Stotr 132:1-18
Choddttechem Ek Git.
132 Jehova Deva, Davidacho ugddas kor,Ani tachea soglea dukh-trasancho ugddas kor,
2 Koso tannem Jehovak soput dilʼlo,Koxi tannem Jakobachea Xoktivont Devak angvonn kelʼli:
3 “Hanv mhojea tombunt, mhojea ghorant bhitor sorchom na.
Hanv mhojea divanacher,* mhojea khatticher add poddchom na,
4 Hanv mhojea dolleank nhid lagonk diunchom na,Toxench mhojea dolleank* jhemonk diunchom na.
5 Jehova pasot, Jakobachea Xoktivont Deva pasot,Ek borem ghor* mellona tea meren hanv oxem korchom na.”
6 Polloi! Efrathant ami hea vixim aikolʼlem,Ranant amkam tem mellʼllem.
7 Ami tachea ravpachea zagear* bhitor sorom-ia,Tachea paim dovorpachea monnoi-e* lagim man bagoum-ia.
8 Jehova Deva, utth* ani tujea visov gheupachea zagear ieo,Tujem boll dakhoun dita ti Arkpette sangata ieo.
9 Tuje iadnik nitivontponnache kopdde ghalum,Ani tuje visvaxi sevok khuxalkaien zoizoikar korum.
10 Tuzo sevok Davidak lagon,Tujea makhloleak nakarnaka.
11 Jehovan Davidak soput dila,To aplem utor fattim gheunchona:
“Tujea sonsti modlea ekleak,*Hanv tujea xinvasonacher bosoitolom.
12 Tujea putamnim mhozo korar pallʼllo zalear,Ani hanv tanchea ugddasak haddun xikoitam teo adnea pallʼlleo zalear,Tanche put pasun,Sodankal tujea xinvasonacher bostole.”
13 Karonn Jehovan Sionak vinchun kaddlam,Aplo ravpacho zago mhunn tannem to vinchla:
14 Tannem mhunnttlem, “Ho sasna pasot mhozo visov gheupacho zago zaun asa,Hanv hanga ravtolom, karonn hi mhoji itsa.
15 Hanv taka bhorpur jevnnacheo vostu diun besanv ditolom,Hanv tachea goribank unddo diun dhadoxi kortolom.
16 Hanv tachea iadnikank taronnache kopdde nhesoitolom,Ani tache visvaxi lok khuxalkaien zoizoikar kortole.
17 Thoim hanv Davidachem boll* vaddoitolom.
Mhojea makhlolea pasot hanvem ek divo toiar kela.
18 Hanv tachea dusmanank lojeche kopdde ghaltolom,Punn tachea mathear aslolo mukutt porzollttolo.”
