Stotr 66:1-20
Mukhel songitkarak. Ek git. Ek songit.
66 Prithume voilea soglea lokamno, zoizoikar korat ani Devachi vakhannʼnni korat.
2 Tachea mhoimevont nanvachi vakhannʼnni korun gitam gaiat.*
Taka mhoima diun tachi vakhannʼnni korat.
3 Devak mhunnat: “Tujim kamam kitlim ojapachim!
Tuje vorte xoktek lagon,Tuje dusman tujea mukhar koddkoddttole.
4 Akʼkhi prithum tujea mukhar bagovtoli,Tuji vakhannʼnni korunk tim gitam gaitolim,Tujea nanvachi vakhannʼnni korunk tim gitam gaitolim.” (Selah)
5 Ieiat, ani Devachim kamam polloiat.
Munxanchea putam pasot tannem kelʼlim kamam ojapachim asat.
6 Tannem doriak sukhi zomin keli,Tannim aplea paim-amnim nhoim par keli.
Tachea pasot ami thoim khuxal zalim.
7 To aple xokten sodankal raz choloita.
Tache dolle raxttrancher nodor dovortat.
Hottʼtti* asat tannim apleakuch voir kaddche nhoi. (Selah)
8 Veg-vegllea desantlea lokamno, amchea Devachi vakhannʼnni korat,Ani tachea vakhannʼnnecho avaz vhoddlean aikonk ieum-di.
9 To amcho jiv rakhta,To amche paim addkhollonk* dina.
10 Karonn Deva, tunvem amkam topasun polloileat,Chandi xudʼdh kortat toxem, tunvem amkam xudʼdh keleat.
11 Tunvem amkam zallant sampddaileat,Amkam chiddʼddoun uddoita toslem vojem tunvem amcher* dovorlam.
12 Ek-na-ek dis morta toslea munxak tunvem amche* voilean vochonk dile,Ami ujeantlean ani udkantlean aile,Uprant tunvem amkam surokxit zagear haddle.
13 Hulpailʼleo bhetto gheun hanv tujea ghorant ietolom,Hanv mhojeo angvonneo pallttolom,
14 Ji bhas, hanv sonkoxttant astana mhojea vonttamnim dilʼli,Ani jim utram, mhojea tonddantlean bhair sorlolim, tim hanv purnn kortolom.
15 Chorob aslolea mottea-mottea zonvarancheo hulpailʼleo bhetto hanv tuka bhettoitolom,Menddreanchea bolidanachea dhunvra sangata hanv teo tuka bhettoitolom.
Boilam sangata hanv bokddeankui bhettoitolom. (Selah)
16 Devachi bhirant dhortolea sogleamno, ieiat ani aikat,Ani tannem mhojea pasot jem kitem kelam tem hanv tumkam sangtolom.
17 Hanvem mhojea tonddan taka ulo marlo,Ani mhoje jiben taka mhoima dili.
18 Hanv mhojea kallzant koslem-i vaitt gheun aslom zalear,Jehova mhojem aikoncho naslo.
19 Punn Devan mhojem aikolem,Tannem mhojea magnneancher dhean dilem.
20 Devachi vakhannʼnni zaum, zannem mhojem magnnem nakarunk na,Vo aplo visvaxi mog mhojea thaun addaun dovrunk na.
