Stotr 65:1-13
Mukhel songitkarak. Davidachem songit. Ek git.
65 Deva, Sionant tuji vakhannʼnni zatoli,Tuka kelʼleo angvonneo ami pallttolim.
2 Magnnem Aikopi Deva, sogle toreche lok tujea lagim ietole.
3 Mhojea guneanvamnim mhaka gherav ghatla,Punn tum amche oprad dhampta.
4 To munis khuxal, zaka tum vinchun kaddttaAni tujea angnnamnim ravonk aplea lagim haddtta.
Tujea ghorachea, tujea povitr mondirachea* borea vostumnim,Ami dhadoxi zatolim.
5 Amkam taronn diupi Deva,Tum nitivontponnan ojapachim kamam korun amkam zobab ditolo,Prithumechea konnxea-konnxea meren ravtolea lokancho,Ani doriachea poltoddi pois-pois ravtolea lokancho, tum Bhorvonso.
6 Tunvem* aple xokten porvot thir stapon kele,Tum* khub xoktivont asa.
7 Tum* uchamboll zalʼlea doriank xant korta,Tanchea lharancho avaz ani raxttrancho bovall tum xant korta.
8 Poisulʼlea vattarant ravtat te lok tuji khunna polloun ojap zatole,Suria udeta thoim thaun tem suria buddtta thoim meren aslolea lokank tum khuxalkaien bob marunk laitolo.
9 Tum prithumechi kallji gheta,Tum tika bhorpur pik dita toxi, ani folladik korta.
Deva thaun ieta ti nhoim udkan bhoron vhanvta,Tum tankam dano dita,Karonn tunvem prithum hea toren toiar kelea.
10 Tum tichea xetank udok dita, ani zot ghatloli zomin ek-sarki* korta.
Pausachea xinvran tum mati mov korta, ani tinnem pik diunchem mhunn tika besanv dita.
11 Tacher mukutt ghatlolea porim tunvem akʼkhem voros boreponnan nettoilam,Tujea rosteancher bhorpur boreo vostu bhoron votʼtat.
12 Ranvott vattarantlim chorvachim mollam hirvea tonnan bhorleant,Ani dongor khuxalkaien nettoilʼle asat.
13 Chorvachim mollam hinddamnim bhorleant,Ani falkeamnim* daneachem chador posorlam.
Te zoizoikar kortat, hoi, te gitam gaitat.
