Stotr 81:1-16
Mukhel songitkarak; Gitithacher.* Asafachem git.
81 Dev, zo amchem boll zaun asa tacho khuxalkaien zoizoikar korat.
Jakobachea Devak zoitachim gitam gaiat.
2 Songit suru korat ani ddofli* gheiat,Kinorechea* sobit avaza sangata tar aslolem sadhon vazoiat.
3 Novea chondrimachea disa,*Akʼkhea chondrimachea disa,* amchea porbechea disa xing* vazoiat.
4 Karonn ho Izraelak dilʼlo hukum,Hi Jakobachea Devachi adnea.
5 Dev Ejipttachea add gelo tednam,Tannem Juzechea ugddasak haddunk adnea dili.
Hanvem ek avaz aikolo zo* hanv vollkhonk xoklom na:
6 “Hanvem tachea khandar thaun vojem kaddlem,Hanvench tachea hatantli kail* kaddli.
7 Tujea akantachea vellar tunvem mhaka ulo marlo ani hanvem tuka vanchoilo,Hanvem tuka gorozta tea kupantlean* zobab dilo.
Meribachea* udka lagim hanvem tuji porikxa keli. (Selah)
8 Mhojea lokamno, aikat, ani hanv tumchea add govai ditolom.
Izraela, tunvem mhojem aikolʼlem zalear, kitlem borem zaupachem.
9 Tujea modem khoinchoch onvollkhi dev aschona,Ani tum porkea devak paim-am poddchona.
10 Hanv Jehova, tuzo Dev zaun asam,Hanvench tuka Ejiptt desantlean bhair haddla.
Tum tujem akʼkhem tondd ugodd, ani hanv tem bhortolom.
11 Punn mhojea lokamnim mhojem aikonk na,Izrael mhaka adhin ravonk na.
12 Tor hanvem tankam tanchea hottʼtti* kallzam pormonnem cholonk dilem,Tankam sarkem dislem tench tannim kelem.*
13 Mhojea lokamnim mhojem aikolʼlem zalear,Izrael mhojea vatten cholʼlolo zalear, kitlem borem zaupachem!
14 Tednam hanv tanchea dusmanank rokddoch haroitolom aslom,Hanv tanchea dusmanam add mhozo hat ubartolom aslom.
15 Jehovacho dves kortat te tachea mukhar bhirantin koddkoddttole,Ani sasnak tacho porinnam bhogtole.
16 Punn to tuka* sogleant bore gonv khaunk ditolo,Ani khoddpantlem mhonv diun dhadoxi kortolo.”
Footnotes
^ Xobdhkox polloi.
^ Hem ek hatamnim vazoitat toslem chambddeachem songitachem sadhon. Inglez bhaxent “tambourine.”
^ Hi ek vazoupachi vost jika gitara bhaxen tar astat, punn ticho akar gitara bhaxen na. Inglez bhaxent “harp.”
^ Vo “Omasechea vellar.” Chondrimacho lhanso bhag disonk suru zata to dis.
^ Vo “Punvechea disa.” Chondrim purnn toren dista to dis.
^ Vo “ek bhas aikoli ji.”
^ Hi chodd korun chakor bandkamacheo vostu vhoronk uzar korta tea kailik suchit korta.
^ Utran utor, “tuka goddgoddachea liplolea zagear.”
^ Hacho orth “Zhogddop.”
^ Vo “jidʼdi.”
^ Utran utor, “Te apleach ievzonnea pormonnem cholʼle.”
^ Utran utor, “taka,” mhunnche, Devachea lokank.
