Stotr 5:1-12
Nehilotha* pasot mukhel songitkarak suchounneo. Davidachem songit.
5 Jehova Deva mhojim utram aik,Hanv zo haskar-suskar soddttam tacher dhean di.
2 Mhojea Raza, mhojea Deva, hanv modoti pasot roddttam tednam mhojer dhean di,Karonn hanv tujea lagim magnnem kortam.
3 Jehova Deva, tum sokallim mhozo avaz aikotolo,Sokallim hanv tuka mhozo usko sangtolom ani tujea modoti pasot axeun ravtolom.
4 Karonn tum oslo Dev nhoi, zo lokanchi noxttim kamam polloun khuxal zata,Vaitt kamam korta to tujea sangata ravonk xokona.
5 Khoinchoch gorvixtt munis tujea mukhar ubo ravonk xokchona.
Noxtteponnan vagtat tea sogleancho tum dves korta.
6 Fott uloitat tancho tum nas kortolo.
Maramari kortat ani fosoitat toslea lokank* Jehova vitteta.
7 Punn tujea vortea visvaxi mogak lagon hanv tujea ghorant ietolom,Hanv tuka kallzantlean man diun,* tujea povitr mondira* vatten fuddo korun mhoji man bagoitolom.
8 Jehova Deva, mhojea dusmanank lagon tujea nitivontponnachea vatter mhaka choloi,Tea vatter ieupi sogleo addkholleo kaddun uddoi.
9 Karonn tanchim khoinchinch utram visvas dovorpa sarkim nant,Tanchem mon mhellem asa,Tancho gollo mhunnttlear ek ukto fondd,Aple jiben te dusreank fuloitat.
10 Punn Dev tankam guneanvkari tharaitolo,Ani tanchea manddnneank lagon tanchench nisontton zatolem.
Tanche oprad bhorpur asat dekhun tankam dhanvddaun ghal,Karonn te tujea add geleat.
11 Punn je lok tujea thaim asro ghetat te sogle sontosbhorit zatole,Te khuxalkaien bob martole.
Tankam tras korunk sodhtoleank tum addaitolo,Ani tujea nanvacho mog kortat te tuka lagon sontosbhorit zatole.
12 Karonn Jehova Deva, nitivont asat tancher tum besanv ghaltolo,Tuji maniotai eke vhoddle ddhali bhaxen tanchi rakhonn kortoli.
