Stotr 45:1-17
Mukhel songitkarak. “Lilies” hea surar gaunchem. Korachea putanchem git. Maskil.* Ek mogachem git.
45 Eke bore khobrek lagon mhojem kalliz umedin bhorlam.
Hanv mhunnttam: “Mhojem git* eka raza vixim asa.”
Mhoji jib kola aslolea kopi boroun kaddpeachea* lekhnne* sarki zaum.
2 Munxanchea putam modem tum sogleant rupest.
Tujea vonttam voilean vhanvtat tim utram kitlim sobit!
Taka lagon, Devan tuka sasna pasot axirvad dila.
3 Xoktivont zhuzarea, manan ani vorteponnan,Tuji tolvar bhenddak band.
4 Tujea vorteponnan zoit* melloun gheit rav,Sotak, khaltikaiek ani nitivontponnak lagon zhuz,Ani tuzo uzvo hat ojapachim* kamam kortolo.*
5 Tuje bann tonkache asat, te lokank tujea mukhar uddoitat,Razachea dusmananchea kallzant te rigtat.
6 Dev sasnachea-sasnak tujem xinvason zaun asa,Tujea rajeacho danddo* promannikponnacho danddo.
7 Tunvem nitivontponnacho mog kelo ani noxtteponnacho dves kelo,Taka lagon Devan, tujea Devan tuka telan makhlo ani tujea sangateam poros tuka chodd khuxalkai dili.
8 Tujea soglea kopddeank, gondhrosacho, pormollit balsamacho* ani tikicho* pormoll ieta,Hotʼtinchea dantamnim nettoilolea rajmahalantlean aikonk ieta tea tar aslolea sadhonanchea avazan tum khuxal zata.
9 Tujea dorbarant aslolea famad bailam modem razancheo dhuvo pasun asat.
Ofirachea* bhangran nettloli ranni tujea uzveak ubi asa.
10 Dhuve, aik, dhean di ani mhaka kan di,Tujea lokank ani tujea bapaichea ghorak visor.
11 Ani raza tujea sobitkaiek axetolo,Karonn to tuzo dhoni,Tor tachea mukhar man bagoi.
12 Tirachi dhuv pasun dennem gheun ietoli,Sogleam-von girest munis tuzo favor melloun gheunk sodhtole.
13 Rajmahala bhitor,* razachi dhuv pollounk ekdom sobit ani mhoimevont dista,Tiche kopdde bhangran nettoilʼle asat.
14 Tika khub bore toren vinnlole kopdde* ghalun raza mukhar haddttole.
Tichea fattlean cholon ietolea tichea ixttimnink tujea mukhar haddleant.
15 Tankam khuxal zaun ani sontosbhorit zaun haddttole,Tim razachea rajmahalant bhitor sortolim.
16 Tuje put tujea purvozancho zago ghetole,Tum tankam akʼkhe prithumer kunvor mhunn nemtolo.
17 Ieuncheo asat tea soglea pillgenk hanv tujem nanv kolloitolom.
Taka lagon, veg-vegllea desantle lok sodam-sodankal tuji vakhannʼnni kortole.
Footnotes
^ Xobdhkox polloi.
^ Utran utor, “Mhojim kamam.”
^ Vo “kaddpi xastreachea.”
^ Ek dhar kaddloli boddi ji tonnache boddie thaun kelʼli asta mhunn dison ieta. Inglez bhaxent “stylus.”
^ Vo “ies.”
^ Vo “bhirankull.”
^ Utran utor, “korunk tuka xikoitolo.”
^ Vo ”rajdondd.”
^ Vo “musamboracho.” Hem nanv eka oslea zhaddak lagu kelam zachea thaun Bible-achea kallar pormollit cher toiar kortale.
^ Tikichea zhaddachea familintlench ek zhadd. Inglez bhaxent “cassia.”
^ Ekdom borea dorjeachem bhangar mellttalo to zago.
^ Utran utor, “Bhitor.”
^ Vo ghoddie, “bore embroidderi kelʼle kopdde.”
