Stotr 139:1-24
Mukhel songitkarak. Davidachem git. Ek songit.
139 Jehova Deva, tunvem mhaka topasla ani tum mhaka vollkhota.
2 Hanv kednam bostam, kednam uttʼttham tem tum zannam.
Pois thaunuch tum mhojim chintnam zannam zaun gheta.
3 Hanv provas kortam ani add poddttam tednam tum mhaka polloita,*Mhojeo sogleo vatto tum zannam.
4 Mhojea jiber utor pavchea poilinch,Polloi! Jehova Deva tuka tem khobor asta.
5 Mhojea mukhar ani mhojea fattlean tum mhaka veddo ghalta,Ani tuzo hat tum mhojer dovorta.
6 Oslem ginean somzonk mhaka tank na.*
Tem mhojean chintunk pasun zaina titlem vortem asa.
7 Hanv tujea povitr xokte thaun khoim vochonk xoktam,Ani tujea mukhavoilo khoim mhunn pollon vochonk xoktam?
8 Hanv voir mollbar gelom zalear tum thoim astolo,Ani hanv Fonddant* add poddlom zalear, polloi! tum thoim pasun astolo.
9 Fantoddeche pakhotte lavun, hanv uddonEkdom poisulʼlea doria lagim ravonk gelom zalear
10 Thoim pasun tuzo hat mhaka vatt dakhoitolo,Ani tuzo uzvo hat mhaka samballttolo.
11 “Kallokh mhaka lipoun uddoitoloch!” oxem hanvem mhunnttlem zalear,Mhojea bhonvtonnim ratcho kallokh uzvadd zatolo.
12 Kallokh pasun tujea pasot chodd datt aschona,Rat tujea pasot disachea uzvadda bhaxen astoli,Kallokh tuka uzvadda bhaxenuch zaun asa.
13 Tunvem mhojeo kiddnneo toiar keleo,Mhojea avoichea kusveant tunvem mhaka lipoilo.*
14 Tunvem mhaka itlea bore toren rochla mhunn hanv ojap zatam ani tuji vakhannʼnni kortam.
Tujim kamam sobit,Hem hanv bore bhaxen zannam.
15 Mhaka guptim rochlo tednam,Prithumechea kholaiechea zagear mhaka ghoddlo tednam,Mhoji haddam tujea thaun liponk nant.
16 Tujea dolleamnim mhaka kusveant pasun polloilo,Mhojea kuddiche sogle sandhe toiar zaunchea poilim,Tanchea vixim ani te ghoddon aile tea disam vixim,Tunvem tujea pustokant boroun dovorlem.
17 Taka lagon, tujim chintnam mhojea pasot khub moladik!
Deva, tim mezunk zainant titlim asat!
18 Hanvem tankam mezpacho proitn kelo zalear tim renvenchea konna poros chodd astolim.
Hanv zago zatam tednam pasun, hanv tujeach sangata astam.*
19 Deva, tunvem noxtteank marun uddoilʼle zalear kitlem borem zaupachem!
Tednam hinvsa korpi* munis mhojea thaun pois voitole asle,
20 Je munis vaitt hetu dovrun* tujea add uloitat,Te tuje dusman zaun asat, je tujem nanv kainch valor naslolea bhaxen ghetat.
21 Jehova Deva, tuzo dves kortat tancho hanv dves korina kai,Ani tujea add voitat tanchi mhaka vitt iena kai?
22 Mhojea kallzant tanchea pasot fokot dves asa,Te mhoje khore dusman zaleat.
23 Deva, mhoji topasnni kor, ani mhojea kallzacho thav ghe.
Mhoji choukoxi kor, ani mhojea monantle uske* vollkhon ghe.
24 Mhaka chukichea vatter vhorta toslem kitem-i mhojea bhitor asa zalear polloi,Ani mhaka sasnak pavoita tea vatter vhor.
