Stotr 10:1-18
ל [Lamed]
10 Jehova Deva, tum pois kiteak ubo ravta?
Akantachea vellar tum kiteak lipta?
2 Noxtto munis gorvan, adar naslolea munxachea fattik lagta,Punn aplea manddnneamnim to apunnuch sampoddttolo.
3 Karonn to noxtto aplea svotachea anvddeam vixim boddai marta,Ani axecho asa taka* besanv dita.
נ [Nun]To Jehovak man dina.
4 To noxtto munis aplea gorvak lagon Devak sodhina,To aplea monantuch mhunntta: “Dev na.”
5 To jem kitem korta tantunt taka ies melltta,Punn tuje nitiche nirnnoi tachea somzonne bhair asat,To aplea soglea dusmanank te kainch valorache naslolea bhaxen lekhta.
6 To aplea kallzant mhunntta: “Mhaka konn halounk xokchona,*Karonn pillgean-pillgi poriantMhojer kednanch sonkoxtt ieunchem na.”
פ [Pe]
7 Tachea tonddant xirap, fotti ani dhomkeo bhorloleo astat,Tachi jib dusreank tras diunk ani dukhounk sodanch toiar asta.
8 To ganvam lagim lipon ravta,Tachea lipʼpachea zagear thaun to niropradeak jivexim marun uddoita.
ע [Ayin]
Lachar munxacho xikar korunk to dolleant tel ghalun tachi vatt polloit ravta.
9 Xinv aplea dholint* boson asta toso to aplea lipʼpachea zagear boson ravta.
Adar nasloleak dhorunk to lipon ravta.
Taka to aplea zallant* dhorta.
10 Tea lachar munxak to chiddʼddoita ani sokol uddoita,Babdde asat te tachea fasant* sampoddttat.
11 To noxtto aplea kallzantuch mhunntta: “Dev visorla.
Taka poddon vochonk na,*To kednanch dhean dina.”
ק [Qoph]
12 Jehova Deva, utth!* Deva, tuzo hat ubar.
Adar naslolea munxak visornaka.
13 Noxtto asa to Devak man kiteak dina?
To aplea kallzant mhunntta: “Tum mhoje koddlean hixob gheunchona.”
ר [Resh]
14 Punn tum dubhav nastana tras ani sonkoxtt polloita,Tum dhean dita ani panvl gheta.
Lachar munis tuje koddem ieta,Bapui bhair poddla tea* bhurgeak tum modot korta.
ש [Shin]
15 Noxtteacho ani vaitt munxacho hat moddun uddoi,Jea udexim tum tanchem noxtteponn sodhtolo tednamTuka tem mellchem na.
16 Jehova sodam-sodankal Raza zaun asa,Raxttram* prithume voilim kabar zaun geleant.
ת [Taw]
17 Punn Jehova Deva, tum khalteanchi vinoti aikotolo,Tum tanchim kallzam thir kortolo ani tancher bariksannen dhean ditolo.
18 Zancho bapui bhair poddla tankam* ani zulum sostat tankam tum neai ditolo,Jea udexim ek-na-ek dis morta to prithume voilo munis porot kednanch tankam bhiounchona.
Footnotes
^ Vo ghoddie, “to apleakuch.”
^ Vo “Hanv kednanch lokchona.”
^ Vo “datt jhilkuttant.”
^ Vo “aplem zall voddun bond korta ani.”
^ Vo “mozbut danvlamnim.”
^ Vo “Tannem aplem tondd dusrea vatten kelam.”
^ Vo “panvl ghe.”
^ Vo “Onath.”
^ Mhunnche, Devachi bhokti korinant tim raxttram.
^ Vo “Onathank.”
