Stotr 9:1-20
Mukhel songitkarak; Muthlabena* vixim nirdexon. Davidachem songit.
א [Aleph]
9 Jehova Deva, hanv tuka mhojea soglea kallzan vakhannttolom,Hanv tujea soglea ojapachea kamam vixim sangtolom.
2 Tuka lagon hanv khuxalbhorit ani sontosbhorit zatolom,Bhov Vortea Deva, tujea nanvachi vakhannʼnni korun hanv gitam gaitolom.*
ב [Beth]
3 Mhoje dusman pollon voitole tednam,Te tujea mukhar addkhollon poddttole ani tancho nas zatolo.
4 Karonn tum mhojea vatten uloun mhozo hokʼk rakhta,Tum tujea xinvasonar boson nitivontponnan neai korta.
ג [Gimel]
5 Tunvem raxttrank tapoun kaddleant ani noxtteancho nas kela,Tunvem sasnachea-sasna pasot tanchim nanvam pusun kaddleant.
6 Dusmanancho sasnak nas zala,Tunvem tanchim xaram umttun uddoileant,Ani tancho ugddas pasun urchona.
ה [He]
7 Punn Jehova xinvasonar boson sodankal raj choloita,Neai korunk tannem aplem xinvason thir stapon kelam.
8 To nitivontponnan akʼkhe prithumechi zhoddtti kortolo,To nitivontponnan raxttrancho neai kortolo.
ו [Waw]
9 Zulum sostoleam pasot Jehova ek surokxit asro* zatolo,Sonkoxttachea vellar ek asro zatolo.
10 Tujem nanv zannant te tujer visvas dovortole,Jehova Deva, tuka sodhtoleank tum kednanch soddun diunchona.
ז [Zayin]
11 Jehova zo Sionant ravta, tachi vakhannʼnni korun gitam gaiat,Veg-vegllea desantlea lokank tachea kamam vixim sangat!
12 Karonn rogtacho sudd gheupi Dev tankam ugddas dovorta,Koxtt-dukh sostoleanchea roddnneachi bob to visorchona.
ח [Heth]
13 Jehova Deva, mornnachea darvontteantlean mhaka voir kaddpi Deva, mhaka doia dakhoi,Mhozo dves kortat te mhaka koxe dukh ditat, tem polloi.
14 Sionachea dhuvechea darvonttea lagim, tuji vakhannʼnni korpa sarkim kamam hanvem kollounchim mhunn,Ani tujea taronn diupi kamam vorvim hanv khuxal zaunchom mhunn, oxem kor.
ט [Teth]
15 Raxttramnim zo fondd khonnlolo tantunt tinch raxttram poddlim,Tannim manddlolea zallant tanchech paim farovle.*
16 Jehova jea toren zhoddtti korta tantuntlean to koslo Dev tem kollon ieta,Noxtto aplea hatamnim kelʼlea zallant sampoddtta.
Higaion.* (Selah)
י [Yod]
17 Noxtte porot Fonddant* voitole,Devak visortat tim soglim raxttram pasun thoinch voitolim.
18 Punn goribank Dev sasnak visron voichona,Toxench, khalteancho bhorvonso kednanch na zaunchona.
כ [Kaph]
19 Jehova Deva, utth!* Ek-na-ek dis morta tea munxak zoit melloun gheunk dinaka,Tujea mukhar raxttranchi zhoddtti zaum.
20 Jehova Deva, raxttrancher bhirant ghal,Te fokot ek-na-ek dis mortat tosle munis mhunn tankam kollom-di. (Selah)
