Stotr 41:1-13
Mukhel songitkarak. Davidachem songit.
41 Goribak modot korta to munis khuxal,Sonkoxttachea disa Jehova taka vanchoitolo.
2 Jehova taka rakhtolo ani taka jivo dovortolo.
Taka prithumer khuxal munis mhunnttole,Dev taka tachea dusmananchea hatant kednanch ghalchona.*
3 Hantrunnar astana Jehova taka samballttolo,To duent astana tum tachi kallji ghetolo.*
4 Karonn hanvem mhunnttlem: “Jehova Deva, mhaka doia dakhoi.
Mhaka boro kor, karonn hanvem tujea add patok kelam.”
5 Punn mhoje dusman mhojea vixim vaitt uloitat:
“To kednam mortolo ani tachea nanvacher kednam visor poddttolo?”
6 Tanchea modlo eklo mhaka pollounk ieta zalear, to aplea kallzant khotteponn dovrun uloita.
To mhojea vixim vaitt ulounk kitem-na-kitem sodhta,Uprant to voita ani tem sogleak posraita.
7 Mhozo dves kortat te sogle eka-meka modem kuchkuchtat,Mhaka vaitt korunk te mhojea add manddnni korun mhunnttat:
8 “Tacher ek bhirankull sonkoxtt ailam,*To poddla, to porot kednanch utthchona.”
9 Mhozo lagincho ixtt, zacher hanv visvas dovortalom,Zo mhojea borabor unddo khatalo, toch mhojea add zala.*
10 Punn Jehova Deva, tum mhaka doia dakhoi ani mhaka voir kadd,Jea vorvim, tannim jem kelam tachea pasot hanv tankam khast diunk xoktolom.
11 Jednam mhojea dusmanank mhojer zoit mellchem na,Tednam hanv tuka manvolam mhunn mhaka kollon ietolem.
12 Hanv guneanv naslolom* asa dekhun tum mhaka voir ubarta,Tum mhaka sodankal tuje nodre mukhar dovortolo.
13 Jehovachi, Izraelachea Devachi,Sasnachea-sasnak* vakhannʼnni zaum.
Amen, Amen.
Footnotes
^ Vo “dusmananchea khuxe pormonnem zaunk soddchona; dusmananchea itse pormonnem zaunk diunchona.”
^ Vo “tachem hantrunn bodoltolo.”
^ Vo “Taka ek bhirankull duens zalam.”
^ Utran utor, “tannench mhojer khontt ubarlea.”
^ Mhunnche, purnn toren bhokti korpi. Inglez bhaxent “integrity.”
^ Vo “Sasnak thaun sasnak poriant.”
