Stotr 69:1-36
Mukhel songitkarak. “Lilies” hea surar gaunchem. Davidachem git.
69 Deva, mhaka salvar kor, karonn udok itlem voir ailam ki hanv buddttam.
2 Hanv khol chiklant rombtam, zoim paim tenkounk zomin na.
Hanv khol udkant buddttam,Ani ghos-ghoxeamnim vhanvtolea udkan mhaka vhanvoun vhela.
3 Modoti pasot ulo marun-marun mhaka puro zalam,Mhozo tallo poddla.
Mhojea Devachi vatt polloitam-polloitam, mhoje dolle thokleat.
4 Karonn nastana mhozo dves kortat te,Mhojea tokler aslolea kensam poros chodd zaleat.
Mhozo nas korunk sodhtat tosle,Mhoje visvasghatki dusman* khub vaddleat.
Hanvem chorunk naslolem tem pasun mhaka porot diunchem poddlem.
5 Deva, mhojea pixeponna vixim tuka khobor asa,Ani mhozo guneanv tujea thaun liplolo na.
6 Akʼkhea Vixvachea Dhonia, fouzanchea Deva Jehova,Tujer bhorvonso dovortat te, mhaka lagon lojek poddona zaum.
Izraelachea Deva,Tuka sodhtat tankam, mhaka lagon loz bhogunk poddona zaum.
7 Tuka lagon hanv opman sostam,Lojen mhojem tondd dhamplam.
8 Hanv mhojea bhavam pasot onvollkhi zalam,Mhojea avoichea putam pasot ek pordexi zalam.
9 Tujea ghora pasot aslole urben lhasta mhojem kalliz,Ani tujea add uloitat tanchim utram mhojer aileant.
10 Hanvem khaltikai dakhoun* upas kelo tednam,Mhaka opmanit kelo.
11 Hanvem sak ghatlo tednam,Tannim mhojim fokannam kelim.*
12 Xarachea darvonttear bostat te mhojea vixim uloitat,Ani bebde mhojer gitam toiar kortat.
13 Punn Jehova Deva, tuka manvota tea vellar,Mhojea magnneacher dhean di.
Deva, tujea bhorpur visvaxi mogak lagon,Mhaka zobab di ani tum khatri dovorpa sarko taronn diupi mhunn dakhoun di.
14 Mhaka rebddantlo vanchoi,Mhaka buddonk dinaka.
Mhozo dves kortat tanchea thaun,Ani khol udka thaun mhaka vanchoi.
15 Ghos-ghoxeamnim vhanvtolea buddttechea udkak mhaka vhanvoun vhoronk dinaka,Vo khol udkak mhaka gillun uddounk dinaka,Vo baink* mhaka bhitor voddunk dinaka.
16 Jehova Deva, mhaka zobab di, karonn tuzo visvaxi mog khub boro.
Tujea bhorpur kakutik lagon mhojer dhean di,
17 Ani tujea sevoka thaun tujem tondd lipoinaka.
Mhaka begin zobab di, karonn hanv sonkoxttak sampoddlam.
18 Mhojea lagim ieo ani mhaka vanchoi,Mhojea dusmanam thaun mhaka soddoi.
19 Mhojem nanv koxem piddʼddear zalam, mhaka koslo opman sosunk poddla ani mhaka koxi loz zalea tem tum zannam.
Tum mhojea soglea dusmanank polloita.
20 Opman sosun mhojem kalliz tunttlam, ani mhozo ghavo pekon-pekona.*
Mhaka somzon ghetole mhunn hanvem bhorvonso dovorlo, punn mhaka khoinch bhorvonso mellonk na,Ani hanvem bhuzvonn diupeanchi vatt polloili, punn mhaka konnuch mellonk na.
21 Punn jevonn mhunn tannim mhaka vik* dilem,Ani mhoji tan bagounk tannim mhaka vinagr pieunk dili.
22 Tanchem mez tanchea pasot ek fas zaum,Ani tanchi girestkai tanchea pasot ek zall zaum.
23 Tannim polloina zaunk tanchea dolleam mukhar kallokh ieum,Ani te* thambonastana koddkoddom.
24 Tancher tuzo krodh votoi,Ani tujea zollttea ragan tancho bhosm kor.
25 Tancho ravpacho zago* padd zaum,Tanchea tombumnim konn ravona zaum.
26 Karonn zaka tunvem marla tachea te fattik lagtat,Ani tunvem zaka ghavo kela tachea dukhi vixim te uloit ravtat.
27 Tanche guneanv anik vaddoi,Ani tunvem tankam nitivont mhunn lekhche nhoi.
28 Jiveanchea* pustoka voilim tanchim nanvam pusun uddoi,Ani nitivont lokam modem tanchim nanvam boroinaka.
29 Punn hanv trasant ani dukhant asam.
Deva, tujea salvar korpachea xokten tunvem mhoji rakhonn korum.
30 Hanv Devachea nanva pasot vakhann’nnechim gitam gaitolom,Ani tache upkar attoun taka voir kaddttolom.
31 Jehovak hem boila poros,Xingam ani fuddam* aslolea tornattea boila poros chodd manvotolem.
32 Khalte lok hem polloitole ani khuxal zatole,Tumi je Devak sodhtat, tumchea kallzank novean ghottai mellom.
33 Karonn Jehova goribanchem aikota,Ani koidi aslolea lokank to kainch valor naslolea bhaxen lekhchona.
34 Mollob ani prithum,Doria ani tantunt aslolea sogleamnim taka vakhannum.
35 Karonn Dev Sionak salvar kortolo,Ani to Judachim xaram porot bandun kaddttolo,Ani te thoim ravtole ani to des aplea tabeant ghetole.
36 To des tachea sevokank daiz mhunn mellttolo,Ani tachea nanvacho mog kortat tim thoim ravtolim.
Footnotes
^ Vo “Karonn nastana mhoje dusman zaleat te.”
^ Vo ghoddie, “Hanvem roddon-roddon.”
^ Vo “mhojer mhunnʼnni toiar keli.”
^ Vo “fonddak.”
^ Vo “ani hanv purnn toren niraxi zalam.”
^ Vo “ek vikari zhadd.”
^ Utran utor, “tanchim bhenddam.”
^ Mhunnche, zaite tombu sangata aslolo zago.
^ Vo “Jivitachea.”
^ Vo “futtam.” Inglez bhaxent “hooves.”
