Salimo 148:1-14
148 Tamandani Ya!*
Tamandani Yehova inu okhala kumwamba.+Mutamandeni, inu okhala mʼmwamba.
2 Mutamandeni, inu angelo ake onse.+
Mutamandeni, inu magulu ake onse akumwamba.+
3 Mutamandeni, inu dzuwa ndi mwezi.
Mutamandeni, inu nyenyezi zonse zowala.+
4 Mutamandeni, inu kumwamba komwe kuli pamwamba kwambiri*Komanso madzi amene ali pamwamba pa kumwamba.
5 Zonsezi zitamande dzina la Yehova,Chifukwa iye analamula ndipo zinalengedwa.+
6 Iye amazichititsa kuti zikhalepo kwamuyaya.+Wapereka lamulo limene silidzatha.+
7 Tamandani Yehova, inu okhala padziko lapansi,Inu zamoyo zikuluzikulu zamʼnyanja komanso inu nonse madzi akuya,
8 Inu mphezi ndi matalala, sinowo* komanso mitambo yakuda kwambiri,Iwe mphepo yamkuntho, amene umakwaniritsa mawu ake,+
9 Inu mapiri ndi inu zitunda zonse,+Inu mitengo ya zipatso ndi inu nonse mitengo ya mkungudza.+
10 Inu nyama zakutchire+ ndi inu nonse nyama zoweta,Inu zinthu zokwawa ndi mbalame zamapiko.
11 Mutamandeni inu mafumu apadziko lapansi komanso inu nonse mitundu ya anthu,Inu akalonga komanso inu oweruza nonse apadziko lapansi,+
12 Inu anyamata komanso inu atsikana,*Inu achikulire limodzi ndi ana.
13 Anthu komanso zolengedwa zina zonse, atamande dzina la Yehova,Chifukwa dzina lake lokhalo lili pamwamba poti aliyense sangafikepo.+
Ulemerero wake uli pamwamba kuposa dziko lapansi ndi kumwamba.+
14 Iye adzawonjezera mphamvu* za anthu ake,Kuti anthu ake onse okhulupirika atamandike,Amene ndi ana a Isiraeli, anthu amene ali pafupi ndi iye.
Tamandani Ya!*
Mawu a M'munsi
^ Kapena kuti, “Aleluya.” “Ya” ndi chidule cha dzina lakuti Yehova.
^ Mʼchiyankhulo choyambirira, “inu kumwamba kwa kumwamba.”
^ Kapena kuti, “chipale chofewa.”
^ Mʼchilankhulo choyambirira, “anamwali.”
^ Mʼchilankhulo choyambirira, “adzakweza nyanga.”
^ Kapena kuti, “Aleluya.” “Ya” ndi chidule cha dzina lakuti Yehova.
