Stotr 90:1-17
Khorea Devacho sevok Moizesachem magnnem.
90 Jehova Deva, pillgean-pillgi poriant tum amcho asro.*
2 Porvotam poilim thaun,Vo hea prithumek, pik diupi hea zomnik tunvem toiar korchea* poilim thaun,Tum sodam-sodankal Dev aslo ani sodam-sodankal meren Dev zaun urtolo.*
3 Ek-na-ek dis morta toslea munxak tum porot dhulʼlint dhaddtta,Tum mhunntta: “Munxachea putamno, porot dhulʼlint vochat.”
4 Tujea nodren hozar vorsam mhunnttlear soron gelʼlea kalchea disa sarkim asat,Hoi, ratchea thoddeach voram sarkim* asat.
5 Tum ekach khinnant tankam kabar korta, tanchem jivit ratchea nhidechea thoddeach vella sarkem zata,Sokallim te zomnir kirlolʼlea tonna sarke astat.
6 Sokallchem tem tonn fulta ani vaddtta,Punn sanz zata mhunnttlear tem bavta ani sukta.
7 Karonn tujea ragak lagon amcho bhosm zata,Ani tujea krodhak lagon ami bhirantin bhortat.
8 Tum amche guneanv tujea mukhar dovorta,*Tujea mukhamollachea* uzvaddan amche gutt ukte zatat.
9 Tujea krodhak lagon amche dis unne zait voitat,*Ani amchim vorsam suskara bhaxen kabar zatat.
10 Amchem jivit 70 vorsanchem,Vo eklo khub ghott-mutt* asa zalear tachem jivit 80 vorsanchem asta.
Punn him soglim vorsam trasan ani dukhan bhorlolim astat,Tim rokddinch soron voitat ani ami nanch zatat.
11 Tujea ragak kitli xokti asa tem konn somzonk xokta?
Jitlo vorto tuzo krodh, titlich ami tuji bhirant dhorunk favo.
12 Ami amche dis koxe mezche tem amkam xikoi,Jea vorvim amkam ek zannvaiechem kalliz mellttolem.
13 Jehova Deva, amchea lagim porot ieo! Tuzo rag kednam poriant osoch urtolo?
Tujea sevokanche churchure kor.
14 Sokallim tujea visvaxi mogan amkam dhadoxi kor,Jea vorvim ami sontosbhorit zaun bob martolim ani amche sogle dis khuxalkaien sartolim.
15 Tunvem jitle dis amkam dukh dilem, title dis amkam khuxal kor,Jitlim vorsam ami sonkoxttacho fuddo kelo, titlim vorsam amkam khuxal kor.
16 Tuje sevok tujem kam polloum,Ani tanche put tujem vorteponn polloum.
17 Jehova amchea Devachem besanv amcher asum.
Amchea hatanchea kamak tunvem ies dium.*
Hoi, amchea hatanchea kamank ies di.*
Footnotes
^ Vo “ravpacho zago.”
^ Vo “tunvem ballontiniche vollvolle sosun zolmak haddchea.”
^ Vo “Sasnak thaun sasnak poriant tum Dev zaun asa.”
^ Vo “Ratchea eka parea sarkim.” Dor ek paro sumar char vorancho astalo.
^ Vo “Tuka amchea guneanvam vixim khobor asa.”
^ Vo “tonddachea.”
^ Vo “amchem jivit nanch zata.”
^ Vo “ekleak khas boll.”
^ Vo “tunvem thir stapon korum.”
^ Vo “kamak thir stapon kor.”
