Stotr 51:1-19
Mukhel songitkarak. Davidan Bathsheba sangata kuddicho sombond dovorlea uprant, Nathan provadi tachea lagim ailo tea vella voilem Davidachem songit.
51 Deva, tujea visvaxi mogak lagon mhaka doia dakhoi.
Tujea vortea kakutik lagon mhoje oprad pusun kadd.
2 Mhozo guneanv purnn toren dhuvun kadd,Ani mhojea patkantlo mhaka nitoll kor.
3 Karonn hanv mhoje oprad ekdom bore bhaxen zannam,Ani mhojem patok sodanch mhojea mukhar* asa.
4 Tujea add, hoi, sogleam-von chodd hanvem tujea* add patok kelam,Tujea nodren vaitt asa tench hanvem kelam.
Taka lagon, tujea uloupant tum nitivont asa.
Tuzo neai sarko asa.
5 Polloi! Hanv zolma thaun guneanvkari asam,Ani mhojea avoichea kusveant thaun patki.
6 Polloi! Promannik kallzachea munxak polloun tum khuxal zata,Mhojea kallzak* khori zannvai xikoi.
7 Mhaka mhojea patkantlean xudʼdh kor,* jea vorvim hanv nitoll zatolom,Mhaka dhuvun kadd, jea vorvim hanv borfa poros dhovo zatolom.
8 Khuxalkaiecho ani sontosacho avaz mhaka aikonk di,Jea vorvim tunvem churo kelʼlim haddam khuxalbhorit zatolim.
9 Mhojea patkam thaun tujem tondd pois kor,*Ani mhoje sogle guneanv pusun kadd.*
10 Deva, mhojea bhitor ek xudʼdh kalliz toiar kor,Ani mhaka ek novem mon di, jea vorvim hanv thir ravonk pavtolom.
11 Tum mhaka tujea mukhavoilo kaddun uddoinaka,Ani tuji povitr xokti mhojea thaun kaddun ghenaka.
12 Tunvem mhaka taronn dilem tednam mhaka ji khuxalkai bhogli, ti mhaka porot di,Tuji adnea pallunk mhojea bhitor itsa utpon kor.*
13 Opradeank hanv tujeo vatto xikoitolom,Jea vorvim patok kortat te poschatap korun, tujea lagim porot ietole.
14 Deva, mhaka taronn diupi Deva, hanv rogtacho guneanvkari zaina zaunk mhaka salvar kor,Jea vorvim mhoji jib tujea nitivontponna vixim khuxalkaien kollit kortoli.
15 Jehova Deva, mhojem tondd ugodd,Jea vorvim hanv tuji vakhannʼnni korunk pavtolom.
16 Karonn tuka bolidan naka, na zalear hanv tuka tem ditolom aslom,Hulpailʼle bhettek lagon tum khuxal zaina.
17 Ek khontibhorit kalliz Devak manvota toslem bolidan zaun asa,Deva, ek khontibhorit ani churo zalʼlem kalliz tum nakarchona.*
18 Tujem boreponn dakhoun Siona pasot borem tem kor,Jeruzalema pasot durgam bandun kadd.
19 Tednam tum nitivontponnachea bolidanamnim,Hulpailʼlea bolidanamnim ani akʼkhea bhettemnim khuxalkai melloun ghetolo.
Tednam boilank tujea vedicher bhettoitole.
Footnotes
^ Vo “monant.”
^ Utran utor, “fokot tujea.”
^ Vo “Mhojea bhitorlea munxak; Mhojea bhitorlea gupit munxak.”
^ Utran utor, “Mhojea patkantlo mhaka hysopan xudʼdh kor.” Grik bhaxent ‘hys′so·pos.’ Hem ghoddie Palestine-ant zata tem zhadd astolem. Tem sumar 1.8 metr lamb zata.
^ Vo “tondd lipoi.”
^ Vo “guneanv nanch kor.”
^ Utran utor, “Khuxe monan tunvem mhaka tenko dium.”
^ Vo “tum kainch valor naslolea bhaxen lekhchona.”
