Stotr 73:1-28
Asafachem songit.
73 Dev Izraelak khorench boro, zanchem kalliz xudʼdh asa tankam to khorench boro.
2 Mhoje paim zalear koddsoronk pavlole,Mhojim panvlam nisronk pavlolim.
3 Karonn noxtteanchi xanti hanvem polloili tednamMhaka gorvixttanchi* nattkai zali.
4 Karonn te kuddin ghott-mutt asat,*Tankam mortana koslich dukh zaina.
5 Dusrea lokam bhaxen tankam tras nant,Toxench dusrea munxam bhaxen tankam dukh sosunk poddona.
6 Taka lagon, gorv tanchi sorpolli zaun asa,Hinvsa tankam kopddeam bhaxen dhampta.
7 Girestkaiek* lagon tanche dolle suzleat,Tannim aplea kallzant chintunk pasun na, titlem tankam mellʼllam.
8 Te dusreank hanstat ani vaitt uloitat.
Te gorvan bhoron, zulum kortole mhunn dhomkaitat.
9 Apunn mollba itle voir aslolea bhaxen te uloitat,Ani tancheo jibo prithumer boddaio marit bhonvtat.
10 Taka lagon, tache lok tanche vatten voitat,Ani tanche lagim aslolea bhorpur udkantle te pietat.
11 Te mhunnttat: “Devak koxi khobor astoli?
Bhov Vortea Devak hem soglem khorench khobor asa kai?”
12 Hoi, hech te noxtte, zankam soglem sompeponnim melltta.
Te apli girestkai vaddoit ravtat.
13 Khorench, hanvem bexttench mhojem kalliz xudʼdh dovorlem,Ani hanv niropradi asam mhunn dakhounk hanvem mhoje hat dhuile.
14 Akʼkho dis hanv tollmollttalom,Dor sokallim Dev mhaka sudhraitalo.
15 Punn hanv heo vostu uloilʼlom zalear,Hanvem tujea lokam* sangata visvasghat kelʼlea bhaxen zatolem aslem.
16 Hanvem hem somzon gheuncho proitn kelo tednam,Mhaka tras zaunk lagle.
17 Devachea povitr zagear bhitor sorom poriant,Ani tanchea fuddara vixim somzon gheum poriant mhaka tras zale.
18 Khorench, tum tankam nisorta toslea zomnir ubo korta.
Tancho nas zaunk tum tankam sokol uddoita.
19 Okosmat tanchem nisontton zata!
Okosmat tancher sonkoxtt ieun tancho xevott zata!
20 Zoxem ekleak nhidentlean utthlea uprant sopon ugddas urona tea toren,Jehova Deva, tum uttʼttholo tednam tanchea savllecho pasun tum ugddas dovorchona.*
21 Mhojem kalliz ambott zalʼlem,Mhojea bhitor mhaka* khub dukh zatali.
22 Mhaka somjikai nasli ani hanv chintinastana uloitalom,Hanv tujea mukhar eka budʼdh naslolea zonvara bhaxen aslom.
23 Punn atam hanv sodanch tujea sangata asam,Tunvem mhozo uzvo hat dhorla.
24 Tum mhaka solʼlo diun vatt dakhoita,Uprant tum mhaka man favo kortolo.
25 Tujea xivai sorgar mhaka anik konn asa?
Tujea xivai hea prithumer mhaka anik kainch naka.
26 Mhoji kudd ani mhojem kalliz oskot zait,Punn Dev mhojem khoddop, to mhojea kallzak boll dita ani toch mhojem sasnachem daiz.
27 Khorench, tujea thaun pois ravtat tancho nas zatolo.
Ovisvaxi zaun tuka soddun voitat* tancho tum xevott kortolo.*
28 Punn mhojea pasot tor, Devachea lagim sorop khub borem.
Tachim soglim kamam kollit korunk,Hanvem Akʼkhea Vixvacho Dhoni Jehova lagim asro ghetla.
Footnotes
^ Vo “boddai marpeanchi.”
^ Vo “Karonn tanchem pott mottem asa.”
^ Utran utor, “Chorbek.”
^ Utran utor, “putanchea pillge.”
^ Utran utor, “tanchem rup kainch valor naslolea bhaxen tum lekhtolo.”
^ Utran utor, “Mhojea kiddnenk.”
^ Vo “Onoitik kuddicho sombond dovorta toslea munxa bhaxen vagtat.”
^ Utran utor, “tum vogi kortolo.”
