
^ Mʼchilankhulo choyambirira, “Nthawi zonse muzifunafuna nkhope yake.”
^ Mʼchilankhulo choyambirira, “mbewu.”
^ Mʼchilankhulo choyambirira, “Lamulo limene anapereka.”
^ Mʼchilankhulo choyambirira, “Anathyola ndodo zonse zopachikapo mkate.” Nʼkutheka kuti izi ndi ndodo zimene ankazigwiritsa ntchito posunga mkate.
^ Mʼchilankhulo choyambirira, “anazunza.”
^ Mʼchilankhulo choyambirira, “zomanga.”
^ Nʼkutheka kuti akunena Mose ndi Aroni.
^ Timeneti ndi tizilombo tingʼonotingʼono ta ku Iguputo timene timaluma ngati udzudzu.
^ Kapena kuti, “malawi a moto.”
^ Kapena kuti, “Aleluya.” “Ya” ndi chidule cha dzina lakuti Yehova.
